താര രാജാവ് നാഗാര്‍ജുനയുടെ മകനും ബിസിനസ് കുടുംബത്തില്‍പ്പെട്ട യുവതിയും തമ്മിലുള്ള വിവാഹം മുടങ്ങി; എല്ലാം തകിടം മറിഞ്ഞത് രണ്ട് ദിവസം കൊണ്ട്, കാരണം അജ്ഞാതം

ഹൈദരാബാദ്: (www.kvartha.com 22.02.2017) താര രാജാവ് നാഗാര്‍ജുനയുടെ മകനും ബിസിനസ് കുടുംബത്തില്‍പ്പെട്ട യുവതിയും തമ്മിലുള്ള വിവാഹം മുടങ്ങി. നാഗാര്‍ജുനയുടെയും അമലയുടേയും ഇളയ മകന്‍ അഖിലും ഡിസൈനര്‍ ശ്രേയ ഭൂപാലുമായുള്ള വിവാഹമാണ് മുടങ്ങിയത്.

താര രാജ കുടുംബമായ അക്കിനേനി കുടുംബത്തില്‍ കഴിഞ്ഞ വര്‍ഷം ആഘോഷങ്ങളുടെ കാലമായിരുന്നു. ഇളയ മകന്‍ അഖിലും ശ്രേയ ഭൂപാലുമായുള്ള വിവാഹ നിശ്ചയം ആയിരുന്നു ആദ്യത്തെ ആഘോഷം. പിന്നാലെ നാഗചൈതന്യയും സാമന്തയുമായുള്ള വിവാഹ നിശ്ചയവും ആഘോഷമായി നടന്നു. 
വധു വരന്മാരെ അനുനയിപ്പിക്കാന്‍ കുടുംബങ്ങള്‍ ശ്രമിച്ചെങ്കിലും ഇരുവരും അതിന് തയ്യാറായില്ല. ബിസിനസ് ഭീമന്‍ ജിവികെ റെഡ്ഡിയുടെ കൊച്ചു മകളാണ് ശ്രേയ. സൗത്ത് ഫിലിം ഫെയറിന്റെ ഡിസൈനറുമാണ് ശ്രേയ. രണ്ടു വര്‍ഷം മുന്‍പാണ് അഖിലും ശ്രേയയും പരിചയപ്പെടുന്നത്. അതിനു ശേഷം ഡേറ്റിങിലായിരുന്ന ഇവര്‍ വിവാഹം കഴിക്കണമെന്ന ആവശ്യം കഴിഞ്ഞ വര്‍ഷം വീട്ടുകാരെ അറിയിക്കുകയായിരുന്നു.

കഴിഞ്ഞ ആഴ്ച വരെ ഇവര്‍ക്കിടയില്‍ ഒരു പ്രശ്‌നവുമില്ലായിരുന്നുവെന്നും എന്നാല്‍ കഴിഞ്ഞ ദിവസം വിവാഹത്തില്‍ നിന്ന് പിന്മാറുകയാണെന്ന് ഇരുവരും വീട്ടുകാരെ അറിയിക്കുകയായിരുന്നുവെന്നും അക്കിനേനി കുടുംബത്തിന്റെ വക്താവ് അറിയിച്ചു.