യു എ ഇയിൽ ജൂൺ മുതൽ ഒന്നാം തീയതിക്ക് തന്നെ ശമ്പളം നൽകിയില്ലേ? തൊഴിലുടമകൾ ജാഗ്രതൈ! ഇനി യാത്രാവിലക്കും ആസ്തികൾ കണ്ടുകെട്ടൽ വരെ നേരിടേണ്ടി വരും!

ദുബൈ: (KVARTHA) യുഎഇ മാനവവിഭവശേഷി സ്വദേശിവൽക്കരണ മന്ത്രാലയം പുറപ്പെടുവിച്ച പുതിയ നിയമ പ്രകാരം സ്വകാര്യ മേഖലയിലെ എല്ലാ സ്ഥാപനങ്ങളും തങ്ങളുടെ ജീവനക്കാരുടെ മുൻമാസത്തെ ശമ്പളം കൃത്യമായി ഓരോ കലണ്ടർ മാസത്തിന്റെയും ഒന്നാം തീയതിക്കുള്ളിൽ തന്നെ നൽകിയിരിക്കേണ്ടത് നിർബന്ധമായിരിക്കുകയാണ്.  ജൂൺ ഒന്ന് മുതൽ ഈ നിയമം രാജ്യത്ത് ഔദ്യോഗികമായി പ്രാബല്യത്തിൽ വന്നു കഴിഞ്ഞു. 

ഇനി മുതൽ ഓരോ മാസത്തെയും ഒന്നാം തീയതി എന്നത് ശമ്പളം നൽകേണ്ട അവസാന തീയതിയായി കണക്കാക്കും. ഈ തീയതിക്ക് ശേഷം നൽകുന്ന എല്ലാ ശമ്പള വിതരണങ്ങളും നിയമപരമായി വൈകിയതായി മാത്രമേ മന്ത്രാലയം പരിഗണിക്കുകയുള്ളൂ. മന്ത്രാലയം അംഗീകരിച്ചിട്ടുള്ള ഡബ്ല്യുപിഎസ് സംവിധാനം വഴിയോ അല്ലെങ്കിൽ മറ്റ് അംഗീകൃത പേയ്‌മെന്റ് ചാനലുകൾ വഴിയോ മാത്രമേ തുക കൈമാറാൻ പാടുള്ളൂ.

നിരീക്ഷണ രീതി

പുതിയ നിയമപ്രകാരം ശമ്പള വിതരണത്തിന്റെ കൃത്യത ഉറപ്പാക്കാൻ മന്ത്രാലയം പുതിയൊരു കണക്കുകൂട്ടൽ രീതിയാണ് അവലംബിക്കുന്നത്. ഒരു കമ്പനി അതിന്റെ മൊത്തം ജീവനക്കാർക്ക് നൽകാനുള്ള ശമ്പളത്തിന്റെ കുറഞ്ഞത് എൺപത്തിയഞ്ച് ശതമാനമെങ്കിലും നിശ്ചിത തീയതിക്കുള്ളിൽ കൈമാറിയിട്ടുണ്ടെങ്കിൽ മാത്രമേ ആ സ്ഥാപനത്തെ നിയമം പാലിക്കുന്ന കമ്പനിയായി കണക്കാക്കൂ. 

അതുപോലെ തന്നെ ഒരു ജീവനക്കാരന് ലഭിക്കേണ്ട ശമ്പളത്തിന്റെ എൺപത്തിയഞ്ച് ശതമാനമെങ്കിലും ലഭിച്ചിട്ടുണ്ടെങ്കിൽ ആ വ്യക്തിക്ക് ശമ്പളം കുടിശ്ശികയായിട്ടില്ല എന്ന് താൽക്കാലികമായി വിലയിരുത്തും. എന്നാൽ ബാക്കി തുക വാങ്ങിയെടുക്കാനുള്ള ജീവനക്കാരന്റെ നിയമപരമായ അവകാശത്തെ ഇത് ബാധിക്കില്ല. ലേബർ നിയമപ്രകാരമുള്ള നിയമപരമായ പിടുത്തങ്ങൾ കുറച്ച ശേഷമുള്ള തുകയാണ് ഇതിനായി കണക്കിലെടുക്കുക.

കർശന നടപടികൾ

ശമ്പളം കൃത്യസമയത്ത് നൽകാത്ത കമ്പനികൾക്കെതിരെ ഘട്ടം ഘട്ടമായി ആറ് പ്രധാന നടപടികളാണ് മന്ത്രാലയം സ്വീകരിക്കാൻ പോകുന്നത്. ശമ്പളം നൽകേണ്ട ഒന്നാം തീയതി മുതൽ തന്നെ കമ്പനികളുടെ ശമ്പള വിതരണം മന്ത്രാലയം ഇലക്ട്രോണിക് സംവിധാനത്തിലൂടെ നിരീക്ഷിക്കാൻ തുടങ്ങും. ശമ്പളം വൈകുന്നതിന്റെ രണ്ടാം ദിവസം മുതൽ തന്നെ കമ്പനികൾക്ക് ശമ്പളം നൽകാൻ ആവശ്യപ്പെട്ടുകൊണ്ടുള്ള മുന്നറിയിപ്പുകളും അറിയിപ്പുകളും ഡിജിറ്റലായി ലഭിക്കും. 

മൂന്നാമത്തെ നടപടിയായി നിയമം ലംഘിക്കുന്ന കമ്പനികൾക്ക് പുതിയ വർക്ക് പെർമിറ്റുകൾ നൽകുന്നത് മന്ത്രാലയം താൽക്കാലികമായി നിർത്തിവെയ്ക്കും. നാലാമതായി ഇതിന്റെ കാരണങ്ങൾ വ്യക്തമാക്കിക്കൊണ്ട് തൊഴിലുടമയ്ക്ക് ഔദ്യോഗികമായി മന്ത്രാലയം നോട്ടീസ് അയക്കും. അഞ്ചാം ദിവസവും ശമ്പളം വിതരണം ചെയ്തില്ലെങ്കിൽ സ്ഥാപനത്തിന് അവസാനമായി ഔദ്യോഗിക പേയ്‌മെന്റ് മുന്നറിയിപ്പ് നൽകുകയും പതിനൊന്നാം ദിവസം മുതൽ വൻ തുക അഡ്മിനിസ്ട്രേറ്റീവ് പിഴയായി ഈടാക്കുകയും ചെയ്യും. ആറ് മാസത്തിനുള്ളിൽ ഇതേ തെറ്റ് ആവർത്തിക്കുന്ന കമ്പനികളെ താഴ്ന്ന കാറ്റഗറിയിലേക്ക് മാറ്റുകയും ചെയ്യും.

നിയമപരമായ തർക്കങ്ങൾ

അവസാന മുന്നറിയിപ്പ് കാലാവധിയും കഴിഞ്ഞ് പതിനാറാം ദിവസത്തിലേക്ക് കടന്നിട്ടും ശമ്പളം വിതരണം ചെയ്യാത്ത കമ്പനികൾക്കെതിരെ മന്ത്രാലയം സ്വമേധയാ നിയമനടപടികൾ ആരംഭിക്കും. ഇരുപത്തഞ്ചോ അതിലധികമോ ജീവനക്കാരുള്ള നിർമ്മാണം, ഗതാഗതം, സുരക്ഷാ സേവനങ്ങൾ, ക്ലീനിംഗ്, റിക്രൂട്ട്‌മെന്റ് ഏജൻസികൾ തുടങ്ങിയ മേഖലകളിലെ കമ്പനികളിൽ ശമ്പളം മുടങ്ങിയാൽ മന്ത്രാലയം നേരിട്ട് ജീവനക്കാർക്കായി വ്യക്തിഗതമോ കൂട്ടായതോ ആയ ലേബർ തർക്ക കേസുകൾ രജിസ്റ്റർ ചെയ്യും. 

ഇരുപത്തിയൊന്നാം ദിവസവും ശമ്പളം നൽകിയില്ലെങ്കിൽ അൻപതിൽ താഴെ ജീവനക്കാരുള്ള കമ്പനികൾക്കെതിരെ പണം ഈടാക്കാനുള്ള എക്സിക്യൂട്ടീവ് നടപടികളും അതിൽ കൂടുതൽ ആളുകളുള്ള കമ്പനികൾക്കെതിരെ കൂട്ടായ നിയമ തർക്ക നടപടികളും ആരംഭിക്കുന്നതാണ്. ഇതിലൂടെ കമ്പനിയുടെ ആസ്തികൾ കണ്ടുകെട്ടാനും ഉത്തരവാദികളായ ഉദ്യോഗസ്ഥർക്ക് യാത്രാവിലക്ക് ഏർപ്പെടുത്താനും കേസ് പബ്ലിക് പ്രോസിക്യൂഷന് കൈമാറാനും നിയമമുണ്ട്.

പ്രത്യേക ഇളവുകൾ

ഈ കർശനമായ ശമ്പള നിരീക്ഷണ പരിധിയിൽ നിന്നും ചില പ്രത്യേക സാഹചര്യങ്ങളിലുള്ള പതിനൊന്ന് തരം ജീവനക്കാരെയും സ്ഥാപനങ്ങളെയും മന്ത്രാലയം ഒഴിവാക്കിയിട്ടുണ്ട്. കോടതിയുടെ പരിഗണനയിലുള്ള ലേബർ കേസുകളിൽ ഉൾപ്പെട്ട ജീവനക്കാർ, ജോലിക്ക് വരാതെ ഒളിവിൽ പോയതായി റിപ്പോർട്ട് ചെയ്യപ്പെട്ടവർ, ഔദ്യോഗികമായി ജയിലിലോ മറ്റ് തടങ്കലിലോ കഴിയുന്നവർ, മുൻകൂട്ടി അനുവാദം വാങ്ങിയ ശമ്പളമില്ലാത്ത ലീവിൽ നാട്ടിൽ പോയവർ എന്നിവർ ഇതിൽ ഉൾപ്പെടുന്നു. 

കൂടാതെ കപ്പലുകളിൽ ജോലി ചെയ്യുന്ന നാവികർ, മൂന്ന് മാസത്തിൽ താഴെ കാലാവധിയുള്ള മിഷൻ വിസയിലുള്ളവർ, വിദേശ കമ്പനികളുടെ യുഎഇ ശാഖകളിൽ ജോലി ചെയ്യുകയും വിദേശത്ത് നിന്ന് ശമ്പളം വാങ്ങുകയും ചെയ്യുന്നവർ എന്നിവർക്കും ഇളവുണ്ട്. സ്വദേശികളുടെ ഉടമസ്ഥതയിലുള്ള ഫിഷിംഗ് ബോട്ടുകൾ, ടാക്സികൾ, ബാങ്കുകൾ, മറ്റ് ധനകാര്യ സ്ഥാപനങ്ങൾ, ആരാധനാലയങ്ങൾ എന്നിവയെയും ഈ ഡബ്ല്യുപിഎസ് കണക്കുകൂട്ടലുകളിൽ നിന്നും താൽക്കാലികമായി ഒഴിവാക്കിയിട്ടുണ്ട്.

സുതാര്യമായ കൈമാറ്റം

യുഎഇ സെൻട്രൽ ബാങ്കും ലേബർ മന്ത്രാലയവും സംയുക്തമായി നിയന്ത്രിക്കുന്ന ഇലക്ട്രോണിക് സംവിധാനമായ ഡബ്ല്യുപിഎസ് വഴി മാത്രമേ ജീവനക്കാരുടെ ശമ്പളം കൈമാറാൻ പാടുള്ളൂ. അംഗീകൃത ബാങ്കുകൾ, എക്സ്ചേഞ്ച് ഹൗസുകൾ, ലൈസൻസുള്ള മറ്റ് ധനകാര്യ സ്ഥാപനങ്ങൾ എന്നിവ വഴി മാത്രമേ ഈ ഇടപാടുകൾ നടത്താൻ അനുവാദമുള്ളൂ. 

കമ്പനികൾ തങ്ങളുടെ കരാറിൽ പറഞ്ഞിട്ടുള്ള കൃത്യമായ തുക ജീവനക്കാരന് നൽകുന്നുണ്ടോ എന്ന് ഉറപ്പുവരുത്താൻ മന്ത്രാലയത്തെ സഹായിക്കുന്നത് ഈ ഡാറ്റാബേസ് ആണ്. കരാർ പ്രകാരം യുഎഇ ദിർഹത്തിലോ അല്ലെങ്കിൽ ഇരുപൂട്ടരും സമ്മതിച്ച മറ്റ് വിദേശ കറൻസികളിലോ ശമ്പളം നൽകാവുന്നതാണ്. ഈ സംവിധാനം പുതിയതായി ചില നിർദ്ദിഷ്ട ഗാർഹിക തൊഴിലാളികളുടെ മേഖലയിലേക്കും നിർബന്ധമാക്കിയിട്ടുണ്ട്. ശമ്പളം വൈകുന്ന പക്ഷം ജീവനക്കാർക്ക് മന്ത്രാലയത്തിന്റെ ഔദ്യോഗിക ചാനലുകൾ വഴി നേരിട്ട് പരാതി നൽകാനുള്ള പൂർണ അവകാശമുണ്ട്.

പ്രവാസികൾക്ക് ഉപകാരപ്രദമാകുന്ന ഈ തൊഴിൽ വാർത്ത നിങ്ങളുടെ സുഹൃത്തുക്കൾക്കും ഗ്രൂപ്പുകകളിലും ഷെയർ ചെയ്യുക. കൂടുതൽ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: The UAE Ministry of Human Resources has made it mandatory for private sector employers to pay salaries by the 1st of every month starting June 1, with strict penalties including travel bans and asset confiscation for non-compliance.

#UAELabourLaw #DubaiNews #SalaryUpdateUAE #MOHRE #KeralaToGulf #MalayalamNews #WPSUAE