'അജഗജാന്തരം' ആദ്യമെത്തും; തിയറ്ററുകൾ തുറക്കാൻ കാത്തിരിപ്പോടെ ആരാധകർ

കൊച്ചി: (www.kvartha.com 05.10.2021) കോവിഡ് രണ്ടാം തരംഗത്തിന് ശേഷം 50 ശതമാനം പ്രവേശനമടക്കമുള്ള കോവിഡ് മാനദണ്ഡങ്ങള്‍ പാലിച്ചുകൊണ്ട് ഒക്ടോബർ 25നാണ് സംസ്ഥാനത്ത് തിയറ്ററുകള്‍ തുറക്കുക. തിയറ്ററുകള്‍ തുറന്നാലുടനെ മലയാളത്തില്‍ നിന്നെത്തുന്ന ആദ്യ റിലീസ് ടിനു പാപ്പച്ചന്‍റെ സംവിധാനത്തില്‍ ആന്‍റണി വര്‍ഗീസ് നായകനാവുന്ന 'അജഗജാന്തരം' ആണെന്നാണ് റിപോർടുകൾ.

റിലീസ് തീയതി പ്രഖ്യാപിച്ചിട്ടില്ലെങ്കിലും ചിത്രം പൂജ റിലീസ് ആയി എത്തുമെന്ന് നിര്‍മാതാക്കള്‍ നേരത്തെ പ്രഖ്യാപിച്ചിരുന്നു. എന്നാല്‍ പൂജ അവധി ദിനങ്ങള്‍ക്ക് ശേഷം മാത്രമേ കേരളത്തിലെ തിയറ്ററുകള്‍ തുറക്കൂ. സര്‍കാരിന്‍റെ പ്രഖ്യാപനത്തിന് മുന്‍പായിരുന്നു ചിത്രം പൂജ റിലീസ് ആയിരിക്കുമെന്ന അണിയറക്കാരുടെ പ്രഖ്യാപനം വന്നത്.

എന്നിരുന്നാലും മലയാളത്തിലെ ആദ്യ റിലീസ് ഈ ചിത്രം തന്നെയായിരിക്കുമെന്നാണ് ട്രേഡ് അനലിസ്റ്റുകളും അഭിപ്രായപ്പെടുന്നത്. തിയറ്റര്‍ തുറന്ന ശേഷമുള്ള ആദ്യ വെള്ളിയാഴ്ചയായ 29ന് തന്നെ ചിത്രം എത്തിയേക്കുമെന്ന് ട്രേഡ് അനലിസ്റ്റ് ശ്രീധര്‍ പിള്ള ട്വീറ്റ് ചെയ്‍തു.