ഇന്ത്യയില്‍ ആദ്യമായി ഔദ്യോഗിക സന്ദര്‍ശനത്തിനെത്തിയ കാനഡ പ്രധാനമന്ത്രിയെ മോഡി അവഗണിച്ചു; കുടുംബത്തെ സന്ദര്‍ശിച്ച് സൂപ്പര്‍ സ്റ്റാര്‍ ഷാരൂഖ് ഖാന്‍

മുംബൈ: (www.kvartha.com 21.02.2018) ഇന്ത്യയില്‍ ആദ്യ ഔദ്യോഗിക സന്ദര്‍ശനത്തിനെത്തിയ കാനഡ പ്രധാനമന്ത്രി ജസ്റ്റിന്‍ ട്രൂഡിനെയും കുടുംബത്തെയും പ്രധാനമന്ത്രി നരേദ്രമോഡി അവഗണിച്ചെങ്കിലും മുംബൈയില്‍ കുടുംബത്തെ സന്ദര്‍ശിച്ച് സൂപ്പര്‍ സ്റ്റാര്‍ ഷാരൂഖ് ഖാന്‍. ചൊവ്വാഴ്ച വൈകുന്നേരമാണ് ഷാരൂഖ് ജസ്റ്റിന്‍ ട്രൂഡിനെ സന്ദര്‍ശിച്ചത്. കാനഡ പ്രധാനമന്ത്രിയുടെ ഭാര്യ സോഫിയ ഗ്രെഗോയര്‍, മകള്‍ എല്ല ക്രെയ്‌സ്, സേവ്യര്‍ ജയിംസ്, ഹാഡ്രിന്‍ എന്നിവര്‍ ഒരാഴ്ചത്തെ സന്ദര്‍ശനത്തിന് ശനിയാഴ്ചയാണ് ഡെല്‍ഹിയില്‍ എത്തിയത്.

ഇന്ത്യന്‍ ശൈലിയിലുള്ള വസ്ത്രങ്ങള്‍ ധരിച്ച ജസ്റ്റിന്‍ ട്രൂഡും കുടുംബവും ഷാരൂഖ് ഖാനുമൊത്തുനില്‍ക്കുന്ന ചിത്രങ്ങള്‍ ദേശീയ മാധ്യമങ്ങളാണ് പുറത്ത് വിട്ടത്. പ്രധാനമന്ത്രി ഒരു ഷെര്‍വാണിയും ഭാര്യ വെള്ള നിറത്തിലുള്ള ഇന്ത്യന്‍ സാരിയുമാണ് ധരിച്ചിരിക്കുന്നത്. ആഗ്രയിലെ താജ്മഹല്‍ സന്ദര്‍ശിച്ചാണ് ട്രൂഡ് ഇന്ത്യന്‍ സന്ദര്‍ശനത്തിന് തുടക്കം കുറിച്ചത്. പിന്നീട് ഗുജറാത്തിലെ സബര്‍മതി ആശ്രമവും ട്രൂഡ് സന്ദര്‍ശിച്ചിരുന്നു.


അതേസമയം ഇന്ത്യയില്‍ ആദ്യ ഔദ്യോഗിക സന്ദര്‍ശനത്തിനെത്തിയ കാനഡ പ്രധാനമന്ത്രിയേയും കുടുംബത്തേയും കേന്ദ്ര സര്‍ക്കാര്‍ എല്ലാതരത്തിലും അവഗണിച്ചിരുന്നു. ശനിയാഴ്ച രാത്രി ഡെല്‍ഹിയിലെത്തിയ അദ്ദേഹത്തെ സ്വീകരിക്കാന്‍ പ്രധാനമന്ത്രി നരേന്ദ്ര മോഡി എത്തിയിരുന്നില്ല. മോഡിക്ക് പകരം കേന്ദ്ര കാര്‍ഷിക സഹമന്ത്രി ഗജേന്ദ്ര ഷെഖാവത്താണ് ട്രൂഡിനെ സ്വീകരിച്ചത്.