ഉപഭോക്താക്കള്‍ക്ക് സന്തോഷവാര്‍ത്ത: സ്പെക്ട്രം ലേലം ഉടന്‍ നടത്തും; 5ജി സേവനം വര്‍ഷാവസാനത്തോടെ ആരംഭിക്കും
Mar 25, 2022, 20:53 IST
ന്യൂഡെല്‍ഹി: (www.kvartha.com 25.03.2022) സ്പെക്ട്രം ലേലം ഉടന്‍ നടത്തുമെന്നും അഞ്ചാം തലമുറ (5G) സേവനങ്ങള്‍ ഈ വര്‍ഷാവസാനം ആരംഭിക്കുമെന്ന് പ്രതീക്ഷിക്കുന്നതായും വാര്‍ത്താവിനിമയ സഹമന്ത്രി ദേവുസിന്‍ ചൗഹാന്‍ വെള്ളിയാഴ്ച രാജ്യസഭയില്‍ പറഞ്ഞു.
ചോദ്യോത്തര വേളയില്‍ ഒരു അനുബന്ധ ചോദ്യത്തിന് മറുപടിയായാണ് ചൗഹാന്‍ ഇക്കാര്യം വ്യക്തമാക്കിയത്. ട്രയല്‍ നടത്തുന്നതിന് നാല് കംപനികള്‍ക്ക് സ്പെക്ട്രം അനുവദിച്ചിട്ടുണ്ടെന്നും ട്രയലുകള്‍ ഉടന്‍ പൂര്‍ത്തിയാകുമെന്ന് പ്രതീക്ഷിക്കുന്നതായും അദ്ദേഹം കൂട്ടിച്ചേര്‍ത്തു.
വരാനിരിക്കുന്ന ലേലവുമായി ബന്ധപ്പെട്ട ശുപാര്‍ശകള്‍ നല്‍കാന്‍ ടെലികോം നിയന്ത്രണ ബോഡിയായ ട്രായിയോടും ആവശ്യപ്പെട്ടിട്ടുണ്ടെന്നും മന്ത്രി പറഞ്ഞു. സംസ്ഥാന സര്‍കാര്‍ ഉടമസ്ഥതയിലുള്ള ഭാരത് സഞ്ചാര്‍ നിഗം ലിമിറ്റഡ് (BSNL) ഈ വര്‍ഷം 4 ജി സേവനങ്ങള്‍ ആരംഭിക്കുമെന്നും മന്ത്രി ഉറപ്പുനല്‍കി.
ഏഴ് വര്‍ഷമായി ടെലികോം മേഖലയില്‍ വലിയ വിപ്ലവമാണ് ഉണ്ടായതെന്നും താരിഫുകള്‍ ഏറ്റവും താഴ്ന്ന നിലയിലായതിനാല്‍ ഡാറ്റ ഉപയോഗം കുതിച്ചുയര്‍ന്നിട്ടുണ്ടെന്നും മന്ത്രി ചൂണ്ടിക്കാട്ടി. ശക്തമായ പൊതു പരാതി സംവിധാനം നിലവിലുണ്ട്. പരാതി ലഭിച്ചിട്ട് 48 മണിക്കൂറിലധികം കഴിഞ്ഞിട്ടും പരിഹരിക്കാത്ത പരാതികള്‍ മുതിര്‍ന്ന ഉദ്യോഗസ്ഥരെ അറിയിക്കുന്നുണ്ടെന്നും ചൗഹാന്‍ പറഞ്ഞു.
പൊതുമേഖലാ ടെലികോം സ്ഥാപനങ്ങളായ ബിഎസ്എന്‍എല്‍, എംടിഎന്‍എല്‍ എന്നിവയെ പുനരുജ്ജീവിപ്പിക്കാന്‍ സര്‍കാര്‍ നിരവധി നടപടികള്‍ സ്വീകരിച്ചിട്ടുണ്ട്. സര്‍കാര്‍ ഉടമസ്ഥതയിലുള്ള കോര്‍പറേഷന്‍ 4ജി സേവനങ്ങള്‍ ആരംഭിക്കുന്നതോടെ ബിഎസ്എന്‍എല്‍ സേവനങ്ങളുടെ ഗുണനിലവാരവും മെച്ചപ്പെടുമെന്നും അദ്ദേഹം അറിയിച്ചു.
2020-21 വര്‍ഷത്തില്‍ രാജ്യത്തെ മൊബൈല്‍ വരിക്കാരുടെ എണ്ണത്തില്‍ കുറവുണ്ടായിട്ടില്ലെന്ന് കമ്യൂണികേഷന്‍ മന്ത്രി അശ്വിനി വൈഷ്ണവ് രേഖാമൂലമുള്ള മറുപടിയില്‍ പറഞ്ഞു. ട്രായ് പുറത്തുവിട്ട പ്രതിമാസ ടെലികോം വരിക്കാരുടെ ഡാറ്റ പ്രകാരം, രാജ്യത്തെ മൊബൈല്‍ വരിക്കാരുടെ എണ്ണം 2020 മാര്‍ചില്‍ 1,157.75 ദശലക്ഷത്തില്‍ നിന്ന് 2021 മാര്‍ചില്‍ 1,180.96 ദശലക്ഷമായി ഉയര്‍ന്നു.
സേവനത്തിന്റെ ഗുണനിലവാരം മെച്ചപ്പെടുത്തുന്നതിനായി, മൊബൈല്‍ സേവന ദാതാക്കള്‍ പതിവായി ഡ്രൈവ് ടെസ്റ്റും റേഡിയോ ഫ്രീക്വന്‍സി ഒപ്റ്റിമൈസേഷനും നടത്തുന്നുണ്ടെന്നും അദ്ദേഹം പറഞ്ഞു.
Keywords: Spectrum auction to be conducted soon; 5G service to be launched by year-end: Govt, New Delhi, News, Technology, Business, Minister, Rajya Sabha, National.
ഇവിടെ വായനക്കാർക്ക് അഭിപ്രായങ്ങൾ
രേഖപ്പെടുത്താം. സ്വതന്ത്രമായ
ചിന്തയും അഭിപ്രായ പ്രകടനവും
പ്രോത്സാഹിപ്പിക്കുന്നു. എന്നാൽ
ഇവ കെവാർത്തയുടെ അഭിപ്രായങ്ങളായി
കണക്കാക്കരുത്. അധിക്ഷേപങ്ങളും
വിദ്വേഷ - അശ്ലീല പരാമർശങ്ങളും
പാടുള്ളതല്ല. ലംഘിക്കുന്നവർക്ക്
ശക്തമായ നിയമനടപടി നേരിടേണ്ടി
വന്നേക്കാം.
