Industrial Park | തലശേരി വ്യവസായ പാര്‍കില്‍ അടച്ചുപൂട്ടിയ വ്യവസായ സ്ഥാപനം തുറന്നു: നഗരസഭയുമായി ഏറ്റുമുട്ടലിനില്ലെന്ന് കാണാതായ ദമ്പതികള്‍

കണ്ണൂര്‍: (www.kvartha.com) അനധികൃത കൈയേറ്റമാരോപിച്ച് പാനൂര്‍ താഴെ ചമ്പാട്ടെ ദമ്പതികളുടെ ഒരുമാസമായി പൂട്ടിക്കിടന്ന വ്യവസായ സ്ഥാപനം ശനിയാഴ്ച രാവിലെ മുതല്‍ തുറന്നു പ്രവര്‍ത്തിച്ചു. തലശ്ശേരി കണ്ടിക്കലിലെ വ്യവസായ പാര്‍കില്‍ പ്രവര്‍ത്തിച്ചിരുന്ന ഫര്‍ണിചര്‍ സ്ഥാപനമാണ് വീണ്ടും തുറന്നത്. ശനിയാഴ്ച രാവിലെ 10. 30 ഓടെയാണ് സ്ഥാപനം തുറന്നത്. നഗരസഭാ റവന്യൂ അധികൃതര്‍ നേരിട്ടെത്തി സ്ഥാപനത്തിന്റെ താക്കോല്‍ ഉടമയായ ശ്രീവിദ്യയ്ക്ക് കൈമാറുകയായിരുന്നു. വ്യവസായമന്ത്രി പി രാജീവിന്റെ ഇടപെടലാണ് പ്രശ്നപരിഹാരത്തിന് വഴി തുറന്നത്.

ഫണ്‍ ഫര്‍ണിചര്‍ സ്ഥാപനത്തിന്റെ മുന്‍പില്‍ മഴവെള്ളം കയറാതിരിക്കാനായി ആറുമീറ്റര്‍ നീളത്തില്‍ ഷീറ്റിട്ടതിനാണ് തലശേരി നഗരസഭ സ്ഥാപന ഉടമകളായ രാജ് കബീറിനും ഭാര്യ ശ്രീദിവ്യയ്ക്കും നാലുലക്ഷത്തിലേറെ രൂപ പിഴയിട്ടത്. എന്നാല്‍ ഇതടയ്ക്കാന്‍ തയാറാകാതെ ഇവര്‍ ഹൈകോടതിയെ സമീപിച്ച് ഇളവുവാങ്ങുകയായിരുന്നു.

ഇതു പ്രകാരം അടയ്ക്കാനുള്ള 41,600 രൂപയുടെ ചെക് ഉടമകള്‍ നേരത്തെ നല്‍കിയിരുന്നു. ഇതിനിടെ വിവാദങ്ങള്‍ ഒതുക്കി തീര്‍ക്കാനുള്ള സി പി എം കണ്ണൂര്‍ ജില്ലാ നേതൃത്വത്തിന്റെ നിര്‍ദേശപ്രകാരം തലശേരിയിലെ പ്രാദേശിക നേതൃത്വം ദമ്പതികളെ സന്ദര്‍ശിക്കുകയും ഇവരുടെ പരാതികള്‍ ചോദിച്ചറിഞ്ഞ് ഇനി നഗരസഭയുടെ ഭാഗത്തു നിന്നും യാതൊരു ശല്യവും ഉണ്ടാകില്ലെന്ന ഉറപ്പും നല്‍കിയിരുന്നു.

ഇതോടെയാണ് കഴിഞ്ഞ കുറച്ചു ദിവസങ്ങളായി പുകഞ്ഞു കൊണ്ടിരുന്ന വ്യവസായസ്ഥാപനം അടച്ചുപൂട്ടിയ വിവാദം തണുത്തു തുടങ്ങിയത്. ഇതിനിടെ തങ്ങള്‍ക്ക് തലശേരി നഗരസഭയോട് യാതൊരു വിരോധവുമില്ലെന്ന് കാണാതായ ദമ്പതികള്‍ പറഞ്ഞു.