'ഹാൽ' സിനിമ വിവാദം: കടുംവെട്ട് പാടില്ലെന്ന സിംഗിൾ ബെഞ്ച് വിധി ഹൈക്കോടതി ശരിവെച്ചു; സെൻസർ ബോർഡിനും കത്തോലിക്കാ കോൺഗ്രസിനും തിരിച്ചടി

കൊച്ചി: (KVARTHA) 'ഹാൽ' സിനിമയുമായി ബന്ധപ്പെട്ട വിവാദത്തിൽ സെൻസർ ബോർഡിന് ഹൈക്കോടതിയിൽ കനത്ത തിരിച്ചടി. സിനിമയ്ക്ക് കടുത്ത വെട്ടിമാറ്റലുകൾ പാടില്ലെന്ന സിംഗിൾ ബെഞ്ചിൻ്റെ വിധിക്കെതിരെ സെൻസർ ബോർഡും കത്തോലിക്കാ കോൺഗ്രസും നൽകിയ അപ്പീൽ ഹൈക്കോടതി ഡിവിഷൻ ബെഞ്ച് തള്ളി. ജസ്റ്റിസുമാരായ ശുശ്രുത് അരവിന്ദ് ധർമ്മാധികാരി, പി വി ബാലകൃഷ്ണൻ എന്നിവർ ഉൾപ്പെട്ട ബെഞ്ചാണ് സിംഗിൾ ബെഞ്ച് വിധി ശരിവെച്ച് സുപ്രധാന വിധി പുറപ്പെടുവിച്ചത്.

ആവിഷ്‌കാര സ്വാതന്ത്ര്യത്തിനുള്ള അംഗീകാരം

ആവിഷ്‌കാര സ്വാതന്ത്ര്യം നിയന്ത്രണങ്ങൾക്ക് വിധേയമാണെന്നായിരുന്നു അപ്പീലിൽ സെൻസർ ബോർഡിൻ്റെ പ്രധാന വാദം. എന്നാൽ, സിംഗിൾ ബെഞ്ച് വിധിയിൽ പിഴവുകളില്ലെന്ന് ചൂണ്ടിക്കാട്ടിയാണ് ഡിവിഷൻ ബെഞ്ച് അപ്പീലുകൾ തള്ളിയത്. വിധി പ്രഖ്യാപിക്കുന്നതിന് മുൻപ്, സിനിമ നേരിട്ട് കണ്ട ജഡ്ജിമാർ, 'ഹാൽ' ആസ്വദിച്ചു എന്ന നിരീക്ഷണവും പങ്കുവെച്ചു.

സെൻസർ ബോർഡ് (CBFC) നടപടിക്കെതിരെ ചിത്രത്തിൻ്റെ നിർമ്മാതാക്കളായ ജെ വി ജെ പ്രൊഡക്ഷൻസാണ് ഹൈക്കോടതിയെ സമീപിച്ചത്. ന്യൂഡിറ്റിയോ വയലൻസോ ഇല്ലാത്ത ഒരു സിനിമയ്ക്ക് എന്തിനാണ് എ സർട്ടിഫിക്കറ്റ് നൽകുന്നതെന്നായിരുന്നു അണിയറപ്രവർത്തകരുടെ ചോദ്യം. സിനിമ സമൂഹത്തിലെ ചില പ്രശ്‌നങ്ങളെക്കുറിച്ച് സംസാരിക്കാൻ ശ്രമിക്കുക മാത്രമാണ് ചെയ്തിട്ടുള്ളതെന്ന് സംവിധായകൻ വീര പ്രതികരിച്ചിരുന്നു.

നീക്കം ചെയ്യണമെന്ന രംഗങ്ങൾ

നവാഗതനായ വീര സംവിധാനം ചെയ്ത് ഷെയിൻ നിഗം നായകനാകുന്ന ചിത്രമാണ് 'ഹാൽ'. ചിത്രത്തിൽ നിന്ന് ചില രംഗങ്ങൾ നീക്കം ചെയ്യാൻ സെൻസർ ബോർഡ് നേരത്തെ ആവശ്യപ്പെട്ടിരുന്നത് വലിയ വിവാദമായിരുന്നു. സിനിമയിലെ ബീഫ് ബിരിയാണി രംഗം, ധ്വജ പ്രണാമം, 'സംഘം കാവലുണ്ട്' തുടങ്ങിയ സംഭാഷണങ്ങളും രാഖി പരാമർശങ്ങളും ഉൾപ്പെടെ 15 സീനുകളിൽ മാറ്റങ്ങൾ വരുത്തണമെന്നായിരുന്നു സിബിഎഫ്സിയുടെ പ്രധാന നിർദേശം.

ഈ മാറ്റങ്ങൾ വരുത്തിയാൽ സിനിമയ്ക്ക് എ സർട്ടിഫിക്കറ്റ് എങ്കിലും നൽകാമെന്നായിരുന്നു സെൻട്രൽ ബോർഡിൻ്റെ നിലപാട്. എന്നാൽ, ബീഫ് ബിരിയാണി കഴിക്കുന്ന സീനുകളടക്കം ഒഴിവാക്കാൻ തയ്യാറാണെന്ന് സിനിമയുടെ അണിയറ പ്രവർത്തകർ അറിയിച്ചതും സിംഗിൾ ബെഞ്ച് ഉത്തരവിൽ കണക്കിലെടുത്തിരുന്നു.

കത്തോലിക്കാ കോൺഗ്രസിൻ്റെ ഹർജി തള്ളി

'ഹാൽ' സിനിമയ്‌ക്കെതിരെ കത്തോലിക്കാ കോൺഗ്രസും ശക്തമായി രംഗത്തെത്തി. സിനിമയുടെ ഇതിവൃത്തം മുസ്‌ലിം യുവാവും ക്രിസ്‌ത്യൻ യുവതിയും തമ്മിലുള്ള പ്രണയമാണ്. ചിത്രത്തിന്റെ ഉള്ളടക്കം മതസൗഹാർദത്തിന് ഭീഷണിയാണെന്ന് ആരോപിച്ച്, സിനിമ റിലീസ് ചെയ്യാൻ അനുവദിക്കരുതെന്ന് ആവശ്യപ്പെട്ട് കത്തോലിക്കാ കോൺഗ്രസ് പ്രസിഡന്റ് കെ വി ചാക്കോ ഹർജി നൽകുകയായിരുന്നു.

ഈ ഹർജിയും ഹൈക്കോടതി ഡിവിഷൻ ബെഞ്ച് തള്ളി. ക്രിസ്‌ത്യൻ സമുദായത്തെയും താമരശ്ശേരി ബിഷപ്പ് ഹൗസിനെയും പ്രതിപാദിക്കുന്ന സിനിമയിലെ മൂന്ന് സീനുകൾക്ക് സിംഗിൾ ബെഞ്ച് അനുമതി നൽകിയതിനെയാണ് കത്തോലിക്കാ കോൺഗ്രസ് അപ്പീൽ നൽകിയിരുന്നത്. ഇതോടെ, കോടതിയുടെ അനുമതിയോടെ ഷെയിൻ നിഗം ചിത്രം റിലീസിനൊരുങ്ങുകയാണ്.

ഹാൽ സിനിമയ്ക്ക് കടുംവെട്ട് വേണ്ടന്ന സുപ്രധാന കോടതിവിവരം പങ്കുവയ്ക്കുക.

Article Summary: Kerala HC upholds order against Censor Board cuts for 'Hal' movie; clears way for release.

#HalMovie #CensorBoard #KeralaHighCourt #ShaneNigam #FreedomOfExpression #CatholicCongress