ചെന്നൈ: (KVARTHA) മാമന്നന് ശേഷം സുധീഷ് ശങ്കർ സംവിധാനം ചെയ്യുന്ന പുതിയ ചിത്രം മാരിചനിലൂടെ ഫഹദ് ഫാസിലും വടിവേലുവും വീണ്ടും ഒന്നിക്കുകയാണ്. ജാതിരാഷ്ട്രീയം പ്രമേയമായ 'മാമന്നൻ' എന്ന ഗൗരവമുള്ള ചിത്രത്തിൽ നിന്ന് വ്യത്യസ്തമായി, 'മാരിചൻ' ഒരു റോഡ് മൂവി ആയിരിക്കുമെന്നാണ് അണിയറക്കാർ പറയുന്നത്. രണ്ടുപേരുടെയും ഒരുമിച്ചുള്ള യാത്രയും അതിൽ നടക്കുന്ന സംഭവവികാസങ്ങളുമാണ് ചിത്രത്തിൽ. ഈ ചിത്രത്തിന്റെ ആദ്യ പോസ്റ്റർ പുറത്തിറങ്ങിയിട്ടുണ്ട്. ദീപാവലി പ്രമാണിച്ച് ഇറങ്ങിയ ചിത്രത്തിന്‍റെ സ്പെഷല്‍ പോസ്റ്ററിൽ ഒരു പഴയ ബൈക്കിൽ യാത്ര ചെയ്യുന്ന ഫഹദിനെയും വടിവേലുവിനെയും കാണാം.

ഒരു സിനിമയുടെ വിജയത്തിൽ താരങ്ങളുടെ കൂട്ടുകെട്ട് വലിയ പങ്കു വഹിക്കാറുണ്ട്. കഴിഞ്ഞ വർഷം പുറത്തിറങ്ങിയ 'മാമന്നൻ' എന്ന ചിത്രം ഇതിന് നല്ല ഉദാഹരണമാണ്. വടിവേലു, ഉദയനിധി സ്റ്റാലിൻ, ഫഹദ് ഫാസിൽ എന്നീ മൂന്ന് പ്രതിഭകളും ഒന്നിച്ചെത്തിയ ഈ ചിത്രം പ്രേക്ഷകരുടെ ഹൃദയം കീഴടക്കിയിരുന്നു. പ്രത്യേകിച്ചും, ഫഹദ് ഫാസിലിന്റെ പ്രകടനം തമിഴ് സിനിമ പ്രേമികളെ അമ്പരപ്പിച്ചു. ഇപ്പോൾ, ഈ രണ്ട് താരങ്ങളെ വീണ്ടും ഒന്നിച്ച് കാണാൻ സിനിമാ പ്രേമികൾ ആകാംക്ഷയോടെ കാത്തിരിക്കുകയാണ്.

സൂപ്പർ ഗുഡ് ഫിലിംസ് നിർമ്മാണ കമ്പനിയുടെ ബാനറിൽ ആർ ബി ചൗധരി നിർമ്മിക്കുന്ന 'മാരിചൻ' എന്ന ചിത്രത്തിന്റെ സംവിധാനം സുധീഷ് ശങ്കർ നിർവഹിക്കുന്നു. നേരത്തെ തമിഴിൽ 'ആറുമനമേ' എന്നും മലയാളത്തിൽ ദിലീപ് നായകനായ 'വില്ലാളി വീരൻ' എന്നീ ചിത്രങ്ങൾ സംവിധാനം ചെയ്തത് സുധീഷ് ശങ്കർ തന്നെയാണ്. നിരവധി ഹിറ്റുകൾ സമ്മാനിച്ചിട്ടുള്ള സൂപ്പർ ഗുഡ് ഫിലിംസിന്റെ 98-ാം ചിത്രമാണ് 'മാരിചൻ'. ഈ ചിത്രത്തിന്റെ ഛായാഗ്രഹണം കലൈസെൽവൻ ശിവജിയും എഡിറ്റിംഗ് ശ്രീജിത്ത് സാരംഗും നിർവഹിക്കുന്നു. സംഗീതം ഒരുക്കുന്നത് പ്രശസ്ത സംഗീത സംവിധായകൻ യുവൻ ശങ്കർ രാജാണ്.

#FahadhFaasil #Vadivelu #Maarichan #TamilCinema #RoadMovie #SuperGoodFilms