വിദേശ നാണയവിനിമയ ചട്ട ലംഘനം: ഐശ്വര്യാ റായ് ബചനെ ഇ ഡി ചോദ്യം ചെയ്തു

വിദേശരാജ്യങ്ങളില്‍ രഹസ്യനിക്ഷേപം നടത്തിയെന്ന ആരോപണത്തെ കുറിച്ചാണ് ഐശ്വര്യയോട് ഇ ഡി വിവരങ്ങള്‍ ആരാഞ്ഞതെന്നാണ് വിവരം. ബോളിവുഡ് താരം അമിതാഭ് ബചന്റെ മരുമകള്‍ കൂടിയായ ഐശ്വര്യക്ക് മുന്‍പ് രണ്ടുതവണ ഇ ഡി സമന്‍സ് അയച്ചിരുന്നുവെങ്കിലും ഹാജരാകാന്‍ താരം കൂടുതല്‍ സമയം ആവശ്യപ്പെടുകയായിരുന്നു.

വിദേശ നാണയവിനിമയ ചട്ട ലംഘനങ്ങളെ കുറിച്ചുള്ള ആരോപണങ്ങളില്‍ 2017-ലാണ് ഇ ഡി അന്വേഷണം ആരംഭിച്ചത്. തുടര്‍ന്ന് 2004 മുതലുള്ള വിദേശ നിക്ഷേപങ്ങള്‍ സംബന്ധിച്ച വിവരങ്ങള്‍ വിശദീകരിക്കണമെന്ന് ആവശ്യപ്പെട്ട് ബചന്‍ കുടുംബത്തിന് ഇ ഡി നോടിസ് അയച്ചിരുന്നു. കഴിഞ്ഞ 15 കൊല്ലത്തിനിടെ തനിക്ക് ലഭിച്ച വിദേശവരുമാനത്തെ കുറിച്ചുള്ള വിവരങ്ങള്‍ ഐശ്വര്യ ഇതിനകം തന്നെ ഇഡിക്ക് മുന്നില്‍ ഹാജരാക്കിയെന്നാണ് വിവരം.

2016-ലാണ് പനാമ പേപെറുകള്‍ പുറത്തെത്തുന്നത്. ലോകത്തെ അതിസമ്പന്നര്‍ നികുതിവെട്ടിക്കാനായി കടലാസു കമ്പനികളിലൂടെയും മറ്റും വിദേശത്ത് നിക്ഷേപം നടത്തിയെന്ന ആരോപണമാണ് ഇതിലൂടെ പുറത്തെത്തിയത്. രാഷ്ട്രീയക്കാര്‍, വ്യവസായികള്‍, സെലിബ്രിറ്റികള്‍ തുടങ്ങിയവരുടെ ഇത്തരം നിക്ഷേപങ്ങളെ കുറിച്ചുള്ള വിവരങ്ങള്‍ പുറത്തെത്തിച്ചത് അന്വേഷണാത്മക മാധ്യമ പ്രവര്‍ത്തകരുടെ അന്താരാഷ്ട്ര കൂട്ടായ്മയാണ്.