രാഷ്ട്രീയ പ്രവേശനത്തിന് മുന്നോടിയായി തമിഴ് നാട്ടിലുടനീളം യാത്ര നടത്തുമെന്ന് പ്രഖ്യാപിച്ച് നടന്‍ കമലഹാസന്‍; പളനിസാമി സര്‍ക്കാരിന്റെ അഴിമതിയും മോശം ഭരണവും ചൂണ്ടിക്കാട്ടിയാണ് യാത്ര

ചെന്നൈ: (www.kvartha.com 15.01.2018) രാഷ്ട്രീയ പ്രവേശനത്തിന് മുന്നോടിയായി തമിഴ് നാട്ടിലുടനീളം യാത്ര നടത്തുമെന്ന് പ്രഖ്യാപിച്ച് നടന്‍ കമലഹാസന്‍. തമിഴ് നാട് മുഖ്യമന്ത്രി ഇ.പളനിസാമി സര്‍ക്കാരിന്റെ അഴിമതിയും മോശം ഭരണവും ചൂണ്ടിക്കാട്ടി ജനുവരി 26 മുതല്‍ ആണ് സംസ്ഥാന വ്യാപകമായി കമല്‍ സഞ്ചരിക്കുന്നത്. സംസ്ഥാനത്ത് നടക്കുന്ന അഴിമതി ഭരണവും കെടുകാര്യസ്ഥതയും പുറത്ത് കൊണ്ടുവരാനായി മയ്യം വിസില്‍ എന്ന പേരില്‍ കമല്‍ നേരത്തെ മൊബൈല്‍ ആപ്പ് പുറത്തിറക്കിയിരുന്നു.

ജനങ്ങളെ കാണുന്നതിനായി ജനുവരി 26ന് ഞാന്‍ എന്റെ യാത്ര ആരംഭിക്കുകയാണ്. യാത്രയുടെ എല്ലാ വിവരങ്ങളും തമിഴ് വാരികയായ ആനന്ദ വികടന്റെ അടുത്ത ലക്കത്തില്‍ അറിയിക്കും എന്നും കമലഹാസന്‍ വ്യക്തമാക്കി. ഒരു അവാര്‍ഡ് ദാന ചടങ്ങിലായിരുന്നു കമല്‍ തന്റെ യാത്രയുടെ പ്രഖ്യാപനം നടത്തിയത്.


തമിഴ്‌നാട് രാഷ്ട്രീയത്തില്‍ പുതുചരിത്രം സൃഷ്ടിച്ചാണ് സൂപ്പര്‍ സ്റ്റാര്‍ രജനികാന്ത് തന്റെ രാഷ്ട്രീയ പ്രഖ്യാപനം നടത്തിയത്. രജനികാന്തുമായി ഒപ്പം ചേര്‍ന്ന് രാഷ്ട്രീയത്തില്‍ പ്രവര്‍ത്തിച്ച് പുതിയ വിപ്ലവം സൃഷ്ടിക്കാന്‍ തനിക്ക് താല്പര്യമുണ്ടെന്ന് കമല്‍ നേരത്തെ വ്യക്തമാക്കിയിരുന്നു. ആനന്ദ വികടന്‍ വാരികയിലാണ് അദ്ദേഹം ഇത് സംബന്ധിച്ച് താല്പര്യം പ്രകടിപ്പിച്ച് ലേഖനം എഴുതിയത്.