'അനോമി'യിൽ നിന്ന് സി ജെ റോയ് പിന്മാറിയതല്ല, പുതിയ നിർമ്മാതാക്കൾ വന്നപ്പോൾ പണം തിരികെ നൽകി; വെളിപ്പെടുത്തലുമായി ഭാവന

കൊച്ചി: (KVARTHA) ഭാവനയുടെ കരിയറിലെ തൊണ്ണൂറാം ചിത്രമെന്ന വിശേഷണത്തോടെയെത്തിയ 'അനോമി' മികച്ച പ്രേക്ഷക പ്രതികരണങ്ങളോടെ തിയേറ്ററുകളിൽ മുന്നേറുകയാണ്. സൈ-ഫൈ ത്രില്ലർ ഗണത്തിൽപ്പെടുന്ന ചിത്രം കഴിഞ്ഞ ദിവസമാണ് റിലീസ് ചെയ്തത്. 

ചിത്രത്തിന്റെ നിർമ്മാണ പങ്കാളിത്തത്തിൽ നിന്ന് അന്തരിച്ച വ്യവസായിയും കോൺഫിഡന്റ് ഗ്രൂപ്പ് ഉടമയുമായ സി.ജെ റോയ് മാറിയതുമായി ബന്ധപ്പെട്ട അഭ്യൂഹങ്ങളിൽ വ്യക്തത വരുത്തിയിരിക്കുകയാണ് നടി ഭാവന.

സി.ജെ റോയ് ചിത്രത്തിൽ നിന്ന് സ്വമേധയാ പിന്മാറിയതല്ലെന്നും, നിർമ്മാണ ഘട്ടത്തിൽ വമ്പൻ കമ്പനികൾ കടന്നുവന്നപ്പോൾ സ്വാഭാവികമായി സംഭവിച്ച മാറ്റമാണിതെന്നും ഭാവന പറഞ്ഞു. 'എഡിറ്റോറിയലി'ന് നൽകിയ അഭിമുഖത്തിലാണ് താരം ഇക്കാര്യം വെളിപ്പെടുത്തിയത്. ബോളിവുഡിലെ പ്രമുഖ പ്രൊഡക്ഷൻ കമ്പനിയായ ടി-സീരീസ്, പനോരമ സ്റ്റുഡിയോസ് എന്നിവർക്കൊപ്പം ഭാവനയും ചിത്രത്തിന്റെ നിർമ്മാണ പങ്കാളിയാണ്.

ഭാവനയുടെ വാക്കുകൾ:

‘അനോമിയിൽ നിന്ന് സി.ജെ റോയ് പിന്മാറിയതല്ല. 2025-ലാണ് റോയ് സാർ ഈ ചിത്രത്തിന്റെ നിർമ്മാണ സംഘത്തിൽ ചേരുന്നത്. അപ്പോൾ തന്നെ ബ്ലിറ്റ്സ് ക്രീ​ഗ് ഫിലിംസും എപികെ സിനിമയും ഞാനും പ്രൊഡക്ഷന്റെ ഭാഗമായിരുന്നു. 

റോയ് സാർ ഈ ചിത്രത്തിൽ ഒരു തുക ഇൻവെസ്റ്റ് ചെയ്തിരുന്നു. പിന്നീട് പനോരമയും ടി-സീരീസും നിർമ്മാതാക്കളായി എത്തിയപ്പോൾ, അവർക്ക് വലിയ ഷെയർ ആവശ്യമായി വന്നു. അതിന്റെ ഭാഗമായി ചില ഇൻവസ്റ്റേഴ്സിനെ ബൈഔട്ട് ചെയ്യുകയായിരുന്നു. അങ്ങനെ റോയ് സാർ നിക്ഷേപിച്ച പണം തിരികെ നൽകി, അദ്ദേഹം പ്രൊഡക്ഷനിൽ നിന്ന് ഒഴിവായി.’

തുടക്കത്തിൽ നിർമ്മാണത്തിലുണ്ടായിരുന്ന സി.ജെ റോയ്‌യുടെ പേര് പിന്നീട് ഒഴിവാക്കപ്പെട്ടത് എന്തുകൊണ്ടാണെന്ന ചർച്ചകൾക്കുള്ള മറുപടിയായാണ് ഭാവനയുടെ ഈ വെളിപ്പെടുത്തൽ. വമ്പൻ ബാനറുകളുടെ കടന്നുവരവ് ചിത്രത്തിന് ഗുണകരമായെങ്കിലും, അത് നിർമ്മാണ പങ്കാളിത്തത്തിൽ ചില ക്രമീകരണങ്ങൾക്ക് കാരണമായെന്നാണ് ഭാവനയുടെ വാക്കുകൾ സൂചിപ്പിക്കുന്നത്.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Bhavana clarifies CJ Roy's removal from 'Anomi' production.

#Bhavana #AnomiMovie #CJRoy #MalayalamCinema #SciFiThriller #TSeries