അവസരവാദി, നിങ്ങളെ പോലുള്ളവര്‍ കാരണമാണ് ആളുകള്‍ സിനിമാക്കാരെ പരിഹസിക്കുന്നത്; കോണ്‍ഗ്രസ് വിട്ട് ബി ജെ പിയില്‍ ചേര്‍ന്ന ഖുശ് ബുവിനെതിരെ വിമര്‍ശനവുമായി നടി രഞ്ജിനി

ചെന്നൈ: (www.kvartha.com 13.10.2020) കോണ്‍ഗ്രസ് വിട്ട് ബി ജെ പിയില്‍ ചേര്‍ന്ന ഖുശ് ബുവിനെതിരെ വിമര്‍ശനവുമായി നടി രഞ്ജിനി. തുടര്‍ച്ചയായി പാര്‍ട്ടി വിടുന്നതിലൂടെ അവസരവാദിയാണ് താനെന്ന് ഖുശ് ബു തെളിയിച്ചിരിക്കുന്നതായും സിനിമാ മേഖലക്കാകെ നാണക്കേടുണ്ടാക്കിയതായും രഞ്ജിനി പ്രതികരിച്ചു. തന്റെ ഫേസ്ബുക്ക് പോസ്റ്റിലൂടെയാണ് രഞ്ജിനി ഖുശ് ബുവിനെതിരെ തിരിഞ്ഞത്. 



ഖുശ് ബു സി പി ഐ എമ്മില്‍ ചേരുമെന്ന് പ്രതീക്ഷിക്കുന്നതിലും അത് ഭുതമൊന്നുമില്ല. രാഷ്ട്രീയമെന്നത് ക്ഷമയും നയചാതുര്യവും അതിനേക്കാളുമുപരി ആദര്‍ശവുമാണ്. അല്ലാതെ നിങ്ങളുടെ ആഗ്രഹങ്ങള്‍ക്കനുസരിച്ചുള്ള പദവി ഉറപ്പിക്കലല്ല.

പ്രധാനമന്ത്രിയെയും അദ്ദേഹത്തിന്റെ പാര്‍ട്ടിയെയും നിരന്തരം കുറ്റപ്പെടുത്തിയിരുന്ന താങ്കള്‍ ഇന്നലെ മോദിയെ സ്തുതിച്ചത് നിരാശാജനകമാണ്. ഇന്ത്യയെ നയിക്കാന്‍ അനുയോജ്യനായ ഒരേ ഒരു വ്യക്തി മോദിയാണെന്ന സ്തുതി താങ്കള്‍ ഒരു അവസരവാദിയാണെന്നല്ലേ കാണിക്കുന്നത്.

അപക്വമായ പ്രസ്താവനകളുടെ പേരില്‍ മറ്റു മേഖലയിലുള്ളവര്‍ സിനിമാക്കാരെ പരിഹസിക്കുന്നതില്‍ ആശ്ചര്യമില്ലെന്ന് ഖുശ് ബു സ്ഥിരീകരിച്ചിരിക്കുന്നു. നിങ്ങളുടെ സ്വാര്‍ത്ഥത സിനിമാ മേഖലക്കൊന്നാകെ നാണക്കേട് ഉണ്ടാക്കിയിരിക്കുന്നു' - രഞ് ജിനി ഫേസ്ബുക്കില്‍ കുറിച്ചു.

നരേന്ദ്ര മോദിക്കെതിരെയും സംഘ് പരിവാറിനെതിരെയും രൂക്ഷ വിമര്‍ശനങ്ങള്‍ ഉയര്‍ത്തിയിരുന്ന ഖുശ് ബു തിങ്കളാഴ്ചയാണ് ബിജെപിയില്‍ ചേര്‍ന്നത്. എന്നാല്‍ പ്രധാനമന്ത്രിക്കെതിരെയുള്ള വിമര്‍ശനങ്ങള്‍ പിന്‍വലിക്കുകയില്ലെന്നും പ്രതിപക്ഷത്ത് നില്‍ക്കുമ്പോള്‍ തന്റെ ജോലി അതായിരുന്നെന്നും ഖുശ്ബു പ്രതികരിച്ചു. ബിജെപി നേതാക്കള്‍ അഴിമതിയുടെ കറ പുരളാത്തവരാണെന്നും ഖുശ് ബു കൂട്ടിച്ചേര്‍ത്തിരുന്നു.