കണ്ണൂര്‍ ജില്ലാ പഞ്ചായത്ത് ഓഫീസില്‍ സിനിമാ ഷൂട്ടിംഗ്; ആവശ്യങ്ങള്‍ നിറവേറ്റാന്‍ എത്തിയ പൊതുജനം പെരുവഴിയില്‍

കണ്ണൂര്‍: (www.kvartha.com 23.03.2018) കണ്ണൂര്‍ ജില്ലാ പഞ്ചായത്ത് ഓഫീസില്‍ സിനിമാ ഷൂട്ടിംഗ് നടക്കുന്നതിനാല്‍ വിവിധ ആവശ്യങ്ങള്‍ നിറവേറ്റാന്‍ എത്തിയ പൊതുജനം പെരുവഴിയിലായി. വെള്ളിയാഴ്ച രാവിലെ പത്തുമണിക്ക് തന്നെ വിവിധ ആവശ്യങ്ങളുമായി ജില്ലാ പഞ്ചായത്ത് ഓഫീസിനു മുന്നിലെത്തിയവര്‍ക്ക് ഷൂട്ടിംഗ് കാരണം ഉച്ചയായിട്ടും അകത്തുകയറാനാവാതെ പുറത്തുനില്‍ക്കേണ്ട അവസ്ഥയാണ് വന്നിരിക്കുന്നത്.

സാമ്പത്തികവര്‍ഷം അവസാനിക്കുന്നതിനു തൊട്ടുമുന്‍പുള്ള ആഴ്ചയിലെ പ്രവര്‍ത്തിദിവസം തന്നെ ജില്ലാ പഞ്ചായത്ത് ഓഫീസ് സിനിമാ ചിത്രീകരണത്തിനായി വിട്ടുനല്‍കിയതിനെതിരെ വ്യാപക പ്രതിഷേധമുയര്‍ന്നിട്ടുണ്ട്.


സുജിത് വാസുദേവ് സംവിധാനം ചെയ്യുന്ന 'ഓട്ടോറിക്ഷ' എന്ന സിനിമയുടെ ചിത്രീകരണമാണു കണ്ണൂരില്‍ നടക്കുന്നത്. ഒരു ദിവസത്തെ ചിത്രീകരണമാണു ജില്ലാ പഞ്ചായത്ത് കെട്ടിടത്തിലുള്ളത്. ഇതിനായി ജില്ലാ പഞ്ചായത്ത് കെട്ടിടത്തിന്റെ താഴത്തെ നില പൂര്‍ണമായും സിനിമാസംഘത്തിനു വിട്ടുനല്‍കി. എഞ്ചിനീയറിങ് വിഭാഗം ഒഴികെ ജില്ലാ പഞ്ചായത്തിലെ പ്രധാന ഓഫീസുകളെല്ലാം പ്രവര്‍ത്തിക്കുന്ന ഭാഗമാണു ചിത്രീകരണത്തിനായി നല്‍കിയത്.