അവാര്‍ഡ് വിജയികള്‍ക്ക് സ്വന്തം കൈകൊണ്ട് മുഖ്യമന്ത്രി പുരസ്‌കാരം നല്‍കാത്തത് നല്ല ഉദ്ദേശത്തില്‍; ചലച്ചിത്ര അവാര്‍ഡ് വിതരണ വിവാദത്തില്‍ വിശദീകരണവുമായി മന്ത്രി എ കെ ബാലന്‍

തിരുവനന്തപുരം: (www.kvartha.com 02.02.2021) ചലച്ചിത്ര അവാര്‍ഡ് വിതരണ വിവാദത്തില്‍ വിശദീകരണവുമായി സാസ്‌കാരിക വകുപ്പ് മന്ത്രി എ കെ ബാലന്‍ രംഗത്ത്. അവാര്‍ഡ് വിജയികള്‍ക്ക് നല്ല ഉദ്ദേശത്താലാണ് സ്വന്തം കൈകൊണ്ട് മുഖ്യമന്ത്രി പുരസ്‌കാരം നല്‍കാത്തത് എന്നായിരുന്നു മന്ത്രിയുടെ വിശദീകരണം. കോവിഡ് ഭീതി വിട്ടൊഴിയാത്ത സമയത്താണ് സംസ്ഥാന ചലച്ചിത്ര അവാര്‍ഡ് വിതരണ ചടങ്ങ് നടന്നത്.


ഇത്തരത്തില്‍ അവാര്‍ഡ് നല്‍കിയതിനെ ഒരു അവാര്‍ഡ് ജേതാവും വിമര്‍ശിച്ചിട്ടില്ല. ആദ്യം വിമര്‍ശിച്ചത് പ്രൊഡ്യൂസേഴ്സ് അസോസിയേഷന്റെ ഒരു മുന്‍ ഭാരവാഹിയാണ്. അദ്ദേഹത്തെ കീഴ്‌പെടുത്തിയ ആശയമാണ് അതിനുകാരണം.

എന്നാല്‍ കാര്യങ്ങളറിയാതെ പ്രതിപക്ഷ നേതാവ് കൂടി ഇതിനെതിരെ പറഞ്ഞെന്നും മന്ത്രി അഭിപ്രായപ്പെട്ടു. വിമര്‍ശനമുന്നയിച്ച പ്രതിപക്ഷ നേതാവ് അന്യരെ കൊണ്ട് സ്വന്തം ശരീരം ചുമപ്പിക്കുകയാണ്. ഈ രീതിയില്‍ അദ്ദേഹം നടത്തുന്ന യാത്ര തിരുവനന്തപുരത്ത് എത്തിയാല്‍ സ്വീകരണയോഗങ്ങള്‍ നടന്നയിടങ്ങളെല്ലാം കോവിഡ് ക്ലസ്റ്ററായി മാറുമെന്നും എ കെ ബാലന്‍ വിമര്‍ശിച്ചു.