മോഹൻലാൽ എത്തുന്നു; ബിഗ് ബോസ് സീസൺ 7-ൽ '17-ന്റെ പണി' തുടങ്ങുന്നു!

(KVARTHA) ഇന്ത്യൻ ടെലിവിഷൻ ചരിത്രത്തിലെ ഏറ്റവും വലിയ റിയാലിറ്റി ഷോകളിലൊന്നായ ബിഗ് ബോസിന്റെ മലയാളം പതിപ്പിന് ആറ് വിജയകരമായ സീസണുകൾക്ക് ശേഷം, ഏഴാം സീസണിന് ഞായറാഴ്ച  തിരശ്ശീല ഉയരും. പ്രേക്ഷകർ ഏറെ ആകാംഷയോടെ കാത്തിരിക്കുന്ന ബിഗ് ബോസ് മലയാളം സീസൺ 7, ഇന്ന് വൈകുന്നേരം 7 മണി മുതൽ ഏഷ്യാനെറ്റിലും ജിയോ ഹോട്സ്റ്റാറിലും സംപ്രേക്ഷണം ചെയ്യും.

വർണ്ണശബളമായ ഉദ്ഘാടനച്ചടങ്ങിൽ, പ്രിയങ്കരനായ അവതാരകൻ മോഹൻലാൽ തിരഞ്ഞെടുക്കപ്പെട്ട മത്സരാർത്ഥികളെ ബിഗ് ബോസ് വീട്ടിലേക്ക് സ്വാഗതം ചെയ്യും. ഈ സീസണിൽ ആരൊക്കെയാകും മാറ്റുരയ്ക്കാൻ എത്തുക എന്നറിയാനുള്ള ആകാംഷയിലാണ് പ്രേക്ഷകർ. മുൻ സീസണുകളിൽ നിന്ന് വ്യത്യസ്തമായി, നിരവധി പുതുമകളുമായാണ് ബിഗ് ബോസ് സീസൺ 7 എത്തുന്നത് എന്നാണ് ഇതുവരെ പുറത്തുവന്ന വിവരങ്ങൾ സൂചിപ്പിക്കുന്നത്.

പുതിയ തന്ത്രങ്ങളും വെല്ലുവിളികളും

മുൻ സീസണുകളിൽ കണ്ടിരുന്ന സ്ട്രാറ്റജികൾ, ഫേക്ക് കാർഡ്, സേഫ് കാർഡ്, സോപ്പിംഗ് കാർഡ്, നന്മ കാർഡ്, ഒളിക്കൽ കാർഡ്, പ്രിപ്പയർ കാർഡ്, വിക്റ്റിം കാർഡ് എന്നിവയെല്ലാം ഈ സീസണിൽ ഉണ്ടാകില്ലെന്ന് ഉറപ്പാണ്. ഇത് മത്സരം കൂടുതൽ തീവ്രമാക്കുമെന്നും മത്സരാർത്ഥികൾക്ക് സ്വന്തം വ്യക്തിത്വം പുറത്തെടുക്കാൻ കൂടുതൽ അവസരം ലഭിക്കുമെന്നും പ്രതീക്ഷിക്കുന്നു. 

മുൻ സീസണുകളേക്കാൾ വ്യത്യസ്തമായ ടാസ്ക്കുകളും അവതരണത്തിലെ പുത്തൻ മാറ്റങ്ങളുമായി മോഹൻലാലും എത്തുമെന്ന പ്രൊമോ വീഡിയോകൾ പ്രേക്ഷകർക്ക് വലിയ ആവേശം നൽകിയിരുന്നു. ബിഗ് ബോസ് പ്രേക്ഷകർക്ക് എന്തെല്ലാമാണ് ഇത്തവണ കാത്തിരിക്കുന്നത് എന്ന് കണ്ടറിയണം.

എന്താണ് ബിഗ് ബോസ് ഷോ?

വിവിധ മേഖലകളിൽ നിന്നും വ്യത്യസ്ത സാഹചര്യങ്ങളിൽ നിന്നുമുള്ള ഒരു കൂട്ടം മത്സരാർത്ഥികളെ 100 ദിവസത്തേക്ക് ഒരു വീട്ടിൽ ഒരുമിച്ച് താമസിപ്പിക്കുന്ന റിയാലിറ്റി ഷോയാണ് ബിഗ് ബോസ്. ഈ ബിഗ് ബോസ് ഹൗസിനുള്ളിൽ പുറം ലോകവുമായി യാതൊരു ബന്ധവും മത്സരാർത്ഥികൾക്ക് ഉണ്ടായിരിക്കില്ല. 

ഫോൺ, ക്ലോക്ക്, പത്രം, ടിവി തുടങ്ങിയ ഒരുവിധ ആശയവിനിമയ ഉപാധികളും ഹൗസിൽ അനുവദനീയമല്ല. മത്സരാർത്ഥികൾക്ക് പുറമെ നിന്ന് ഒരാളുമായി സംവദിക്കണമെങ്കിൽ അത് അവതാരകനായ മോഹൻലാലുമായി മാത്രമായിരിക്കും.

ഷോയിലുള്ള എല്ലാ മത്സരാർത്ഥികൾക്കും വ്യക്തിഗതമായും ഗ്രൂപ്പായും ബിഗ് ബോസ് വിവിധ ടാസ്ക്കുകൾ നൽകും. ബിഗ് ബോസ് ഹൗസിലെ എല്ലാ ജോലികളും മത്സരാർത്ഥികൾ സ്വയം ചെയ്യണം. ഓരോ ആഴ്ചയും മികച്ച പ്രകടനം കാഴ്ചവെക്കുന്ന ഒരാൾ ടാസ്കുകളിൽ വിജയിച്ച് ക്യാപ്റ്റനാകും. ഈ ക്യാപ്റ്റന് ആ ആഴ്ചയിലെ ബിഗ് ബോസ് വീട്ടിൽ എല്ലാ അധികാരങ്ങളുമുണ്ടാകും. 

വ്യത്യസ്ത സ്വഭാവക്കാരായ ആളുകൾ ഒരുമിച്ച് താമസിക്കുമ്പോൾ പ്രശ്നങ്ങളും തർക്കങ്ങളും ബിഗ് ബോസ് വീട്ടിൽ സാധാരണമാണ്. ടാസ്ക്കുകളും പ്രതിസന്ധികളും എല്ലാം അതിജീവിച്ച്, ബുദ്ധിയും ശക്തിയും ഉപയോഗിച്ച്, പ്രേക്ഷക പിന്തുണയോടെ 100 ദിവസം ബിഗ് ബോസ് ഹൗസിൽ നിൽക്കുന്ന ഒരാളാണ് ടൈറ്റിൽ വിന്നറാകുന്നത്.

ആരൊക്കെയാകും മത്സരാർത്ഥികൾ?

സിനിമ, സീരിയൽ, സംഗീതം, കായികം, ഫാഷൻ, എൽജിബിടിക്യു+ കമ്മ്യൂണിറ്റി, സോഷ്യൽ മീഡിയ താരങ്ങൾ തുടങ്ങി വിവിധ മേഖലകളിൽ നിന്നുള്ള തിരഞ്ഞെടുക്കപ്പെട്ട മത്സരാർത്ഥികളാണ് ഓരോ ബിഗ് ബോസ് സീസണുകളിലും മാറ്റുരയ്ക്കുന്നത്. ഈ സീസൺ ഉൾപ്പെടെയുള്ള മൂന്ന് സീസണുകളിലായി സാധാരണ ജനങ്ങളിൽ നിന്ന് തിരഞ്ഞെടുക്കപ്പെട്ട ഒന്നോ അതിലധികമോ കോമണർ മത്സരാർത്ഥികളും ഇവർക്കൊപ്പം ഷോയിലുണ്ടാകും. ഷോ മുന്നോട്ട് പോകുന്തോറും വൈൽഡ് കാർഡ് എൻട്രിയായി പുതിയ മത്സരാർത്ഥികളും ബിഗ് ബോസ് വീട്ടിലേക്ക് എത്താറുണ്ട്.

എവിക്ഷനും പ്രേക്ഷക വോട്ടിംഗും

ബിഗ് ബോസ് മത്സരാർത്ഥികൾ ഏറെ ആകാംഷയോടെയും നെഞ്ചിടിപ്പോടെയും കാത്തിരിക്കുന്ന ഘട്ടമാണ് എവിക്ഷനും വോട്ടിംഗും. എല്ലാ ആഴ്ചകളിലും ശനി, ഞായർ ദിവസങ്ങളിലാണ് ബിഗ് ബോസിൽ എവിക്ഷൻ നടക്കുന്നത്. മത്സരാർത്ഥികൾ തങ്ങൾക്ക് എതിരാളികളാണെന്ന് തോന്നുന്നവരെ നോമിനേറ്റ് ചെയ്യും. 

ഇതിൽ ഏറ്റവും കൂടുതൽ നോമിനേഷൻ ലഭിക്കുന്നവരെ പ്രേക്ഷക വോട്ടിംഗിനായി തിരഞ്ഞെടുക്കും. ആര് ബിഗ് ബോസിൽ തുടരണം, ആര് പുറത്തുപോകണം എന്നതിലുള്ള അന്തിമ തീരുമാനം ഈ പ്രേക്ഷക വോട്ടിംഗിനെ ആശ്രയിച്ചിരിക്കും. ഓരോ ആഴ്ചയിലും ഒരാളോ അതിൽ കൂടുതൽ പേരോ ബിഗ് ബോസ് വീട്ടിൽ നിന്ന് പുറത്താക്കപ്പെടും.

ബിഗ് ബോസ് ഷോയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക 

Article Summary: Bigg Boss Malayalam Season 7 starts today with Mohanlal as host.

#BiggBossMalayalam #BBMS7 #Mohanlal #Asianet #RealityShow #BiggBoss