നടനുമായി ബന്ധപ്പെട്ട സ്ത്രീ വിഷയത്തിൽ താൻ ഇടനിലക്കാരനായി പണം തട്ടിയെന്ന ആരോപണങ്ങൾ വ്യാജമാണെന്ന് ഗായകൻ ഹനാൻ ഷാ

കൊച്ചി: (KVARTHA) കഴിഞ്ഞ കുറച്ച് ദിവസങ്ങളായി മുൻനിര അഭിനേതാവിനെയും തന്നെയും ബന്ധപ്പെടുത്തി വരുന്ന ആരോപണങ്ങളിൽ പ്രതികരണവുമായി ഗായകൻ ഹനാൻ ഷാ. ഈ ആരോപണങ്ങൾ പൂർണമായും വ്യാജമാണെന്ന് അദ്ദേഹം വ്യക്തമാക്കി. നടനുമായി ബന്ധപ്പെട്ട സ്ത്രീ വിഷയത്തിൽ താൻ ഇടനിലക്കാരനായി നിന്നുവെന്നത് കളവാണെന്നും, തന്നെ കരിവാരിത്തേക്കാൻ ചിലർ ബോധപൂർവം ശ്രമിക്കുകയാണെന്നും ഹനാൻ ആരോപിച്ചു. ഇൻസ്റ്റഗ്രാമിലൂടെ തനിക്കെതിരെ നടക്കുന്ന ഇത്തരം അടിസ്ഥാനരഹിതമായ പ്രചാരണങ്ങൾക്കെതിരെ കർശന നിയമനടപടി സ്വീകരിക്കുമെന്നും തൻ്റെ നിരപരാധിത്വം തെളിയിക്കുമെന്നും അദ്ദേഹം അറിയിച്ചു.

ആരോപണങ്ങൾക്ക് അടിസ്ഥാനമായ സംഭവത്തെക്കുറിച്ച് ഹനാൻ ഷായുടെ വാക്കുകൾ ഇങ്ങനെ: ‘ഞാനും ഈ പറയുന്ന അഭിനേതാവും ഒരുമിച്ച് ഒരു സിനിമയിൽ അഭിനയിച്ചുകൊണ്ടിരുന്ന സമയത്താണ് അദ്ദേഹത്തിനെതിരെ 'എൻ്റെ കാസറ്റ്' ഹക്കീം ഒരു സ്ത്രീയുമായി ബന്ധപ്പെട്ട സ്റ്റോറി ഇൻസ്റ്റഗ്രാമിൽ പോസ്റ്റ് ചെയ്തത്. അന്ന് ആ സിനിമ സെറ്റിൽ ഹക്കീം ഫോളോ ചെയ്യുന്ന ഒരേയൊരു വ്യക്തി ഞാൻ മാത്രമായിരുന്നു. അദ്ദേഹത്തിൻ്റെ മാനേജർക്കും ഹക്കീമിനെ ബന്ധപ്പെടാൻ സാധിക്കാത്തതിനാലാണ് അഭിനേതാവ് എന്നോട് കാര്യം പറഞ്ഞത്. അവർ ഈ വിഷയത്തിൽ നിരപരാധിയാണെന്ന് എന്നോട് പറഞ്ഞതിൻ്റെ അടിസ്ഥാനത്തിലാണ് ഞാൻ ഹക്കീമിനെ ബന്ധപ്പെട്ടത്. 25 ലക്ഷം രൂപ നൽകുകയാണെങ്കിൽ പോസ്റ്റ് ചെയ്ത സ്റ്റോറി ഡിലീറ്റ് ചെയ്യാമെന്നും സ്ത്രീ പരാതി പിൻവലിക്കുമെന്നും ഹക്കീം ആവശ്യപ്പെട്ടു’.

ഈ വിവരം താൻ അഭിനേതാവിനെ അറിയിക്കുകയും അവർ സമ്മതിക്കുകയും ചെയ്തുവെന്ന് ഹനാൻ പറയുന്നു. ഇതിൻ്റെ അടിസ്ഥാനത്തിൽ 10 ലക്ഷം രൂപ നേരിട്ടും, ബാക്കി 15 ലക്ഷം രൂപ എടപ്പാൾ സ്വദേശിയായ തൻ്റെ സുഹൃത്ത് സവാദിൻ്റെ അക്കൗണ്ട് വഴിയുമാണ് നൽകിയത്. ആ സാമ്പത്തിക ഇടപാടിൽ ഇതിനപ്പുറം തനിക്ക് വേറെയൊരു പങ്കുമില്ലെന്നും അദ്ദേഹം വ്യക്തമാക്കി. പണം താൻ ഹക്കീമുമായി ചേർന്ന് തട്ടിയെടുത്തതായി ആ അഭിനേതാവിന് ഇന്നുവരെ ഒരു പരാതിയുമില്ല. അവർ ഇപ്പോഴും നല്ല ബന്ധത്തിലാണ്. സിനിമയുടെ നിർമാതാവായ ഷെരീഫിനെയും തൻ്റെ സുഹൃത്ത് സവാദിനെയും ആവശ്യമില്ലാതെ ഇതിൽ വലിച്ചിഴച്ചിരിക്കുകയാണെന്നും, തനിക്കെതിരെ കളവായ വീഡിയോകൾ പോസ്റ്റ് ചെയ്ത എല്ലാവർക്കുമെതിരെ നിയമനടപടി സ്വീകരിക്കുമെന്നും ഹനാൻ കൂട്ടിച്ചേർത്തു.

വിനോദ ലോകത്തെ വാർത്തകളും വിശേഷങ്ങളും അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Singer Hanan Sha denied allegations of extorting money as a middleman in a controversy involving a prominent actor and a woman, clarifying his role and warning of legal action against fake campaigns.

#HananSha #MalayalamCinema #MollywoodControversy #EntertainmentNews #KeralaNews #MalayalamNews #AnjanaNews