‘കുട്ടികളുടെ ആഗ്രഹപ്രകാരം ഇഷ്ടമുള്ള വസ്ത്രങ്ങൾ ധരിക്കാം'; സ്കൂളുകളിലെ ഓണാഘോഷത്തിന് യൂണിഫോം നിർബന്ധമില്ല, എട്ടാം ക്ലാസ് പരീക്ഷ മാറ്റി

തിരുവനന്തപുരം: (KVARTHA) സംസ്ഥാനത്തെ സ്കൂളുകളിൽ ഓണാഘോഷത്തിന് യൂണിഫോം നിർബന്ധമില്ലെന്ന് വിദ്യാഭ്യാസ മന്ത്രിയുടെ ഉത്തരവ്. ഓഗസ്റ്റ് 21-നാണ് ഇത്തവണ സ്കൂളുകളിൽ ഓണാഘോഷം നടക്കുന്നത്. ഈ ദിനത്തിൽ കുട്ടികൾക്ക് അവരുടെ ഇഷ്ടമുള്ള വസ്ത്രം ധരിക്കാമെന്നാണ് മന്ത്രി അറിയിച്ചിരിക്കുന്നത്. ഇത് സംബന്ധിച്ച് ഔദ്യോഗിക നിർദേശം നൽകാൻ പൊതുവിദ്യാഭ്യാസ ഡയറക്ടറെ മന്ത്രി ചുമതലപ്പെടുത്തി.

'ഓണം കളറാക്കിക്കോളീൻ മക്കളെ'

ഇതുസംബന്ധിച്ച് മന്ത്രി ഫേസ്ബുക്കിൽ പങ്കുവച്ച കുറിപ്പും ശ്രദ്ധേയമായി. 'ഓണം കളറാക്കിക്കോളീൻ മക്കളെ... സംസ്ഥാനത്തെ സ്കൂളുകളിൽ ഈ വർഷത്തെ ഓണാഘോഷ ദിനമായ ഓഗസ്റ്റ് 21-ന് കുട്ടികളുടെ ആഗ്രഹപ്രകാരം യൂണിഫോം അല്ലാത്ത വസ്ത്രങ്ങൾ ധരിക്കാനുള്ള നിർദേശം നൽകാൻ പൊതുവിദ്യാഭ്യാസ ഡയറക്ടറെ ചുമതലപ്പെടുത്തി' എന്നാണ് മന്ത്രി ഫേസ്ബുക്കിൽ കുറിച്ചത്.

എട്ടാം ക്ലാസ് പരീക്ഷ മാറ്റി

സ്കൂളുകളിൽ ഓണാഘോഷം നടക്കുന്നതിനാൽ ഓഗസ്റ്റ് 21-ന് നടത്താനിരുന്ന എട്ടാം ക്ലാസ് പരീക്ഷ മാറ്റിവച്ചു. പകരം ഓണാവധിക്ക് ശേഷമാകും ഈ പരീക്ഷ നടക്കുക. ഓഗസ്റ്റ് 21-നായിരുന്നു ഓണാഘോഷവും ഓണാവധിക്കായി സംസ്ഥാനത്തെ സ്കൂളുകൾ അടയ്ക്കാനും തീരുമാനിച്ചിരുന്നത്. ഓണാഘോഷത്തിനിടെ വിദ്യാർഥികൾ എങ്ങനെ പരീക്ഷയെഴുതുമെന്ന ആശങ്ക ഉയർന്നതിനെ തുടർന്നാണ് പരീക്ഷ മാറ്റിവച്ചത്. ഇതോടെ വിദ്യാർഥികൾക്ക് യാതൊരു ആശങ്കയുമില്ലാതെ ഓണാഘോഷത്തിൻ്റെ ഭാഗമാകാം.

9 ദിവസത്തെ ഓണാവധി

ഓഗസ്റ്റ് 22 മുതൽ 30 വരെയാണ് സർക്കാർ ഇത്തവണ ഓണാവധി പ്രഖ്യാപിച്ചിരിക്കുന്നത്. എൽപി, യുപി, ഹൈസ്കൂൾ വിഭാഗങ്ങളിലെ ഓണപ്പരീക്ഷകൾ ഓഗസ്റ്റ് 13-ന് ആരംഭിച്ച് 20-ന് അവസാനിക്കും. 21-നാണ് ഓണാഘോഷം. അന്ന് ആഘോഷങ്ങൾക്ക് ശേഷം അവധിക്കായി സ്കൂളുകൾ അടയ്ക്കും. ഓണാവധിക്ക് ശേഷം ഓഗസ്റ്റ് 31-നാണ് വിദ്യാലയങ്ങൾ വീണ്ടും തുറക്കുക. പതിവിൽ നിന്നും വ്യത്യസ്തമായി ഇത്തവണ 10 ദിവസം അവധിയില്ല. 9 ദിവസം മാത്രമാണ് ഓണം അവധി നൽകിയിട്ടുള്ളത്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Kerala schools drop uniform rule for Onam on Aug 21; Class 8 exam postponed.

#Kvartha #OnamCelebration #KeralaSchools #EducationMinister #OnamHolidays #KeralaNews #MalayalamNews #EducationNews #AmmuNews