കണ്ണൂർ: (KVARTHA) മുൻസിഫ് മജിസ്ട്രേറ്റ് പരീക്ഷയിൽ 28-ാം റാങ്ക് നേടി കണ്ണൂർ സ്വദേശി സി അബ്ദുൽ റാസിഖ്  അഭിമാനമായി. അധ്വാനത്തിന്റെയും നിരന്തരമായ പരിശ്രമത്തിന്റെയും ഫലമായി ലഭിച്ച ഈ വിജയം റാസിഖിന്റെ ജീവിതത്തിലെ ഒരു വഴിത്തിരിവായി മാറി. കടാങ്കോട് ബിസ്മില്ലാ മൻസിലിൽ പരേതനായ മുഹമ്മദ് - കുഞ്ഞാമിന ദമ്പതികളുടെ മകനാണ് ഈ യുവാവ്.

കടാങ്കോട് വാരം മാപ്പിള എൽപി സ്‌കൂളിലെയും വാരം യുപി സ്‌കൂളിലെയും പ്രാഥമിക വിദ്യാഭ്യാസം പൂർത്തിയാക്കിയ റാസിഖ്, എളയാവൂർ സിഎച്ച്എംഎച്ച്എസ്എസിൽ നിന്നും എസ്എസ്എൽസി പാസായി. ജീവിതത്തിൽ വളരെ നിർണായകമായ ഒരു ഘട്ടമായിരുന്നു 2005 മുതൽ 2012 വരെ ഏഴ് വർഷം കുറ്റ്യാടി സിറാജുൽ ഹുദയിൽ പഠിച്ച കാലഘട്ടം. സിറാജുൽ ഹുദയിലെ പഠനം അറിവ്‌ ദാഹം വളർത്തിയെടുക്കുകയും പഠനത്തിൽ കൂടുതൽ ശ്രദ്ധ കേന്ദ്രീകരിക്കാൻ പ്രേരിപ്പിക്കുകയും ചെയ്തു.

സിറാജുൽ ഹുദയിൽ നിന്ന് സുറൈജി ബിരുദവും കാലിക്കറ്റ് യൂണിവേഴ്‌സിറ്റിയിൽ നിന്നും ഇംഗ്ലീഷ് സാഹിത്യത്തിൽ ബിരുദവും മദ്രാസ് യൂണിവേഴ്‌സിറ്റിയിൽ നിന്ന് ഇംഗ്ലീഷിൽ ബിരുദാനന്തര ബിരുദവും നേടിയ അദ്ദേഹം, പിന്നീട് കാരന്തൂർ മർക്കസിൽ നിന്നും സഖാഫി ബിരുദവും കരസ്ഥമാക്കി. ഇതിനിടയിൽ മർകസ് ലോ കോളജിൽ നിന്നും എൽഎൽബിയിൽ മികച്ച മാർക്കോടെ വിജയിക്കുകയും തിരുപ്പതി യൂണിവേഴ്‌സിറ്റിയിൽ നിന്നും എൽഎൽഎം പൂർത്തിയാക്കുകയും ചെയ്തു. 

നിലവിൽ വടകരയിൽ അഭിഭാഷകനായി പ്രവർത്തിക്കുന്നതിനിടയിലാണ് കേരള ജുഡീഷ്യൽ സർവീസ് പരീക്ഷ എഴുതി വിജയിച്ചത്. എസ്എഫ്എഫ് മുൻ കണ്ണൂർ ഡിവിഷൻ ഭാരവാഹിയും സംസ്ഥാന ദഅ്‌വ ഡയറക്ടേറ്റ് അംഗവുമായിരുന്നു. ഭാര്യ എൻ പി മുർശിദയും മക്കളായ നിസ്മ ബതൂൽ, മുഹമ്മദ് സ്വബീഹ് എന്നിവരും അദ്ദേഹത്തിന്റെ ഈ വിജയത്തിൽ അഭിമാനിക്കുന്നു.

 #AbdulRasikh, #MunsiffMagistrate, #JudicialExam, #Rank28, #SuccessStory, #Kerala