കൊച്ചി: (KVARTHA) 'മിസ്റ്റർ ആൻഡ് മിസ്സിസ് ബാച്ചിലർ' എന്ന ചിത്രത്തിൻ്റെ പ്രമോഷൻ പരിപാടികളിൽ സഹകരിക്കുന്നില്ലെന്ന് വെളിപ്പെടുത്തി നടി അനശ്വര രാജനെതിരെ ഗുരുതര ആരോപണങ്ങളുമായി സിനിമയുടെ സംവിധായകൻ ദീപു കരുണാകരൻ രംഗത്ത്. മനോരമ ഓൺലൈനിന് നൽകിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്. നടിയോട് പലതവണ അഭ്യർത്ഥിച്ചിട്ടും, കാലുപിടിച്ച് പറഞ്ഞിട്ടുപോലും പ്രമോഷൻ പരിപാടികളിൽ സഹകരിക്കാൻ തയ്യാറായില്ലെന്ന് ദീപു ആരോപിക്കുന്നു.

സിനിമയുടെ ചിത്രീകരണ സമയത്ത് നടി മികച്ച പിന്തുണ നൽകിയിരുന്നു. സിനിമ പലതവണ പ്രതിസന്ധിയിലായപ്പോൾ അനശ്വര കൂടെനിന്നു. എന്നാൽ പ്രമോഷൻ ആവശ്യപ്പെട്ടപ്പോൾ സഹകരിക്കാൻ തയ്യാറായില്ല. സിനിമയുടെ ഓഡിയോ റൈറ്റ്സ് പത്ത് ലക്ഷം രൂപയ്ക്ക് വിറ്റു. പാട്ട് റിലീസ് ചെയ്തപ്പോൾ ഇൻസ്റ്റാഗ്രാം പേജിലൂടെ പ്രമോട്ട് ചെയ്യാൻ ആവശ്യപ്പെട്ടിട്ടും അനശ്വര തയ്യാറായില്ല. ഇക്കാരണത്താൽ ഓഡിയോ റൈറ്റ്സ് എടുത്ത കമ്പനി തനിക്ക് മേൽ സമ്മർദ്ദം ചെലുത്തുന്നുണ്ട്.

പ്രമോഷന് വരാൻ ആവശ്യപ്പെട്ടപ്പോൾ അനശ്വര നോക്കാമെന്ന് പറഞ്ഞു. തുടർന്ന് നടിയുടെ അമ്മയെയും മാനേജരെയും വിളിച്ചെങ്കിലും അവരും അനുകൂലമായി പ്രതികരിച്ചില്ല. സിനിമയിലെ നായകൻ ഇന്ദ്രജിത്ത് നേരിട്ട് വിളിച്ചു സംസാരിച്ചിട്ടും അനശ്വരയുടെ ഭാഗത്തുനിന്ന് അനുകൂല പ്രതികരണമുണ്ടായില്ല. ഇവരുടെ നിസ്സഹകരണം അസോസിയേഷനിൽ പരാതിപ്പെട്ടാൽ നടപടിയുണ്ടാകുമെങ്കിലും നിലവിൽ അതിന് തയ്യാറല്ല. സിനിമയുടെ റിലീസ് തീയതി പ്രഖ്യാപിച്ച ശേഷം പ്രമോഷൻ ഡേറ്റ് അറിയിക്കും. അപ്പോഴെങ്കിലും അനശ്വര സഹകരിക്കുമെന്നാണ് പ്രതീക്ഷിക്കുന്നത്.

ഹൈലൈൻ പിക്ചേഴ്സിൻ്റെ ബാനറിൽ പ്രകാശ് ഹൈലൈനാണ് 'മിസ്റ്റർ ആൻഡ് മിസ്സിസ് ബാച്ചിലർ' നിർമ്മിച്ചത്. ഡയാന ഹമീദ്, റോസിൻ ജോളി, ബൈജു പപ്പൻ, രാഹുൽ മാധവ്, സോഹൻ സീനുലാൽ, മനോഹരി ജോയ്, ജിബിൻ ഗോപിനാഥ്, ലയ സിംപ്സൺ എന്നിവരാണ് ചിത്രത്തിലെ മറ്റ് താരങ്ങൾ. കഴിഞ്ഞ ഓഗസ്റ്റിൽ റിലീസ് പ്രഖ്യാപിച്ച സിനിമ ചില കാരണങ്ങളാൽ നീണ്ടുപോവുകയായിരുന്നു.

ഈ വാർത്ത പങ്കുവെക്കുക. നിങ്ങളുടെ അഭിപ്രായങ്ങൾ രേഖപ്പെടുത്തുക.

Director Deepu Karunakaran has alleged that actress Anaswara Rajan is not cooperating with the promotion of their film "Mr. and Mrs. Bachelor," despite her support during filming.

#AnaswaraRajan, #DeepuKarunakaran, #MrAndMrsBachelor, #MoviePromotion, #KeralaCinema, #Controversy