ഷെയ്‌ൻ നിഗം നായകനാവുന്ന പുതിയ ചിത്രത്തിന് പേരിട്ടു: ശ്രദ്ധയാകർഷിച്ച് ടൈറ്റിൽ ലുക് പോസ്റ്റർ

കൊച്ചി: (www.kvartha.com 03.04.2021) ഷെയ്‌ൻ നിഗം നായകനാവുന്ന പുതിയ ചിത്രത്തിന് പേരിട്ടു. 'ബർമുഡ' എന്ന് പേരിട്ടിരിക്കുന്ന ചിത്രത്തിന്റെ സംവിധാനം ടി കെ രാജീവ് കുമാർ ആണ്. ചിത്രത്തിന്റെ ഔദ്യോഗിക പ്രഖ്യാപനവും പൂജയും ശനിയാഴ്ച രാവിലെ 11 മണിക്ക് ട്രിവാൻഡ്രം ക്ലബിലെ ഹാൾ 1-ൽ വച്ച് നടന്നു.

24 ഫ്രെയിംസിൻ്റെ ബാനറിൽ സി കെ സൂരജ്, സി ജെ ബിജു, എൻ എം ബാദുഷ എന്നിവരാണ് ചിത്രം നിർമിക്കുന്നത്. ഏപ്രിൽ നാലിന് ചിത്രീകരണം തുടങ്ങുന്ന 'ബർമുഡ'യുടെ ലൊകേഷൻ പൂർണമായും തിരുവനന്തപുരമാണ്. ചിത്രത്തിൻ്റേതായി ഇറക്കിയ ടൈറ്റിൽ ലുക് പോസ്റ്ററുകൾ ഇതിനോടകം തന്നെ ഏറെ ശ്രദ്ധയാകർഷിച്ചു.

ചിത്രത്തിൽ വിനയ് ഫോർട്, ഹരീഷ് കണാരൻ, സൈജു കുറുപ്പ്, സുധീർ കരമന, മണിയൻപിള്ള രാജു, ഇന്ദ്രൻസ്, സാജൻ സുധർശൻ, ദിനേഷ് പണിക്കർ, കോട്ടയം നസീർ, ശ്രീകാന്ത് മുരളി, നന്ദു, നിരഞ്ജന അനൂപ്, ഗൗരി നന്ദ, നൂറിൻ ശെറീഫ്, ഷൈനി സാറ തുടങ്ങി വൻ താരനിരതന്നെ ചിത്രത്തിൽ ഉണ്ട്.

ഷെയ്ന്‍ നിഗം അവതരിപ്പിക്കുന്ന കഥാപാത്രത്തിന്റെ പേര് ഇന്ദുഗോപന്‍ എന്നാണ്. ഇന്ദുഗോപനെന്ന കഥാപാത്രം സബ് ഇന്‍സ്‌പെക്ടര്‍ ജോഷ്വായുടെ അടുത്ത് ഒരു പരാതിയുമായി എത്തുന്നിടത്തുന്നിന്നാണ് സിനിമയുടെ കഥ വികസിക്കുന്നത്. സബ് ഇന്‍സ്‌പെക്ടര്‍ ജോഷ്വയായി വേഷമിടുന്നത് വിനയ് ഫോർടാണ്.