'എന്തിനോ വേണ്ടി തിളയ്ക്കുന്ന സാമ്പാര്‍'; രേഖ രതീഷിനെതിരെ അധിക്ഷേപവുമായി കലാമണ്ഡലം സത്യഭാമ; 'സോഷ്യല്‍ മീഡിയ വിട്ടാല്‍ എല്ലാം ശരിയാകും' എന്ന് ഉപദേശം

കൊച്ചി: (KVARTHA) സീരിയല്‍ നടി രേഖ രതീഷിനെതിരെ അധിക്ഷേപ പരാമര്‍ശവുമായി കലാമണ്ഡലം സത്യഭാമ. ഒരു കൂട്ടം യൂട്യൂബേഴ്‌സ് കാരണം താന്‍ കടുത്ത മാനസിക സമ്മര്‍ദത്തിലാണെന്നും തനിക്കെന്തെങ്കിലും സംഭവിച്ചാല്‍ അതിനു കാരണം ഇവരായിരിക്കുമെന്നും രേഖ രതീഷ് കഴിഞ്ഞ ദിവസം വീഡിയോയിലൂടെ വെളിപ്പെടുത്തിയിരുന്നു. ഇതിന് പിന്നാലെയാണ് സത്യഭാമയുടെ ഫേസ്ബുക്ക് കുറിപ്പ് പ്രത്യക്ഷപ്പെട്ടത്. 'എന്തിനോ വേണ്ടി തിളയ്ക്കുന്ന സാമ്പാര്‍' എന്നായിരുന്നു രേഖയെക്കുറിച്ച് സത്യഭാമയുടെ പരിഹാസം.

പരിഹാസവും ഉപദേശവും

രേഖ രതീഷ് പബ്ലിക് ഫിഗര്‍ ആയതുകൊണ്ടാണ് ഇത്രക്കും ടെന്‍ഷന്‍ അനുഭവിക്കുന്നതെന്ന് സത്യഭാമ ഫേസ്ബുക്കിലൂടെ പ്രതികരിച്ചു. കുറച്ചുനാള്‍ സോഷ്യല്‍ മീഡിയ ഉപയോഗിക്കാതെ ഇരുന്നാല്‍ എല്ലാം ഓക്കെയാകുമെന്ന ഉപദേശവും സത്യഭാമ നല്‍കുന്നുണ്ട്. തനിക്കെതിരെ നടക്കുന്ന സൈബര്‍ ആക്രമണങ്ങള്‍ക്കെതിരെ സര്‍ക്കാരിനോട് സഹായം അഭ്യര്‍ഥിച്ചുകൊണ്ട് രേഖ രതീഷ് വീഡിയോ പങ്കുവെച്ച പശ്ചാത്തലത്തിലാണ് സത്യഭാമയുടെ ഈ പ്രതികരണം.

രേഖ രതീഷിന്റെ വെളിപ്പെടുത്തൽ

'പ്രിയപ്പെട്ട സര്‍ക്കാര്‍, മുഖ്യമന്ത്രി പിണറായി വിജയന്‍ സാറിന്, എന്റെ പേര് രേഖ രതീഷ്. ഞാന്‍ മലയാളം സീരിയല്‍ ഇന്‍ഡസ്ട്രിയില്‍ ജോലി ചെയ്യുന്നു. ഒന്‍പതാം ക്ലാസില്‍ പഠിക്കുന്നൊരു മകന്‍ എനിക്കുണ്ട്. കഴിഞ്ഞ ഒന്‍പത് മാസമായി ജോലിയില്ലാതെ എന്റെ ഫ്‌ലാറ്റില്‍ തന്നെ കഴിയുകയാണ്. മൂന്ന് മാസത്തോളമായി ഒരു കൂട്ടം യൂട്യൂബേഴ്‌സ് മോശം ക്യാപ്ഷനുകള്‍ കൊടുത്ത് എന്നെപ്പറ്റി വീഡിയോ പോസ്റ്റ് ചെയ്യുകയാണ്' നടി പറഞ്ഞു.

View this post on Instagram

A post shared by 𝗥𝗘𝗞𝗛𝗔 𝗥𝗔𝗧𝗛𝗘𝗘𝗦𝗛 (@rekharatheesh3)

ജീവിക്കാന്‍ അനുവദിക്കുന്നില്ല

ഇവരെല്ലാവരും തന്നെ ജീവിക്കാന്‍ അനുവദിക്കാതെ സമ്മര്‍ദത്തിലാക്കുകയാണെന്ന് രേഖ ആരോപിച്ചു. 'ഇത്രയും മാനസിക സമ്മര്‍ദം എനിക്ക് താങ്ങാനാവുന്നില്ല. ഇത്തരം ആക്രമണങ്ങളുടെ ഫലമായി നമ്മുടെ കേരളത്തില്‍ ഒരുപാട് ജീവനുകള്‍ പൊലിഞ്ഞ് പോവുന്നുണ്ട്. 

മകനുവേണ്ടി കഷ്ടപ്പെട്ട് ജീവിക്കാന്‍ ശ്രമിക്കുന്ന സ്ത്രീയാണ് ഞാന്‍. എന്നാല്‍ യൂട്യൂബേഴ്‌സ് കാരണം മുന്നോട്ട് ജീവിക്കാനുള്ള ശേഷി നഷ്ടപ്പെടുകയാണ്. മാനസികമായ സമ്മര്‍ദം കാരണം ജീവിക്കാന്‍ പറ്റുന്നില്ല'.

മരണത്തിന് ഉത്തരവാദികൾ

തനിക്കെന്തെങ്കിലും സംഭവിച്ചാല്‍ അതിന് കാരണം തന്നെ തേജോവധം ചെയ്യുന്ന യൂട്യൂബേഴ്‌സായിരിക്കും എന്ന് അറിയിക്കാനാണ് ഈ വീഡിയോ എന്നും നടി വ്യക്തമാക്കി. ഇതുകൊണ്ടെങ്കിലും ഇത്തരം കാര്യങ്ങള്‍ ഇവിടെ അവസാനിക്കണം. 

തന്നെ മാത്രമല്ല, ഇതേ ഫീല്‍ഡിലെ നിരവധി പേരെ ഇതുപോലെ അപമാനിക്കുകയാണ്. അവരെ ചൂഷണം ചെയ്യുകയാണ് ഇവര്‍ ചെയ്യുന്നതെന്നും രേഖ കൂട്ടിച്ചേർത്തു.

മുഖ്യമന്ത്രി ഇടപെടണം

ദയവ് ചെയ്ത് മുഖ്യമന്ത്രി ഇതിനെതിരെ ശക്തമായ നടപടി എടുക്കണമെന്നും നടി ആവശ്യപ്പെട്ടു. 'എനിക്കു വേണ്ടി മാത്രമല്ല, ഇനിയുള്ള സഹോദരന്മാര്‍ക്കും സഹോദരിമാര്‍ക്കും ഇങ്ങനെയുള്ള അനുഭവങ്ങള്‍ ഉണ്ടാകരുത്. സര്‍ക്കാര്‍ ഇതില്‍ ഒരു തീരുമാനമെടുത്ത് ഞങ്ങളെ രക്ഷിക്കണം' എന്ന് അഭ്യർത്ഥിച്ചുകൊണ്ടാണ് നടി വീഡിയോ അവസാനിപ്പിക്കുന്നത്.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Actress Rekha Ratheesh's appeal to the CM against cyberbullying was mocked by Kalamandalam Sathyabhama, calling her 'boiling sambar'.

#RekhaRatheesh #KalamandalamSathyabhama #CyberBullying #MalayalamSerial #CMOKerala #SocialMedia #KVARTHA