Rahul Gandhi | വിദ്യാഭ്യാസ മേഖലയെ കാവിവൽക്കരിക്കാൻ ആർഎസ്എസ് ശ്രമിക്കുന്നു; രാജ്യത്തെ തകർക്കാനുള്ള നീക്കമെന്ന് രാഹുൽ ഗാന്ധി
● കേന്ദ്രസർക്കാരിൻ്റെ വിദ്യാഭ്യാസ നയങ്ങൾക്കെതിരെ ഡൽഹിയിൽ വിദ്യാർത്ഥി പ്രതിഷേധം.
● സർവകലാശാലകളെ ബിജെപി നേരിട്ടാണ് വിസിമാരെ നിയന്ത്രിക്കുന്നതെന്ന് രാഹുൽ ഗാന്ധി.
● ‘യുജിസിയുടെ കരട് നയത്തിലെ നിർദേശങ്ങൾ ആർഎസ്എസ് അജൻഡയുടെ ഭാഗമാണ്’.
● പ്രതിഷേധത്തിനിടെ വിദ്യാർഥികളും പോലീസും തമ്മിൽ ഏറ്റുമുട്ടി.
ന്യൂഡൽഹി: (KVARTHA) കേന്ദ്രസർക്കാരിൻ്റെ വിദ്യാഭ്യാസ നയങ്ങൾക്കെതിരെ ഇന്ത്യാ മുന്നണിയിലെ വിദ്യാർത്ഥി സംഘടനകൾ ഡൽഹിയിൽ ശക്തമായ പ്രതിഷേധം സംഘടിപ്പിച്ചു. ജന്തർ മന്ദറിൽ നടന്ന പ്രതിഷേധത്തിൽ എസ്എഫ്ഐ, എഐഎസ്എഫ്, കെഎസ്‌യു, എംഎസ്എഫ് തുടങ്ങി നിരവധി വിദ്യാർത്ഥി സംഘടനകൾ പങ്കെടുത്തു. ദേശീയ വിദ്യാഭ്യാസ നയം, യുജിസി കരട് രേഖ, ചോദ്യപേപ്പർ ചോർച്ച അഴിമതി, പിന്നാക്ക വിഭാഗത്തിൽപ്പെട്ട വിദ്യാർഥികളുടെ സ്കോളർഷിപ്പ്, സർവകലാശാല യൂണിയൻ തിരഞ്ഞെടുപ്പ് തുടങ്ങി വിവിധ വിഷയങ്ങൾ ഉന്നയിച്ചാണ് വിദ്യാർത്ഥികൾ പ്രതിഷേധിച്ചത്.
പ്രതിഷേധത്തിനിടെ വിദ്യാർഥികളും പോലീസും തമ്മിൽ ഏറ്റുമുട്ടി. വിദ്യാർഥികൾ ബാരിക്കേഡുകൾ മറികടക്കാൻ ശ്രമിച്ചതോടെയാണ് സംഘർഷമുണ്ടായത്. ലോക്‌സഭാ പ്രതിപക്ഷ നേതാവ് രാഹുൽ ഗാന്ധി വിദ്യാർഥികളെ അഭിസംബോധന ചെയ്ത് സംസാരിച്ചു. രാജ്യത്തെ സർവകലാശാലകൾ ആർഎസ്എസ് നിയന്ത്രണത്തിലായിക്കഴിഞ്ഞുവെന്നും വിദ്യാഭ്യാസ മേഖലയെ കാവിവൽക്കരിക്കാനാണ് അവരുടെ ശ്രമമെന്നും രാഹുൽ ഗാന്ധി ആരോപിച്ചു. ‘വിദ്യാഭ്യാസരംഗം പൂർണമായി അവരുടെ നിയന്ത്രണത്തിലായാൽ ആർക്കും ജോലി കിട്ടില്ല, രാജ്യം തകർന്നടിയും. ഒരു സംഘടന നമ്മുടെ വിദ്യാഭ്യാസ സമ്പ്രദായം തച്ചുടയ്ക്കാൻ രംഗത്തിറങ്ങിയിരിക്കുകയാണ്. ഇതിനകം തന്നെ അവർ ആ മേഖലയിൽ സ്വാധീനം ഉറപ്പിച്ചു. ഭാവിയിൽ സംസ്ഥാനങ്ങളിൽ വൈസ് ചാൻസലർമാരെയും ആർഎസ്എസ് നാമനിർദേശം ചെയ്യുന്ന സ്ഥിതിയുണ്ടാകും. ഇത് തടയണം,’ രാഹുൽ ഗാന്ധി പറഞ്ഞു.
യുജിസിയുടെ കരട് നയത്തിലെ നിർദേശങ്ങൾ ഒരു ചരിത്രം, ഒരു പാരമ്പര്യം, ഒരു ഭാഷ എന്ന ആർഎസ്എസ് അജൻഡയുടെ ഭാഗമാണെന്ന് രാഹുൽ ഗാന്ധി കുറ്റപ്പെടുത്തി. തൊഴിലില്ലായ്‌മ, വിലക്കയറ്റം, പണപ്പെരുപ്പം, വിദ്യാഭ്യാസം എന്നിവയെക്കുറിച്ച് പ്രധാനമന്ത്രി പാർലമെൻ്റിൽ ഒന്നും മിണ്ടിയില്ല. വിഭവങ്ങളെല്ലാം അദാനിക്കും അംബാനിക്കും സ്ഥാപനങ്ങളെല്ലാം ആർഎസ്എസിനും എന്നതാണ് സർക്കാർ നയമെന്നും രാഹുൽ ഗാന്ധി ആരോപിച്ചു.
ദേശീയ വിദ്യാഭ്യാസ നയത്തിലൂടെ സർവകലാശാലകളെ കാവിവൽക്കരിക്കാനുള്ള ശ്രമമാണ് നടക്കുന്നതെന്ന് എസ്എഫ്ഐ അഖിലേന്ത്യാ പ്രസിഡൻ്റ് വി പി സാനു പറഞ്ഞു. എസ്എഫ്ഐ അഖിലേന്ത്യാ ജനറൽ സെക്രട്ടറി മയൂഖ് ബിശ്വാസ് രാഹുൽ ഗാന്ധിക്ക് നിവേദനം കൈമാറി
ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക.
Rahul Gandhi accused the RSS of trying to saffronize the education sector and control universities, stating it's a move to destroy the country. This came during a protest in Delhi by student organizations against the central government's education policies, including the National Education Policy and UGC drafts. The protest also addressed issues like question paper leaks and scholarship concerns.
#RahulGandhi, #EducationPolicy, #RSS, #India, #Protest, #Students
