നടി മഞ്ജു വാര്യരുടെ പരാതിയില്‍ സംവിധായകന്‍ ശ്രീകുമാര്‍ മേനോനെ അറസ്റ്റ് ചെയ്ത് പിന്നീട് ജാമ്യത്തില്‍ വിട്ടയച്ചു

തൃശ്ശൂര്‍: (www.kvartha.com 06.12.2019) നടി മഞ്ജു വാര്യരുടെ പരാതിയില്‍ സംവിധായകന്‍ ശ്രീകുമാര്‍ മേനോനെ അറസ്റ്റ് ചെയ്ത് പിന്നീട് വിട്ടയച്ചു. രണ്ടുപേരുടെ ജാമ്യത്തിലാണ് ശ്രീകുമാര്‍ മേനോനെ വിട്ടയച്ചത്. അന്വേഷണവുമായി പൂര്‍ണമായി സഹകരിക്കുമെന്ന് ശ്രീകുമാര്‍ മേനോന്‍ അന്വേഷണ സംഘത്തെ അറിയിച്ചിട്ടുണ്ട്.

ശ്രീകുമാര്‍ മേനോനില്‍ നിന്ന് വധഭീഷണിയുണ്ടെന്നും ഔദ്യോഗികാവശ്യങ്ങള്‍ക്കായി നല്‍കിയ ലെറ്റര്‍ ഹെഡും രേഖകളും ദുരുപയോഗം ചെയ്യപ്പെട്ടേക്കാമെന്ന് ഭയപ്പെടുന്നു എന്നുമായിരുന്നു മഞ്ജു പോലീസിന് നല്‍കിയ പരാതിയില്‍ പറയുന്നത്.


തൃശ്ശൂര്‍ പോലീസ് ക്ലബില്‍ വച്ച് നടന്ന ചോദ്യംചെയ്യലിന് പിന്നാലെയാണ് ശ്രീകുമാര്‍ മേനോനെ അറസ്റ്റ് ചെയ്തത്. വ്യാഴാഴ്ച വൈകുന്നേരം മുതല്‍ നാല് മണിക്കൂര്‍ നേരം ശ്രീകുമാര്‍ മേനോനെ പോലീസ് ചോദ്യം ചെയ്തു.

ചോദ്യം ചെയ്യലില്‍ നടിയുടെ പരാതിയില്‍ പറഞ്ഞ കാര്യങ്ങള്‍ വസ്തുതാപരമാണെന്ന് അന്വേഷണ സംഘത്തിന് ബോധ്യപ്പെട്ടതായാണ് വിവരം. കേസുമായി ബന്ധപ്പെട്ട മുഴുവന്‍ തെളിവുകളും അടുത്തയാഴ്ച ശ്രീകുമാര്‍ മേനോന്‍ അന്വേഷണ സംഘത്തിന് മുന്നില്‍ ഹാജരാക്കും.

കേസില്‍ മഞ്ജുവാര്യരുടെ രഹസ്യമൊഴി നേരത്തെ രേഖപ്പെടുത്തിയിരുന്നു. ചാവക്കാട് മജിസ്‌ട്രേറ്റ് കോടതിയിലാണ് രഹസ്യമൊഴി രേഖപ്പെടുത്തിയത്. ഒടിയന്‍ സിനിമയുടെ പ്രൊഡക്ഷന്‍ മാനേജര്‍ സജി, നിര്‍മാതാവ് ആന്റണി പെരുമ്പാവൂര്‍ എന്നിവരുടെയും മൊഴി ക്രൈംബ്രാഞ്ച് നേരത്തെ രേഖപ്പെടുത്തിയിരുന്നു.