2046 ലെ നിയോ കൊച്ചിയുടെ പശ്ചാത്തലത്തിൽ കൃഷാന്ദ് ചിത്രം; രജിഷയുടെ ഐറ്റം ഡാൻസുമായി 'മസ്തിഷ്ക മരണം സൈമൺസ് മെമ്മറീസ്' 2026 ഫെബ്രുവരി 27 ന് തിയേറ്ററുകളിൽ

കൊച്ചി: (KVARTHA) നിരൂപക പ്രശംസ നേടിയ ആവാസവ്യൂഹം, പുരുഷ പ്രേതം എന്നീ ചിത്രങ്ങൾക്ക് ശേഷം കൃഷാന്ദ് ഒരുക്കുന്ന പുതിയ ചിത്രത്തിന്റെ റിലീസ് തീയതി പ്രഖ്യാപിച്ചു. 'മസ്തിഷ്ക മരണം എ ഫ്രാങ്കെന്ബൈറ്റിങ് ഓഫ് സൈമൺസ് മെമ്മറീസ്' എന്ന് പേരിട്ടിരിക്കുന്ന ചിത്രം 2026 ഫെബ്രുവരി 27 ന് ആഗോള തലത്തിൽ തിയേറ്ററുകളിൽ എത്തും. 

അജിത് വിനായക ഫിലിംസിന്റെ ബാനറിൽ വിനായക അജിത്താണ് ചിത്രം നിർമ്മിക്കുന്നത്. ഗഗനചാരി എന്ന ഹിറ്റ് ചിത്രത്തിന് ശേഷം അജിത് വിനായക ഫിലിംസ്, കൃഷാന്ദ് ഫിലിംസ് എന്നിവർ വീണ്ടും ഒന്നിക്കുന്ന സയൻസ് ഫിക്ഷൻ ചിത്രം കൂടിയാണിത്. കൃഷാന്ദ് തന്നെയാണ് ചിത്രത്തിന്റെ രചനയും നിർവ്വഹിച്ചിരിക്കുന്നത്.

2046 ലെ നിയോ കൊച്ചി പശ്ചാത്തലം

2046 കാലഘട്ടത്തിൽ കഥ പറയുന്ന ഒരു സയൻസ് ഫിക്ഷൻ ഇൻവെസ്റ്റിഗേഷൻ കോമഡി ചിത്രമായാണ് ഇതൊരുക്കിയിരിക്കുന്നത്. ചിത്രത്തിന്റെ രണ്ട് ടീസറുകൾ ഇതിനോടകം പുറത്തുവരികയും വലിയ പ്രേക്ഷക ശ്രദ്ധ നേടുകയും ചെയ്തിരുന്നു. തദ്ദേശീയമായ പശ്ചാത്തലത്തിൽ സയൻസ് ഫിക്ഷന്റെ ഏറെ വേറിട്ടതും ഭ്രാന്തവുമായ ഒരു അവതരണ ശൈലിയാണ് ചിത്രം സ്വീകരിച്ചിരിക്കുന്നതെന്ന് ടീസറുകൾ സൂചിപ്പിക്കുന്നു. 

ഫ്യൂച്ചറിസ്റ്റിക് നിയോ നോയിർ മൂഡ് നിലനിർത്തുന്ന ചിത്രത്തിന് അന്താരാഷ്ട്ര സിനിമകളുടെ നിലവാരമുള്ള ദൃശ്യഭാഷയാണുള്ളത് എന്നതും ടീസർ ദൃശ്യങ്ങൾ വ്യക്തമാക്കുന്നുണ്ട്. 2046 ലെ കൊച്ചി നഗരത്തിന്റെ അതായത് 'നിയോ കൊച്ചി'യുടെ പശ്ചാത്തലത്തിലാണ് ചിത്രം അവതരിപ്പിക്കുന്നത്.

ഹിറ്റായി രജിഷയുടെ ഡാൻസും പാട്ടുകളും

രജിഷ വിജയന്റെ ഐറ്റം ഡാൻസ് ഉൾപ്പെടെയുള്ള ചിത്രത്തിലെ ഗാനങ്ങളും ഇതിനോടകം സൂപ്പർ ഹിറ്റായിട്ടുണ്ട്. ചിത്രത്തിൽ നിന്ന് ആദ്യം പുറത്തുവന്ന 'കോമള താമര' എന്ന ഗാനവും പിന്നീട് എത്തിയ 'ആരാധകൻ' എന്ന ഗാനവും ഇപ്പോൾ സമൂഹ മാധ്യമങ്ങളിൽ വൈറലാണ്. 

ഏറെ വ്യത്യസ്തമായ മേക്കിങ് ശൈലിയാണ് ചിത്രത്തിന്റേത് എന്ന് ഈ ഗാനങ്ങളും സൂചിപ്പിക്കുന്നുണ്ട്. മലയാള പ്രേക്ഷകർ ഇതുവരെ കാണാത്ത ശൈലിയിലാണ് ഗാനങ്ങൾ അവതരിപ്പിച്ചിരിക്കുന്നത്. മലയാള സിനിമയിൽ ഇതുവരെ കാണാത്ത രീതിയിലുള്ള കഥ പറച്ചിലാണ് ചിത്രത്തിൽ ഉണ്ടാവുക എന്നും അണിയറപ്രവർത്തകർ അവകാശപ്പെടുന്നു.

വിഎഫ്എക്സ് വിസ്മയം; രണ്ടാം ഭാഗം ജൂലൈയിൽ

വിഎഫ്എക്സ് സാങ്കേതികവിദ്യയ്ക്ക് വലിയ പ്രാധാന്യമുള്ള രീതിയിലാണ് ചിത്രം ഒരുക്കിയിരിക്കുന്നത്. ലോകപ്രശസ്ത സയൻസ് ഫിക്ഷൻ സിനിമയായ ബ്ലേഡ് റണ്ണർ പോലെയുള്ള ചിത്രങ്ങളുടേത് പോലെ വ്യത്യസ്തമായൊരു കഥാലോകമാണ് ഈ ചിത്രത്തിലൂടെ ഒരുക്കുന്നതെന്നാണ് റിപ്പോർട്ട്. ഈ ചിത്രത്തിന്റെ രണ്ടാം ഭാഗത്തിന്റെ ചിത്രീകരണം ഈ വർഷം ജൂലൈയിൽ ആരംഭിക്കുമെന്നും വിവരമുണ്ട്. സാരേഗാമയാണ് ചിത്രത്തിന്റെ മ്യൂസിക് അവകാശം സ്വന്തമാക്കിയത്. വർക്കിയാണ് സംഗീത സംവിധാനം നിർവ്വഹിച്ചിരിക്കുന്നത്.

വൻ താരനിര

രജിഷ വിജയൻ, നിരഞ്ച് മണിയൻ പിള്ള രാജു, ജഗദീഷ്, സുരേഷ് കൃഷ്ണ, നന്ദു, ദിവ്യ പ്രഭ, ആൻ ജമീല സലീം, ശാന്തി ബാലചന്ദ്രൻ, വിഷ്ണു അഗസ്ത്യ, ശംഭു, സായ് ഗായത്രി, ശ്രീനാഥ് ബാബു, മനോജ് കാന, ഷിൻസ് ഷാൻ, മിഥുൻ വേണുഗോപാൽ, സച്ചിൻ ജോസഫ്, ആഷ്‌ലി ഐസക്, അനൂപ് മോഹൻദാസ്, ജയിൻ ആൻഡ്രൂസ് എന്നിവർ ചിത്രത്തിൽ നിർണ്ണായക വേഷങ്ങളിൽ എത്തുന്നു. നടൻ സഞ്ജു ശിവറാം ഒരു അതിഥി താരമായും ചിത്രത്തിൽ പ്രത്യക്ഷപ്പെടുന്നുണ്ട്.

പ്രയാഗ് മുകുന്ദനാണ് ചിത്രത്തിന്റെ ഛായാഗ്രഹണം നിർവ്വഹിക്കുന്നത്. എഡിറ്റിംഗ് സംവിധായകൻ കൃഷാന്ദ് തന്നെയാണ് കൈകാര്യം ചെയ്യുന്നത്. നിഖിൽ പ്രഭാകർ ചീഫ് അസോസിയേറ്റ് ഡയറക്ടറും രഞ്ജിത്ത് കരുണാകരൻ പ്രൊജക്റ്റ് ഡിസൈനറുമാണ്. കൃഷാന്ദ്, ആൽവിൻ ജോസഫ് എന്നിവർ ചേർന്ന് കലാസംവിധാനവും നിർവ്വഹിക്കുന്നു. അർഷാദ് വർക്കല മേക്കപ്പും ശ്രാവൺ സത്യ സംഘട്ടനവും ഒരുക്കുന്നു. 

വസ്ത്രാലങ്കാരം ദിവ്യ ജോബി, ചീഫ് അസോസിയേറ്റ് സിനിമാട്ടോഗ്രാഫി നിഖിൽ സുരേന്ദ്രൻ, ചീഫ് എക്സിക്യൂട്ടീവ് പ്രൊഡ്യൂസർ രാഹുൽ മേനോൻ, എക്സിക്യൂട്ടീവ് പ്രൊഡ്യൂസർ ജയേഷ് എൽ ആർ, കളറിസ്റ്റ് അർജുൻ മേനോൻ കാൻപ്രോ, സ്റ്റിൽസ് കിരൺ വി എസ്, പ്രൊഡക്ഷൻ മാനേജർ ആരോമൽ പയ്യന്നുർ, പിആർഒ ശബരി എന്നിവരാണ് മറ്റ് അണിയറ പ്രവർത്തകർ.

മലയാളത്തിലെ സയൻസ് ഫിക്ഷൻ സിനിമകളെ പ്രോത്സാഹിപ്പിക്കാൻ ഈ വാർത്ത ഷെയർ ചെയ്യൂ.

Article Summary: Director Krishand's sci-fi investigation comedy 'Masthiska Maranam' is set to release on Feb 27, 2026.

#MasthiskaMaranam #Krishand #RajishaVijayan #NeoKochi #MalayalamCinema #ScienceFiction #SimonMemories #Gaganachari