Become entrepreneur| സാധാരണക്കാരെ സംരംഭകരാകാന്‍ ക്ഷണിച്ച് തൃശൂര്‍ വ്യവസായ വകുപ്പ്

തൃശൂര്‍: (www.kvartha.com) കേരളത്തില്‍ വ്യവസായം ആരംഭിക്കാനും വ്യവസായ സ്ഥാപനങ്ങള്‍ നടത്താനും നിയമങ്ങളുടെ നൂലാമാലകള്‍ അനുവദിക്കുന്നില്ലെന്ന പതിവ് പ്രചാരണങ്ങളെ കാറ്റില്‍പറത്തി സാധാരണക്കാര്‍ക്കും സംരംഭകരാകാനുള്ള അവസരങ്ങള്‍ ഒരുക്കുകയാണ് ജില്ലാ വ്യവസായവകുപ്പ്. ഇതിന്റെ ഭാഗമായി ജില്ലാ വ്യവസായകേന്ദ്രവും ജില്ലാ ലീഗല്‍ സര്‍വീസ് അതോറിറ്റിയും ചേര്‍ന്ന് ജില്ലാ വ്യവസായകേന്ദ്രത്തില്‍ പാരാ ലീഗല്‍ വോളന്റിയേഴ്സിന് വേണ്ടി സ്വയംതൊഴില്‍ സംരംഭകസാധ്യതകള്‍ എന്ന വിഷയത്തില്‍ ട്രെയിനിങ് പ്രോഗ്രാം നടത്തി.

രാജ്യത്തിന്റെ പുരോഗതി നിര്‍ണയിക്കുന്നവരാണ് സംരംഭകരെന്ന് ഉദ്ഘാടനം നിര്‍വഹിച്ച ഡിഎല്‍എസ്എ സെക്രടറിയും സബ് ജഡ്ജുമായ ടി മഞ്ജിത് പറഞ്ഞു. സ്വപ്നങ്ങളെ പിന്തുടരുകയും യശസിന് വേണ്ടി പരിശ്രമിക്കുകയും ചെയ്യേണ്ടത് ഭരണഘടനാപരമായ അവകാശമാണെന്നും അദ്ദേഹം കൂട്ടിച്ചേര്‍ത്തു. സംരംഭകരുടെ അനന്തസാധ്യതകളെപ്പറ്റി ജില്ലാ വ്യവസായകേന്ദ്രം ജെനറല്‍ മാനേജര്‍ ഡോ.കെ എസ് കൃപകുമാര്‍ അധ്യക്ഷപ്രസംഗത്തില്‍ സംസാരിച്ചു.

സബ് ഡിസ്ട്രിക്ട് ഇന്‍ഡസ്ട്രിയല്‍ ഓഫിസര്‍ അജിത്കുമാര്‍ പദ്ധതികളെയും സേവനങ്ങളെയും പറ്റി ക്ലാസ് നയിച്ചു. സംരംഭകര്‍ക്കായുള്ള സൗജന്യ നിയമസേവനം, നിയമസാക്ഷരത എന്നിവ പ്രതിപാദിച്ചു.