ഹൈദരാബാദ്: (KVARTHA) ദുൽഖർ സൽമാൻ നായകനായെത്തിയ തെലുങ്ക് ചിത്രം ലക്കി ഭാസ്കർ ബോക്സ് ഓഫീസിൽ വൻ വിജയം നേടി ഓട്ടം തുടരുകയാണ്. ബോക്സ് ഓഫീസിൽ കളക്ഷൻ 100 കോടിയും കഴിഞ്ഞ ഈ ചിത്രത്തിന്റെ ഒടിടി റിലീസിനെ കുറിച്ചുള്ള വാർത്തകളാണ് ഇപ്പോൾ പുറത്തുവന്നുകൊണ്ടിരിക്കുന്നത്. റിപ്പോർട്ടുകൾ പ്രകാരം, ഈ ചിത്രത്തിന്റെ ഒടിടി റൈറ്റ്‌സ് ഏകദേശം 30 കോടി രൂപയ്ക്ക് നെറ്റ്‌ഫ്ലിക്‌സ് സ്വന്തമാക്കിയിരിക്കുകയാണ്. നവംബർ 30 മുതൽ ചിത്രം നെറ്റ്‌ഫ്ലിക്‌സിൽ ലഭ്യമാകുമെന്നാണ് പ്രതീക്ഷിക്കുന്നത്.

കിംഗ് ഓഫ് കൊത്തയുടെ പരാജയത്തിന് ശേഷം ദുൽഖറിന് വലിയ ആശ്വാസമായി മാറിയിരിക്കുകയാണ് ലക്കി ഭാസ്കർ.  വെങ്കി അറ്റ്ലൂരി സംവിധാനം ചെയ്ത ഈ തെലുങ്ക് ചിത്രത്തിൽ ദുൽഖുറിന്റെ നായികയായി എത്തിയിരിക്കുന്നത് മീനാക്ഷി ചൗധരിയാണ്. സിതാര എന്റർടെയ്ൻമെന്റിന്റെ ബാനറിൽ നിർമ്മിച്ച ഈ ചിത്രം ദുൽഖറിന്റെ കരിയറിലെ ഏറ്റവും വലിയ വിജയ മാറിയിരിക്കുകയാണ്. 

പുതുമയുള്ള ഒരു കഥാപരിസരത്തിൽ ദുൽഖർ സൽമാൻ അഭിനയ മികവ് കാഴ്ചവച്ച വ്യത്യസ്തമായ ഒരു കഥാപാത്രത്തെ അവതരിപ്പിച്ച ചിത്രമാണ് ലക്കി ഭാസ്കർ. ജി.വി. പ്രകാശ് കുമാറിന്റെ മനോഹരമായ സംഗീതവും നിമിഷ് രവിയുടെ ഛായാഗ്രഹണവും വെങ്കി അറ്ലൂരിയുടെ മികച്ച സംവിധാനവും ചേർന്ന് ചിത്രത്തിന് മികച്ച ഒരു അനുഭവമാണ് നൽകുന്നത്. 1980-കളുടെ പശ്ചാത്തലത്തിൽ ഒരു ബാങ്കറുടെ നിഗൂഢമായ സമ്പത്തിനെ ചുറ്റിപ്പറ്റിയുള്ള കഥ പറയുന്ന ഒരു സിനിമയാണ് 'ലക്കി ഭാസ്കർ'. ഈ ചിത്രത്തിന്റെ ചിത്രീകരണം പ്രധാനമായും ഹൈദരാബാദിൽ വെച്ചായിരുന്നു.

#LuckyBhaskar #DulquerSalmaan #NetflixOTT #TeluguCinema #BoxOfficeHit #OTTRelease