താരസംഘടനയായ അമ്മയിലെ ഭിന്നത രൂക്ഷമായതോടെ അഡ്‌ഹോക്ക് കമ്മിറ്റി രാജിവെക്കാനൊരുങ്ങുന്നു; താക്കോലുകളും പാസ്‌വേഡുകളും ഉൾപ്പെടെ മുൻ കമ്മിറ്റിക്ക് തിരികെ നൽകി

കൊച്ചി: (KVARTHA) താരസംഘടനയിലെ തമ്മിലടി രൂക്ഷമായതിന് പിന്നാലെ അഡ്‌ഹോക് കമ്മിറ്റി രാജിവെക്കാനൊരുങ്ങുന്നതായി റിപ്പോർട്ട്. അഡ്‌ഹോക്ക് കമ്മിറ്റി നിയമയുദ്ധത്തിനില്ലെന്നാണ് അംഗങ്ങൾ വ്യക്തമാക്കിയത്. മുൻ കമ്മിറ്റിയുടെ കയ്യിൽ നിന്നും വാങ്ങിയ അധികാരങ്ങൾ തിരികെ നൽകിയതായും അഡ്‌ഹോക്ക് കമ്മിറ്റി അറിയിച്ചു. 

താക്കോലുകൾ, വൈഫൈ പാസ്‌വേഡ്, ഇമെയിൽ പാസ്‌വേഡ്, മറ്റ് നിർണായക രേഖകൾ എന്നിവ മുൻ കമ്മിറ്റിക്ക് തിരികെ നൽകി. അമ്മ ജനറൽ സെക്രട്ടറി കുക്കു പരമേശ്വരനെ വിളിച്ചുവരുത്തിയാണ് ഇവ തിരികെ കൈമാറിയത്. രാജി പ്രഖ്യാപിച്ച മുൻ കമ്മിറ്റി തന്നെ പ്രവർത്തനങ്ങൾ മുന്നോട്ട് കൊണ്ടുപോകട്ടെ എന്നാണ് താൽക്കാലിക കമ്മിറ്റി അറിയിച്ചിരിക്കുന്നത്.

അംഗങ്ങൾക്കിടയിലെ അമർഷം

കോടതി ഇടപെടലുണ്ടായ സമയത്ത് ജനറൽ ബോഡി അംഗങ്ങൾ ഒപ്പം നിന്നില്ലെന്നാണ് അഡ്‌ഹോക്ക് കമ്മിറ്റിയിലെ ഭൂരിപക്ഷ അഭിപ്രായം. മുതിർന്ന അംഗങ്ങൾ പ്രതികരണം നടത്താത്തതിലും ഇവർക്ക് കടുത്ത അമർഷമുണ്ട്. ഇതിന് പുറമെ, രമേഷ് പിഷാരടി ശ്വേതാ മേനോനുമായി നടത്തിയ ഫോൺ സംഭാഷണം പുറത്തുവിട്ടതിൽ ശ്വേത മേനോനെതിരെ അഡ്‌ഹോക്ക് കമ്മിറ്റി അംഗങ്ങൾ വിമർശനം ഉന്നയിക്കുന്നുണ്ട്. ഫോൺ സംഭാഷണം സമൂഹമാധ്യമങ്ങളിൽ വലിയ ചർച്ചകൾക്ക് വഴിവെച്ചിരുന്നു.

നിയമയുദ്ധവും പ്രതിസന്ധിയും

അമ്മ ജനറൽ ബോഡിയ്ക്ക് ശേഷമായിരുന്നു ശ്വേതാ മേനോൻ ജനറൽ സെക്രട്ടറിയായിരുന്ന കമ്മിറ്റി രാജി പ്രഖ്യാപിക്കുന്നത്. ഇതിന് പിന്നാലെയാണ് രമേഷ് പിഷാരടിയുടെ നേതൃത്വത്തിലുള്ള അഡ്‌ഹോക്ക് കമ്മിറ്റി അധികാരമേറ്റെടുത്തത്. എന്നാൽ മുൻ കമ്മിറ്റി ഔദ്യോഗികമായി രാജിവെക്കാതിരുന്നത് വലിയ പ്രതിസന്ധി സൃഷ്ടിച്ചു. 

അതിനിടെയാണ് അഡ്‌ഹോക്ക് കമ്മിറ്റി ചട്ടവിരുദ്ധമാണെന്ന് കാട്ടി ശ്വേതാ മേനോൻ കോടതിയെ സമീപിച്ചത്. ജനറൽ ബോഡിയിൽ ഉയർന്ന വിമർശനങ്ങളിൽ നിരപരാധിത്വം തെളിയിച്ചിട്ടേ പടിയിറങ്ങൂ എന്നായിരുന്നു അവരുടെ നിലപാട്. ചട്ടം പരിഗണിച്ച കോടതി ശ്വേതാ മേനോൻ ജനറൽ സെക്രട്ടറിയായ പഴയ കമ്മിറ്റിക്ക് തന്നെ തിരഞ്ഞെടുപ്പ് വരെ തുടരാമെന്ന് ഉത്തരവിടുകയായിരുന്നു. ഇതിന് പിന്നാലെ അഡ്‌ഹോക് കമ്മിറ്റിയിൽ നിന്ന് പിഷാരടി രാജിവെച്ചിരുന്നു.

കൂടുതൽ വാർത്തകൾ അറിയാൻ ഞങ്ങളുടെ വാട്സാപ്പ് ചാനൽ ഫോളോ ചെയ്യുക.

Article Summary: The ad-hoc committee of the Association of Malayalam Movie Artists (AMMA) is reportedly preparing to resign following internal conflicts and legal battles. The committee has handed back administrative powers, including keys and passwords, to the previous committee.

#AMMAControversy #MalayalamCinema #RameshPisharody #ShwetaMenon #KeralaNews #AMMAAssociation #AmmuNews