തിരുവനന്തപുരം: (KVARTHA) കേരളത്തിൽ ആദ്യമായി ബാച്ചിലർ ഇൻ പ്രൊസ്തെറ്റിക് ആൻഡ് ഓർത്തോട്ടിക് ഡിഗ്രി കോഴ്സ് ഭിന്നശേഷി മേഖലയിലെ രാജ്യാന്തര സ്ഥാപനമായ നാഷണൽ ഇൻസ്റ്റിറ്റ്യൂട്ട് ഓഫ് ഫിസിക്കൽ മെഡിസിൻ ആൻഡ് റിഹാബിലിറ്റേഷനിൽ (നിപ്മർ) ആരംഭിക്കുകയാണെന്ന സന്തോഷവാർത്തയാണ് ഉന്നതവിദ്യാഭ്യാസ-സാമൂഹ്യനീതി മന്ത്രി ഡോ. ആർ ബിന്ദു പങ്കുവെച്ചിരിക്കുന്നത്.

ഈ കോഴ്സ് എന്താണ്?

നാലര വർഷത്തെ ബിരുദ പഠനമാണ് ബി പി ഒ. കൃത്രിമ കൈകാലുകൾ, വീൽ ചെയറുകൾ തുടങ്ങിയ ഭിന്നശേഷിക്കാർക്കും വയോജനങ്ങൾക്കുമുള്ള സഹായക ഉപകരണങ്ങൾ നിർമ്മിക്കുന്നതിനും അവയുടെ ഗുണനിലവാരം പരിശോധിക്കുന്നതിനുമുള്ള വിദഗ്ധ പരിശീലനമാണ് ഈ കോഴ്സിൽ നൽകുന്നത്. 

എന്തുകൊണ്ട് ഈ കോഴ്സ് പ്രധാനമാണ്?

തൊഴിൽ സാധ്യതകൾ: മെഡിക്കൽ കോളേജുകൾ, ജില്ലാ ആശുപത്രികൾ, ആർട്ടിഫിഷ്യൽ ലിമ്പ് സെന്ററുകൾ എന്നിവിടങ്ങളിൽ ധാരാളം തൊഴിൽ അവസരങ്ങൾ ഈ മേഖലയിലുണ്ട്. വിദേശത്തും മികച്ച തൊഴിൽ സാധ്യതകൾ ലഭ്യമാണ്.

ദേശീയതലത്തിലെ ആവശ്യം: ദേശീയതലത്തിൽ അറുനൂറ് ബിരുധാരികൾ മാത്രമേ ഈ മേഖലയിലുള്ളൂ എന്നത് കണക്കിലെടുക്കുമ്പോൾ കേരളത്തിൽ ഈ കോഴ്സിന്റെ പ്രാധാന്യം മനസ്സിലാക്കാം. 

സാമൂഹിക പ്രസക്തി: ഭിന്നശേഷിക്കാരുടെ ജീവിതം എളുപ്പമാക്കുന്നതിൽ നിർണായക പങ്ക് വഹിക്കുന്ന ഒരു മേഖലയാണിത്.

ആർക്കൊക്കെ ഈ കോഴ്സിന് അപേക്ഷിക്കാം?

പ്ലസ് ടു തലത്തിൽ ഫിസിക്സ്, കെമിസ്ട്രി, ബയോളജി വിഷയങ്ങൾ പഠിച്ചവർക്ക് ഈ കോഴ്സിന് അപേക്ഷിക്കാം. ഇതിനകം പാരാ മെഡിക്കൽ കോഴ്സുകൾക്ക് എൽബിഎസിൽ രജിസ്റ്റർ ചെയ്തിട്ടുള്ളവർക്കും ഈ കോഴ്സിന് അവസരമുണ്ട്. 

എങ്ങനെ അപേക്ഷിക്കാം?

പ്രവേശന നടപടികൾ ഉടൻ ആരംഭിക്കുമെന്നാണ് മന്ത്രി അറിയിച്ചിരിക്കുന്നത്. ഉന്നതവിദ്യാഭ്യാസ വകുപ്പിനു കീഴിലെ എൽബിഎസിനാണ് പ്രവേശനച്ചുമതല. തുടക്കത്തിൽ 20 കുട്ടികൾക്കാണ് പ്രവേശനം നൽകുക.  റീഹാബിലിറ്റേഷൻ കൗൺസിൽ ഓഫ് ഇന്ത്യയുടെ അംഗീകാരമുള്ള  കോഴ്സിന്റെ അക്കാദമിക് നിയന്ത്രണം കേരളാ ഹെൽത്ത്‌ സയൻസ് സർവകലാശാലക്കാണ്.

#prosthetics #orthotics #kerala #nipmr #disability #rehabilitation #highereducation #jobopportunities #india