നടി താര കല്ല്യാണിന്റെ ഭര്‍ത്താവ് ഡെങ്കിപ്പനി ബാധിച്ച് ഗുരുതരാവസ്ഥയില്‍

കൊച്ചി: (www.kvartha.com 29.07.2017) പ്രശസ്ത നര്‍ത്തകിയും നടിയുമായ താര കല്ല്യാണിന്റെ ഭര്‍ത്താവ് രാജാറാമിന്റെ നില അതീവഗുരുതരം. ഡെങ്കിപ്പനി ബാധിച്ച് ചികിത്സയില്‍ കഴിയുന്ന രാജാറാമിന്റെ ജീവന്‍ വെന്റിലേറ്ററിന്റെ സഹായത്തോടെയാണ് നിലനിര്‍ത്തുന്നത്.


ഡെങ്കിപനി ബാധിച്ച് ഇടപ്പള്ളി അമൃത ആശുപത്രിയില്‍ പ്രവേശിപ്പിച്ച രാജാറാമിനെ ശ്വാസകോശത്തില്‍ അണുബാധയെ തുടര്‍ന്ന് ജൂലൈ 22 നാണ് കാര്‍ഡിയാക് ഐസിയുവിലേക്ക് മാറ്റുന്നത്. തുടര്‍ന്ന് നില വഷളായതിനെത്തുടര്‍ന്ന് ഇക്‌മോയുടെ സഹായത്തോടെയാണ് ഹൃദയത്തിന്റെ പ്രവര്‍ത്തനം നടത്തുന്നത്. കാര്‍ഡിയോളജിസ്റ്റ് ഡോ. പ്രവീണ്‍ വര്‍മയുടെ നേതൃത്വത്തിലുള്ള വിദഗ്ദ്ധസംഘമാണ് രാജാറാമിനെ ചികിത്സിക്കുന്നത്.

പ്രശസ്ത നൃത്ത അധ്യാപകനായ രാജാറാം സിനിമയിലും സീരിയലിലും ശ്രദ്ധേയ വേഷങ്ങള്‍ കൈകാര്യം ചെയ്തിട്ടുണ്ട്. പ്രാദേശിക ചാനലുകളില്‍ അവതാരകനായിരുന്നു ഏറെക്കാലം. മലയാള ചിത്രങ്ങളില്‍ ജൂനിയര്‍ ആര്‍ട്ടിസ്റ്റായി സിനിമ ജീവിതം ആരംഭിച്ച രാജാറാം കൊറിയോ ഗ്രാഫര്‍, ചാനല്‍ അവതാരകന്‍ എന്നീ മേഖലയിലും ശ്രദ്ധേയനായി.