രമേഷ് പിഷാരടിയെ കുറ്റപ്പെടുത്തിയിട്ടില്ല, വാര്‍ത്തകള്‍ വസ്തുതാവിരുദ്ധം; ‘അമ്മ’ നേതൃത്വത്തിനെതിരെ ഗുരുതര ആരോപണങ്ങളുമായി അന്‍സിബ ഹസ്സനും ഉഷാ ഹസീനയും

കൊച്ചി: (KVARTHA) നടന്‍ ടിനി ടോമുമായുള്ള വിഷയത്തില്‍ രമേഷ് പിഷാരടിയെ കുറ്റപ്പെടുത്തിയെന്ന രീതിയിൽ വരുന്ന വാര്‍ത്തകളോട് പ്രതികരിച്ച് നടി അന്‍സിബ ഹസ്സന്‍ രംഗത്ത്. അത്തരത്തിലുള്ള വാര്‍ത്തകള്‍ പൂര്‍ണ്ണമായും വസ്തുതാവിരുദ്ധമാണെന്ന് അന്‍സിബ പറഞ്ഞു. പ്രസ്തുത വിഷയത്തില്‍, ടിനി ടോം ആവശ്യപ്പെട്ട പ്രകാരം മാപ്പ് എഴുതി നല്‍കണമെന്ന കാര്യം തന്നെ അറിയിക്കുക മാത്രമാണ് രമേഷ് പിഷാരടി ചെയ്തതെന്ന് അന്‍സിബ ഫേസ്ബുക്കില്‍ പങ്കുവെച്ച വിശദീകരണ കുറിപ്പില്‍ വ്യക്തമാക്കി. 

ഒരു സഹപ്രവര്‍ത്തകന്‍ എന്ന നിലയിലും ജനപ്രതിനിധി എന്ന നിലയിലും ഈ വിഷയത്തില്‍ മധ്യസ്ഥം വഹിക്കാന്‍ അദ്ദേഹം എടുത്ത ആത്മാര്‍ത്ഥമായ ശ്രമങ്ങളെ താൻ പൂര്‍ണ്ണമായും മാനിക്കുന്നുവെന്നും അൻസിബ കൂട്ടിച്ചേർത്തു. വാർത്താസമ്മേളനത്തിൽ മാപ്പ് എഴുതി നൽകണമെന്ന് പിഷാരടി ആവശ്യപ്പെട്ടതിനെക്കുറിച്ച് 'ഇത് എവിടുത്തെ ന്യായമാണെന്നും വെള്ളരിക്കാപ്പട്ടണമാണോയെന്നും' താൻ ചോദിച്ചിരുന്നുവെങ്കിലും അദ്ദേഹത്തെ വ്യക്തിപരമായി കുറ്റപ്പെടുത്തിയിട്ടില്ലെന്നും ഇത്തരം തെറ്റിദ്ധാരണാജനകമായ വാര്‍ത്തകള്‍ പ്രചരിപ്പിക്കുന്നത് അവസാനിപ്പിക്കണമെന്നും അൻസിബ അഭ്യർത്ഥിച്ചു. എന്നാൽ ഇതോടൊപ്പം 'അമ്മ' സംഘടനയിലെ നേതൃത്വത്തിനെതിരെയും പോലീസിനെതിരെയും ഗുരുതരമായ ആരോപണങ്ങളാണ് അൻസിബയും ഉഷാ ഹസീനയും വാർത്താസമ്മേളനത്തിൽ ഉന്നയിച്ചത്.

സ്പോൺസർഷിപ്പ് തുകയിലെ അഴിമതിയാരോപണം

'അമ്മ' കുടുംബസംഗമവുമായി ബന്ധപ്പെട്ട സ്പോൺസർഷിപ്പ് കരാറിൽ പ്രസിഡന്റ് ശ്വേതാ മേനോനെതിരെ ഗുരുതര ആരോപണങ്ങളാണ് മുൻജോയിന്റ് സെക്രട്ടറിയായ അൻസിബ ഹസൻ ഉന്നയിച്ചത്. വെണ്ണല തെക്കാട്ട് ശ്രീ മഹാദേവ ക്ഷേത്രത്തിന്റെ സ്പോൺസർഷിപ്പ് എക്‌സിക്യൂട്ടീവ് കമ്മിറ്റിയിൽ അവതരിപ്പിച്ചത് ശ്വേതയായിരുന്നു. അന്ന് ഒരു കോടി രൂപയുടെ കരാറെന്നാണ് പറഞ്ഞിരുന്നതെങ്കിലും എഗ്രിമെന്റ് ആയപ്പോൾ അത് 75 ലക്ഷമായി മാറി. 

ബാക്കി 25 ലക്ഷം രൂപ എവിടെ പോയെന്ന് വ്യക്തതയില്ല. 32 വർഷമായി ഒരു മതസ്ഥാപനവും മതചിഹ്നവും കടന്നുകൂടാത്ത സംഘടനയിൽ ഒരു ക്ഷേത്രം വരികയാണെങ്കിൽ നാളെ മുസ്ലിം പള്ളിയും ക്രിസ്ത്യൻ പള്ളിയും രാഷ്ട്രീയ പാർട്ടികളും വരുമെന്ന് ചൂണ്ടിക്കാട്ടി താൻ ഇതിനെ എതിർത്തതുമുതൽ നേതൃത്വം തന്നോട് വൈരാഗ്യം കാണിക്കാൻ തുടങ്ങിയെന്ന് അൻസിബ ആരോപിച്ചു.

സ്ത്രീവിരുദ്ധ പരാമർശങ്ങൾക്കെതിരെ പ്രതികരണം

17 പേരടങ്ങുന്ന വാട്‌സാപ്പ് ഗ്രൂപ്പിൽ ടിനി ടോം തന്നെ 'ഡബിൾ ഡാഡി സിൻഡ്രോം' എന്ന് വിളിച്ച് അധിക്ഷേപിച്ചെന്നും, ഇത് സ്ത്രീവിരുദ്ധതയാണെന്ന് പറയാൻ അന്ന് പ്രസിഡന്റോ എക്സിക്യൂട്ടീവ് അംഗങ്ങളോ തയാറായില്ലെന്നും അൻസിബ കുറ്റപ്പെടുത്തി. പ്രിവിലേജുള്ള സ്ത്രീകൾ രക്ഷപ്പെടാൻ വേണ്ടിയല്ല വുമൺ കാർഡ് ഉപയോഗിക്കേണ്ടതെന്നും അർഹിക്കുന്ന പരിഗണന കിട്ടാത്ത സ്ത്രീകൾക്ക് വേണ്ടിയാവണം അതെന്നും അവർ പറഞ്ഞു. ടിനി ടോം പറഞ്ഞത് മോശമാണെന്ന് മറ്റൊരാളും പറഞ്ഞില്ലെന്നും ആരോപണവിധേയനായ വ്യക്തിയെ മാറ്റി നിർത്താൻ പോലും പ്രസിഡന്റ് തയാറായില്ലെന്നും അവർ വ്യക്തമാക്കി.

പോലീസിനെതിരെയും ഗുരുതര ആരോപണം

ലക്ഷ്മിപ്രിയക്കെതിരെ നൽകിയ പരാതിയിൽ പോലീസ് നടപടി എടുക്കുന്നില്ലെന്ന് അൻസിബ കുറ്റപ്പെടുത്തി. ആഭ്യന്തരമന്ത്രി രമേശ് ചെന്നിത്തല നേരിട്ട് വിളിച്ച് സംസാരിച്ചതിന് ശേഷമാണ് പോലീസ് പരാതിയുടെ രസീത് അയച്ചതെങ്കിലും എഫ്ഐആർ രജിസ്റ്റർ ചെയ്യാൻ തയാറായില്ല. 14 ദിവസം കൊണ്ട് പ്രാഥമിക അന്വേഷണം നടക്കട്ടെ എന്ന സിഐയുടെ മറുപടി നീതി നിഷേധമാണ്. 

ജിഹാദി എന്ന് തമാശയ്ക്ക് പറഞ്ഞതാണെന്ന പോലീസ് റിപ്പോർട്ടിലെ കമ്മീഷണറുടെ പ്രതികരണം വേദനിപ്പിച്ചു. ജിഹാദിയെന്നും ഡബിൾ ഡാഡി സിൻഡ്രോം ആണെന്നും ഒരു വ്യക്തിക്ക് പല ആളുകളുമായി ബന്ധമുണ്ടെന്ന് പറയുന്നത് തമാശയാണെന്ന് പോലീസിന് എങ്ങനെയാണ് പറയാൻ കഴിയുന്നത് എന്നും പോലീസ് സ്റ്റേഷനുകളിലും വർഗീയവത്കരണം നടക്കുന്നുണ്ടോ എന്ന് അന്വേഷിക്കേണ്ടതാണെന്നും അൻസിബ പറഞ്ഞു.

ഉഷാ ഹസീനയുടെ വെളിപ്പെടുത്തൽ

വിജയിക്കാൻ കുറുക്കുവഴികൾ സ്വീകരിച്ചവരാണ് നിലവിലെ ഭരണസമിതിയെന്ന് ഉഷാ ഹസീന ആരോപിച്ചു. കഴിഞ്ഞ സംഘടന തിരഞ്ഞെടുപ്പ് കാലത്ത് അനൂപ് ചന്ദ്രൻ അൻസിബക്കെതിരെ മോശം വീഡിയോ പ്രചരിപ്പിച്ചെന്നും, ആ വീഡിയോയെക്കുറിച്ച് ശ്വേതാ മേനോനോട് പറഞ്ഞപ്പോൾ തനിക്ക് വളരെ സന്തോഷമായെന്നും അങ്ങനെ തന്നെ വേണമെന്നുമായിരുന്നു അവരുടെ മറുപടിയെന്നും ഉഷാ ഹസീന ആരോപിച്ചു. 

കൂടാതെ, വിശ്വസ്തതയോടെ സംസാരിച്ച സഹപ്രവർത്തകന്റെ വ്യക്തിപരമായ ഓഡിയോ ക്ലിപ്പ് പുറത്തുവിട്ട ശ്വേതയുടെ പ്രവർത്തി കടുത്ത കുറ്റകൃത്യമാണെന്നും പല ഭാഗത്തും അവർ സംസാരിച്ചത് മ്യൂട്ട് ചെയ്ത് പിഷാരടി പറഞ്ഞ കാര്യങ്ങൾ മാത്രമാണ് പുറത്തുവിട്ടതെന്നും ഉഷാ ഹസീന കൊച്ചിയിൽ നടത്തിയ വാർത്താസമ്മേളനത്തിൽ പറഞ്ഞു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. ഏറ്റവും പുതിയ വാർത്തകൾക്കായി ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമന്റായി രേഖപ്പെടുത്താം.

Article Summary: Actress Ansiba Hassan clarified that she did not criticize Ramesh Pisharody regarding the mediation with Tini Tom. However, Ansiba and Usha Haseena raised serious allegations against AMMA president Shwetha Menon over sponsorship corruption, Tini Tom for misogynistic remarks, and the police for delayed action.

#AnsibaHassan #UshaHaseena #ShwethaMenon #TiniTom #RameshPisharody #AMMAAssociation #KeralaNews #AmmuNews