നിസാം ബഷീർ സംവിധാനം ചെയ്യുന്ന പൃഥ്വിരാജ് - പാർവതി തിരുവോത്ത് ചിത്രം 'ഐ നോബഡി'യിലെ ആദ്യ ഗാനമായ 'സജ്ജെ ഖബ്ബെ' പുറത്തിറങ്ങി

കൊച്ചി: (KVARTHA) പൃഥ്വിരാജ് സുകുമാരൻ, പാർവതി തിരുവോത്ത് എന്നിവർ മുഖ്യ കഥാപാത്രങ്ങളായി എത്തുന്ന 'ഐ നോബഡി' എന്ന ചിത്രത്തിൻ്റെ ആദ്യ ഗാനം അണിയറപ്രവർത്തകർ പുറത്തുവിട്ടു. 'സജ്ജെ ഖബ്ബെ' എന്ന് തുടങ്ങുന്ന ആന്തം ഓഫ് നോബഡിയുടെ വീഡിയോയാണ് പുറത്തിറങ്ങിയത്. 

കൊച്ചി ലുലു മാളിൽ നടന്ന ഗംഭീര താരപരിപാടിയിലൂടെയാണ് ഗാനം റിലീസ് ചെയ്തത്. ട്രെൻഡ് സെറ്റർ സംഗീത സംവിധായകൻ ജേക്സ് ബിജോയ് – പൃഥ്വിരാജ് കൂട്ടുകെട്ടിൽ ഇറങ്ങുന്ന ചിത്രമെന്ന പ്രത്യേകതയും 'ഐ നോബഡി'ക്കുണ്ട്. ചിത്രത്തിൻ്റെ പ്രൊമോഷൻ പരിപാടികളുടെ ഔദ്യോഗിക തുടക്കമായാണ് ഈ ഗാനം റിലീസ് ചെയ്തിരിക്കുന്നത്. ചിത്രം ജൂലൈ ഒമ്പതിന് തിയറ്ററുകളിൽ എത്തും.

എട്ട് ഗാനങ്ങളുമായി 'ഐ നോബഡി'

ചിത്രത്തിൽ ആകെ എട്ട് ഗാനങ്ങളാണ് ഉൾപ്പെടുത്തിയിട്ടുള്ളത്. ബോളിവുഡിലെ വലിയ ഹിറ്റ് സിനിമകളിലൊന്നായ ധുരന്ധർ ചിത്രത്തിൽ ഗാനമാലപിച്ച സുധീർ യദുവംശി, റാപ്പ് സിങ്ങർ ബിജോർൺ, സിമ്രാൻ കൗർ എന്നിവർ ചേർന്നാണ് ആന്തം ഓഫ് നോബഡി ഗാനത്തിന് ശബ്ദം പകർന്നത്. സിദ് കൗശാലാണ് വരികൾ എഴുതിയത്. 

'സജ്ജെ ഖബ്ബെ' എന്നത് ഒരു പഞ്ചാബി വാക്കാണ്. ഇതിൻ്റെ മലയാളം അർഥം വലതും ഇടതും എന്നാണ്. പഞ്ചാബിയിൽ സജ്ജെ എന്നാൽ വലതുഭാഗം എന്നും ഖബ്ബെ എന്നാൽ ഇടതുഭാഗം എന്നുമാണ് അർഥമാക്കുന്നത്. വ്യത്യസ്തമായ ഭാഷാശൈലിയിലുള്ള ഈ ഗാനം ഇതിനകം തന്നെ സംഗീതപ്രേമികൾക്കിടയിൽ വലിയ തരംഗമായി മാറിയിട്ടുണ്ട്.

ബാങ്ക് മോഷണത്തിൻ്റെ കഥയുമായി നിസാം ബഷീർ

നിരൂപക, പ്രേക്ഷക പ്രശംസ നേടിയ സൂപ്പർ ഹിറ്റ് മമ്മൂട്ടി ചിത്രം റോഷാക്കിന് ശേഷം നിസാം ബഷീർ സംവിധാനം ചെയ്യുന്ന ചിത്രമാണ് 'ഐ നോബഡി'. പൃഥ്വിരാജ് പ്രൊഡക്ഷൻസിൻ്റെയും ഇ ഫോർ എക്സ്പെരിമെൻ്റ്സിൻ്റെയും ബാനറിൽ സുപ്രിയ മേനോനും മുകേഷ് ആർ മേത്തയും സി വി സാരഥിയും ചേർന്നാണ് ചിത്രം നിർമിക്കുന്നത്. 

എന്ന് നിൻ്റെ മൊയ്തീൻ, കൂടെ തുടങ്ങിയ സൂപ്പർഹിറ്റുകൾക്ക് ശേഷം പൃഥ്വിരാജും പാർവതിയും വീണ്ടും ഒന്നിക്കുന്ന ചിത്രം എന്ന പ്രത്യേകത കൂടി ഈ സിനിമയ്ക്കുണ്ട്. കഴിഞ്ഞ ആഴ്ച പുറത്തിറങ്ങിയ ചിത്രത്തിൻ്റെ ട്രെയിലറിന് ഗംഭീര അഭിപ്രായമാണ് ലഭിക്കുന്നത്. ബാങ്ക് മോഷണത്തെ ചുറ്റിപ്പറ്റി നടക്കുന്ന ഹൈസ്റ്റ് ഴോണറിൽ എത്തുന്ന സിനിമയാകും ഇതെന്നാണ് ട്രെൻഡിങ്ങിൽ തുടരുന്ന ട്രെയ്‌ലർ നൽകുന്ന സൂചന. 

റോഷാക്ക്, ഇബിലീസ് എന്നീ ചിത്രങ്ങൾക്ക് ശേഷം സമീര്‍ അബ്ദുളാണ് രചന നിർവഹിക്കുന്നത്. സാങ്കേതികവിദ്യയുടെ മികച്ച ഉപയോഗത്തിലൂടെ മലയാള സിനിമയിലെ ഏറ്റവും മികച്ച ആക്ഷൻ ത്രില്ലറുകളിലൊന്നായി ഈ ചിത്രം മാറുമെന്നാണ് അണിയറപ്രവർത്തകർ പ്രതീക്ഷിക്കുന്നത്.

വാനിക്ക് ബെൻ, കലൈ കിങ്സ്റ്റൺ, അമിത് ജോളി ബാസ്റ്റിൻ എന്നിവർ ഒരുക്കുന്ന അഞ്ച് ഹൈ വോൾടേജ് ആക്ഷൻ രംഗങ്ങളും കാർ ചേസ് രംഗങ്ങളും ചിത്രത്തിലുണ്ട്. ഹക്കിം ഷാജഹാൻ, അശോകൻ, വിജയരാഘവൻ, മധുപാൽ, ശങ്കർ രാമകൃഷ്ണൻ, നക്ഷത്ര, ഐറാ, നിഷാന്ത് സാഗർ, നന്ദു, നൗഷാദ് ബോംബെ, ജിജോയ് രാജഗോപാൽ, ഖാലിദ് റഹ്മാൻ, സഞ്ജു ശിവറാം, സുധി കോപ്പ, ബീന ചന്ദ്രൻ, സന അൽതാഫ്, കൃഷ്ണൻ ബാലകൃഷ്ണൻ, ദിനേശ് ആലപ്പുഴ, റോണി വർഗീസ്, മനോജ് കെ യു, ഇർഷാദ് അലി, സുധി കോഴിക്കോട്, മഹേന്ദ്രൻ, ആൽബിൻ അലക്സ്, ജിതിൻ മദനൻ തുടങ്ങിയ വൻ താരനിരയും ചിത്രത്തിൽ അഭിനയിക്കുന്നുണ്ട്. ദിനേശ് പുരുഷോത്തമനാണ് ഛായാഗ്രഹണം. റമീസ് എം ബി എഡിറ്റിങ്ങും, നിക്സൺ ജോർജ് സൗണ്ട് ഡിസൈനും നിർവഹിക്കുന്നു.

സിനിമാ ലോകത്തെ പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. ഈ വാർത്ത നിങ്ങളുടെ സുഹൃത്തുക്കൾക്കും സിനിമാ വാട്സാപ്പ് ഗ്രൂപ്പുകളിലും ഷെയർ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമന്റായി രേഖപ്പെടുത്തുക.

Article Summary: The first song 'Sajje Khabbe' from the upcoming Prithviraj Sukumaran and Parvathy Thiruvothu starrer 'I Nobody', directed by Nissam Basheer and featuring music by Jakes Bejoy, has been released ahead of its July 9 theatrical release.

#INobody #PrithvirajSukumaran #ParvathyThiruvothu #JakesBejoy #MalayalamCinema #MollywoodNews #AmmuNews