ഇന്ത്യയെ തകര്‍ക്കാന്‍ ആഗ്രഹിക്കുന്നവര്‍ക്കൊപ്പമാണ് അവര്‍ നില്‍ക്കുന്നത്; 2011 മുതല്‍ അവരുടെ രാഷ്ട്രീയ ബന്ധം വ്യക്തമാണ്; ജെ എന്‍ യു ക്യാംപസില്‍ സന്ദര്‍ശനം നടത്തിയ നടി ദീപിക പദുക്കോണിനെ വിമര്‍ശിച്ച് കേന്ദ്രമന്ത്രി സ്മൃതി ഇറാനി

ചെന്നൈ: (www.kvartha.com 10.01.2020) ജെ എന്‍ യു ക്യാംപസില്‍ സമരക്കാര്‍ക്ക് പിന്തുണ അറിയിച്ച് സന്ദര്‍ശനം നടത്തിയ നടി ദീപിക പദുക്കോണിനെ രൂക്ഷമായി വിമര്‍ശിച്ച് കേന്ദ്രമന്ത്രി സ്മൃതി ഇറാനി രംഗത്ത്. ഇന്ത്യയെ തകര്‍ക്കാന്‍ ആഗ്രഹിക്കുന്നവര്‍ക്കൊപ്പമാണ് ദീപിക നില്‍ക്കുന്നതെന്ന് പറഞ്ഞ സ്മൃതി 2011 മുതല്‍ അവരുടെ രാഷ്ട്രീയ ബന്ധം വ്യക്തമാണെന്നും കോണ്‍ഗ്രസിനെ പിന്തുണയ്ക്കുകയാണ് ദീപികയെന്നും കുറ്റപ്പെടുത്തി.

മുന്‍പ് ഒരു അഭിമുഖത്തില്‍ രാഹുല്‍ ഗാന്ധിയെ പ്രധാനമന്ത്രി സ്ഥാനത്തേക്ക് പിന്തുണയ്ക്കുന്നുവെന്ന് ദീപിക പറയുന്നത് ചൂണ്ടിക്കാട്ടിയാണ് സ്മൃതി ഇറാനിയുടെ ഈ വിമര്‍ശനം. 'വാര്‍ത്ത വായിക്കുന്നവര്‍ക്ക് എല്ലാം മനസ്സിലാകും, നിങ്ങള്‍ എവിടെയാണ് നിലനില്‍ക്കുന്നതെന്നും. ഓരോ സി ആര്‍ പി എഫ് ജവാനും കൊല്ലപ്പെടുമ്പോള്‍ ആഘോഷിക്കുന്നവര്‍ക്കൊപ്പമാണ് നിങ്ങള്‍ നില്‍ക്കുന്നത്. അത്തരക്കാര്‍ക്കൊപ്പം നില്‍ക്കാന്‍ നിങ്ങള്‍ക്ക് അവകാശമുണ്ട്' എന്നും കേന്ദ്രമന്ത്രി വിമര്‍ശിച്ചു.


ജെ എന്‍ യുവില്‍ ഞായറാഴ്ചയുണ്ടായ അതിക്രമത്തില്‍ പരിക്കേറ്റ വിദ്യാര്‍ത്ഥികള്‍ക്കും അധ്യാപകര്‍ക്കും പിന്തുണ പ്രഖ്യാപിച്ചാണ് ദീപിക ചൊവ്വാഴ്ച ക്യാംപസില്‍ എത്തിയത്. എന്നാല്‍ അവരുടെ പുതിയ സിനിമയുടെ പ്രോമോഷന് വേണ്ടിയാണിതെന്ന ആരോപണം ഒരുവിഭാഗം ഉയര്‍ത്തുന്നുണ്ട്.