ഹയർ സെക്കൻഡറി വിദ്യാർഥി കോൺഫറൻസ് 'സ്റ്റുഡന്റ്‌സ് ഗാല' ഞായറാഴ്ച പിലാത്തറയിൽ

കണ്ണൂർ: (KVARTHA) 'നോ ക്യാപ്, ഇറ്റ്സ് ടുമോറോ' എന്ന പ്രമേയത്തിൽ എസ്എസ്എഫ് കണ്ണൂർ ജില്ലാ കമ്മിറ്റി സംഘടിപ്പിക്കുന്ന ഹയർ സെക്കൻഡറി വിദ്യാർഥി കോൺഫറൻസ് 'സ്റ്റുഡന്റ്‌സ് ഗാല' നവംബർ 23 ഞായറാഴ്ച പിലാത്തറയിൽ നടക്കുമെന്ന് സംഘാടകർ കണ്ണൂർ പ്രസ് ക്ലബ്ബിൽ നടന്ന വാർത്താസമ്മേളനത്തിൽ അറിയിച്ചു.

ജനുവരി ഒന്ന് മുതൽ പതിനേഴ് വരെ കേരള മുസ്‌ലിം ജമാഅത്ത് സംഘടിപ്പിക്കുന്ന 'മനുഷ്യർക്കൊപ്പം' എന്ന പ്രമേയത്തിലുള്ള കേരള യാത്രയുടെ പ്രചാരണാർഥമാണ് എസ്എസ്എഫ് ഈ ഹയർ സെക്കൻഡറി വിദ്യാർഥി സമ്മേളനം സംഘടിപ്പിക്കുന്നത്.

ഈ പ്രചാരണാർഥം ഡിവിഷൻ കേന്ദ്രങ്ങളിൽ എൽപി, യുപി വിദ്യാർഥികളെ പങ്കെടുപ്പിച്ച് സ്‌മൈൽ കേരള ഫ്യൂചർ അസംബ്ലിയും, ഹൈസ്കൂൾ വിദ്യാർഥികളെ ഉൾപ്പെടുത്തി ഫ്യൂചർ സമ്മിറ്റും പൂർത്തിയാക്കിയ ശേഷമാണ് എസ്എസ്എഫ് ഇപ്പോൾ ഹയർ സെക്കൻഡറി വിദ്യാർഥികൾക്കായി സമ്മേളനം പ്രഖ്യാപിച്ചിട്ടുള്ളത്.

സ്റ്റുഡന്റ്‌സ് ഗാലയിൽ ജില്ലയിലെ പതിമൂന്ന് ഡിവിഷനുകളിൽ നിന്നും ഹയർ സെക്കൻഡറി ക്യാമ്പസുകളിൽ നിന്നുമായി നിരവധി വിദ്യാർഥികൾ പങ്കെടുക്കും. സമ്മേളനം കേരള മുസ്‌ലിം ജമാഅത്ത് സംസ്ഥാന ഉപാധ്യക്ഷൻ പട്ടുവം കെ പി അബൂബക്കർ മുസ്‌ലിയാർ ഉദ്ഘാടനം ചെയ്യും. 

തുടർന്ന് നടക്കുന്ന ഐസ് ബ്രേക്കിങ് സെഷന് കേരള വെഫി കൺവീനർ അബ്ദുറഹ്മാൻ എറോൾ നേതൃത്വം നൽകും. പ്രശസ്ത ശിശുരോഗ വിദഗ്ധനും എസ്എസ്എഫ് സംസ്ഥാന ജനറൽ സെക്രട്ടറിയുമായ ഡോ ടി അബൂബക്കർ സമ്മേളനത്തിന്റെ പ്രമേയമായ 'നോ ക്യാപ്, ഇറ്റ്സ് ടുമോറോ' വിശദീകരിച്ച് സംസാരിക്കും.

തുടർന്ന് നടക്കുന്ന 'ബിൽഡ് യുവർ ഫ്യൂചർ' സംരംഭക പരിശീലനത്തിന് പ്രശസ്ത സംരംഭകരും വ്യവസായ പ്രമുഖരുമായ താജുദ്ധീൻ അബൂബക്കർ (സിഇഒ, അർബൻ ട്രാഷ്), അബ്ദുല്ല അബ്ദുൽ ഖാദർ (സിടിഒ, നാറ്റ ന്യൂട്രിക്കോ കോകനട്ട് ഫുഡ് പ്രോഡക്റ്റ്) തുടങ്ങിയവർ നേതൃത്വം നൽകും.

കണ്ണൂർ ബേബി മെമ്മോറിയൽ ഹോസ്പിറ്റലിലെ ക്രിട്ടിക്കൽ കെയർ മെഡിസിൻ സ്പെഷ്യലിസ്റ്റ് ഡോ അബ്ദുല്ല 'ഹെൽത്ത് ടിപ്സ്' സെഷന് നേതൃത്വം നൽകും. സമ്മേളന നഗരിയിൽ വിദ്യാർഥികളുടെ സംശയനിവാരണത്തിനും ക്രിയാത്മക ഇടപെടലിനും സഹായകമാകുന്ന കരിയർ കോർണർ, സയൻസ് കോർണർ തുടങ്ങി വിവിധ കോർണറുകൾ പ്രവർത്തിക്കും. സ്കൂളുകൾ തമ്മിലുള്ള വിവിധ ആക്ടിവിറ്റികളും ക്വിസ് മത്സരങ്ങളും നടക്കും. വൈകുന്നേരം വിദ്യാർഥി റാലിയോടെ സമ്മേളനത്തിന് സമാപനമാകും.

വാർത്താസമ്മേളനത്തിൽ എസ്എസ്എഫ് ജില്ലാ ജനറൽ സെക്രട്ടറി മുഹമ്മദ് സാലിം, സെക്രട്ടറിമാരായ അഡ്വ. മിദ്‌ലാജ് സഖാഫി, ഫായിസ് അബ്ദുല്ല, ഡോ അബ്ദുല്ല തുടങ്ങിയവർ പങ്കെടുത്തു.

എസ്എസ്എഫ് കണ്ണൂർ ജില്ലാ കമ്മിറ്റി സംഘടിപ്പിക്കുന്ന 'സ്റ്റുഡന്റ്‌സ് ഗാല'യെക്കുറിച്ചുള്ള ഈ വാർത്ത നിങ്ങളുടെ സുഹൃത്തുക്കളുമായി പങ്കുവെക്കൂ. നിങ്ങളുടെ അഭിപ്രായം കമൻ്റ് ചെയ്യുക. 

Article Summary: SSF Kannur organizes 'Students Gala' higher secondary conference in Pilathara on Nov 23.

#SSFKannur #StudentsGala #HigherSecondary #Pilathara #KeralaMuslimJamaath #StudentConference