കോഴിക്കോട്: (KVARTHA) പഠനം പൂർത്തിയാക്കിയിട്ടും ഫീസ് അടയ്ക്കാൻ പണമില്ലാത്തതിനാൽ ബിരുദ സർട്ടിഫിക്കറ്റ് ലഭിക്കാതെ ചൈനയിൽ കുടുങ്ങി കോഴിക്കോട് സ്വദേശിയായ എംബിബിഎസ് വിദ്യാർത്ഥിനി. പഠനം കഴിഞ്ഞ് കൂട്ടുകാെരെല്ലാം നാട്ടിലേക്ക് മടങ്ങിയെങ്കിലും സാമ്പത്തിക പ്രതിസന്ധി കാരണം ഇവർക്ക് തിരികെ വരാൻ സാധിക്കുന്നില്ല. കോവിഡ് മഹാമാരി കാരണം അച്ഛൻ മരിച്ചതോടെയാണ് ഉപരിപഠനം പ്രതിസന്ധിയിലായത്. ഫീസ് അടച്ച് ബിരുദ സർട്ടിഫിക്കറ്റ് വാങ്ങാൻ സാധിക്കാത്തതിനാൽ തന്റെ ഭാവി തന്നെ അവതാളത്തിലാകുമോ എന്ന ഭയം യുവതിക്കുണ്ട്.

'കൂടെ പഠിച്ചവരെല്ലാം നാട്ടിൽ പോയി, ഞാൻ മാത്രമാണ് ഇവിടെയുള്ളത്. ഹോസ്റ്റലിലുള്ളവരെല്ലാം പുതിയ ബാച്ചിലെ കുട്ടികളാണ്. എത്രകാലം ഇവിടെ ഇങ്ങനെ നിൽക്കാൻ കഴിയുമെന്നറിയില്ല', ഹോസ്റ്റലിൽ ഒറ്റയ്ക്ക് കഴിയുന്ന വിദ്യാർഥിനി അമ്മയ്ക്ക് അയച്ച സന്ദേശമാണിത്. ഈ വാക്കുകൾ കേൾക്കുമ്പോൾ അമ്മയുടെയും അമ്മമ്മയുടെയും നെഞ്ചിൽ തീയാണ്. 

സ്വപ്നങ്ങളുമായി ചൈനയിലേക്ക് പറന്ന യുവതിക്ക് ഏറ്റവും വലിയ പിന്തുണ നൽകിയത് അച്ഛൻ ആയിരുന്നു. എല്ലാ ആഗ്രഹങ്ങൾക്കും കൂട്ടായി അച്ഛനുണ്ടായിരുന്നു. എന്നാൽ വിധി അവരെ ക്രൂരമായി പരീക്ഷിച്ചു. സൗദിയിൽ ജോലി ചെയ്തിരുന്ന അച്ഛൻ കോവിഡ് ബാധിച്ച് മരണമടഞ്ഞു. ഇതോടെ യുവതിയുടെ ജീവിതം ഇരുളടഞ്ഞു. പഠനത്തിനുള്ള പണം നിലച്ചതോടെ കാര്യങ്ങൾ കൈവിട്ടുപോയി.

ഇപ്പോൾ ഫീസ് അടയ്ക്കുവാൻ ഏകദേശം 25 ലക്ഷം രൂപയാണ് ആവശ്യം. അന്യനാട്ടിൽ ഒറ്റയ്ക്ക് കഴിയുന്ന മകളെ ഓർത്ത് അമ്മയുടെ മനസ്സ് വേദനിക്കുകയാണ്. ഈ പ്രതിസന്ധി എങ്ങനെ തരണം ചെയ്യുമെന്നറിയാതെ വിഷമിക്കുകയാണ് ആ അമ്മ. എന്നാൽ നാട്ടുകാർ ചേർന്ന് ഒരു സഹായ നിധി രൂപീകരിച്ചിട്ടുണ്ട്. ഈ ഉദ്യമത്തിൽ മാത്രമാണ് ഇപ്പോൾ ഇവരുടെ പ്രതീക്ഷ. സുമനസ്സുകളുടെ സഹായം ലഭിച്ചാൽ യുവതിയുടെ സ്വപ്‌നങ്ങൾ വീണ്ടും പൂവണിയും.

ബാങ്ക് അക്കൗണ്ട് വിവരങ്ങൾ:
അക്കൗണ്ട് നമ്പർ: 40215101075302
IFSC കോഡ്: KLGB0040215
ബാങ്ക്: കേരള ഗ്രാമീൺ ബാങ്ക്, കക്കട്ടിൽ

വിദ്യാർത്ഥിനിക്ക് സഹായം ചെയ്യാൻ ആഗ്രഹിക്കുന്നവർക്ക് മുകളിൽ നൽകിയിരിക്കുന്ന ബാങ്ക് വിവരങ്ങൾ ഉപയോഗിക്കാം. നിങ്ങളുടെ സഹായം ഈ യുവതിയുടെ ജീവിതത്തിലേക്ക് ഒരു പ്രതീക്ഷയുടെ വെളിച്ചം പകരും.

#MBBS, #MalayaliStudent, #China, #FinancialCrisis, #HelpNeeded, #Kerala