സ്വാതന്ത്ര്യദിനത്തിലെ വിവാഹവും സോഷ്യൽ മീഡിയയിലെ വിദ്വേഷ കമന്റുകളും; സദാചാരവാദികളുടെ വായടപ്പിച്ച് ഷേർഷായുടെ ഇൻസ്റ്റഗ്രാം കുറിപ്പ്

കൊച്ചി: (KVARTHA) വിവാഹവിവരം വെളിപ്പെടുത്തിയതിന് പിന്നാലെ സോഷ്യൽ മീഡിയയിൽ നേരിടേണ്ടി വന്ന വിദ്വേഷ പ്രചാരണങ്ങളിൽ ശക്തമായ പ്രതികരണവുമായി നടനും തിരക്കഥാകൃത്തുമായ ഷേർഷാ ഷെരീഫ്. രണ്ടു പേർക്ക് ഒന്നിക്കാൻ ജാതിയോ മതമോ കുലമോ നോക്കേണ്ടതില്ലെന്നും പ്രണയിക്കുന്നവരെ ഭയപ്പെടുത്തുന്ന സമൂഹമല്ല വേണ്ടതെന്നും താരം സാമൂഹിക മാധ്യമങ്ങളിൽ പങ്കുവെച്ച കുറിപ്പിൽ വ്യക്തമാക്കി. അടുത്ത സുഹൃത്തുക്കളും കുടുംബാംഗങ്ങളും മാത്രം പങ്കെടുത്ത ലളിതമായ ചടങ്ങിലായിരുന്നു ഷേർഷാ ഷെരീഫിന്റെയും നിത്യ സോളമന്റെയും വിവാഹം.

View this post on Instagram

A post shared by Shersha Sherief (@shersha_sherief)

ഭരണഘടനാ സ്വാതന്ത്ര്യത്തോടെ വിവാഹം

സ്വാതന്ത്ര്യദിനത്തിൽ സ്പെഷ്യൽ മാരേജ് ആക്ട് (1954) പ്രകാരമായിരുന്നു ഇരുവിശ്വാസികളായ ഇവരുടെ വിവാഹം. രണ്ടു വ്യത്യസ്ത വിശ്വാസങ്ങളിൽ നിന്നുള്ള തങ്ങളും നിത്യ സോളമനും പരസ്പരം വ്യക്തിത്വങ്ങളെയും വിശ്വാസങ്ങളെയും സംരക്ഷിച്ചുകൊണ്ടാണ് ഒന്നായതെന്ന് ഷേർഷാ കുറിച്ചു. വിവാഹ വാർത്ത പങ്കുവെച്ചതിന് പിന്നാലെ നിരവധി ആശംസകൾക്കൊപ്പം വലിയ തോതിൽ വിദ്വേഷ കമന്റുകളും സന്ദേശങ്ങളും വന്നതോടെയാണ് താരം തന്റെ നിലപാട് വ്യക്തമാക്കിയത്.

‘നിങ്ങളുടെ വെറുപ്പിന് ഇവിടെ വീറ്റോ അധികാരമില്ല’

വിദ്വേഷം വിളമ്പുന്നവർക്കെതിരെ തികച്ചും കടുപ്പിച്ച ഭാഷയിലാണ് ഷേർഷാ പ്രതികരിച്ചത്. ‘സ്വാതന്ത്ര്യം എന്നത് സ്വന്തം വിശ്വാസത്തിൽ ജീവിക്കാനുള്ള അവകാശം മാത്രമല്ല, മറ്റൊരാളുടെ വിശ്വാസത്തെയും സ്വാതന്ത്ര്യത്തെയും ബഹുമാനിക്കാനുള്ള മനസ്സു കൂടിയാണ്. പ്രണയിക്കുന്നവരെ ഭയപ്പെടുത്തുന്ന ഒരു സമൂഹമല്ല വേണ്ടത്. സ്വന്തം ജീവിതം സ്വന്തം തീരുമാനപ്രകാരം ജീവിക്കാൻ മനുഷ്യരെ പ്രാപ്തരാക്കുന്ന ഒരു സമൂഹമാണ് വേണ്ടത്,’ എന്ന് ഷേർഷാ വ്യക്തമാക്കി.

‘ഈ പോസ്റ്റൊക്കെ കണ്ട് അസ്വസ്ഥരായ സുഹൃത്തുക്കളെ, നിങ്ങളുടെ അസ്വസ്ഥതയല്ല നിയമം. നിങ്ങളുടെ മുൻവിധിയല്ല സദാചാരം. നിങ്ങളുടെ വെറുപ്പിന് ഇവിടെ വീറ്റോ അധികാരമില്ല. അതുകൊണ്ട് ഞങ്ങൾ ഭയമില്ലാതെ സ്നേഹിക്കും. ഞങ്ങൾക്ക് പശ്ചാത്താപമില്ല. ഭരണഘടന നൽകുന്ന സ്വാതന്ത്ര്യത്തോടെ ജീവിക്കും. വിദ്വേഷം വിളമ്പാൻ ഇറങ്ങിയവർ അത് സ്വയം ഇലയിട്ട് തിന്നു തൃപ്‌തിപ്പെടുക,’ എന്നും താരം കുറിപ്പിൽ കൂട്ടിച്ചേർത്തു.

ടൊവിനോ തോമസ് - ബേസിൽ ജോസഫ് ചിത്രമായ 'അതിരടി'യിൽ 'ആൽഫാ മെയിൽ വിവി' എന്ന കഥാപാത്രത്തെ അവതരിപ്പിച്ചാണ് ഷേർഷാ ശ്രദ്ധേയനായത്. ഗൗരി ജി. കിഷൻ പ്രധാന കഥാപാത്രമായെത്തിയ 'ലിറ്റിൽ മിസ് റാവുത്തർ' എന്ന ചിത്രത്തിന്റെ തിരക്കഥാകൃത്തും നായകനുമായിരുന്നു ഷേർഷാ. 'ബാഡ് ബോയ്സ്', 'നിഴൽ', 'മൂൺവാക്ക്', 'മധുവിധു', 'ഹൃദയം' തുടങ്ങി നിരവധി ചിത്രങ്ങളിൽ അഭിനയിച്ചിട്ടുള്ള താരത്തിന്റെ ഏറ്റവും പുതിയ ചിത്രം രഞ്ജിത്ത് സംവിധാനം ചെയ്യുന്ന 'ലോ ആൻഡ് ഓർഡർ' ആണ്.

സിനിമ ലോകത്തെ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Shersha Sherif responded to online hate after marrying Nithya Solomon.

#ShershaSherif #NithyaSolomon #SpecialMarriageAct #LittleMissRawther #Athiradi #MalayalamCinema #Kvartha #AnjanaNews