Deal | പേ ടിഎം വിനോദ ടിക്കറ്റ് ബിസിനസ് സൊമാറ്റോയ്ക്ക് വിറ്റു; 2,048 കോടി രൂപയുടെ ഇടപാട്; മാറ്റങ്ങൾ ഇങ്ങനെ 

ന്യൂഡൽഹി: (KVARTHA ) ഓൺലൈൻ പേയ്‌മെന്റ് പ്ലാറ്റ്‌ഫോമായ പേ ടിഎം (Pay TM) വിനോദ ടിക്കറ്റിംഗ് ബിസിനസ്, ഭക്ഷണ വിതരണ കമ്പനിയായ സൊമാറ്റോയ്ക്ക് വിറ്റു. 2,048 കോടി രൂപയ്ക്കാണ് ഇടപാട് നടന്നത്. ബുധനാഴ്ച  നടത്തിയ പ്രഖ്യാപനത്തിന് ശേഷം പേ ടിഎം ഓഹരികളിൽ അഞ്ച് ശതമാനം വർധന രേഖപ്പെടുത്തി. ബിഎസ്ഇയിൽ വ്യാപാര ആരംഭത്തിൽ പേ ടിഎം ഓഹരി 5.47% വർധിച്ച് 604.45 രൂപയിലെത്തി. എന്നാൽ, കുറച്ച് സമയം കഴിഞ്ഞപ്പോൾ ഓഹരി വിലയിൽ നേരിയ ഇടിവ് സംഭവിച്ചു. 

സമാനമായി, സൊമാറ്റോ ഓഹരികളിലും വർധന രേഖപ്പെടുത്തി. സൊമാറ്റോ ഓഹരികൾ 2.71% ഉയർന്ന് 267.00 രൂപയിലെത്തി. ബുധനാഴ്ച വാർത്താക്കുറിപ്പിലൂടെയാണ് സൊമാറ്റോ ഈ ഏറ്റെടുക്കൽ പ്രഖ്യാപിച്ചത്. പേ ടിഎമ്മിന്റെ മാതൃസ്ഥാപനമായ ഒൺ97 കമ്മ്യൂണിക്കേഷൻസ് ലിമിറ്റഡിൽ നിന്ന് വിനോദ ടിക്കറ്റ് ബിസിനസ് ഏറ്റെടുക്കുന്നതിനുള്ള കരാറിലെത്തുമെന്ന് കമ്പനി വ്യക്തമാക്കി.

ഈ ഇടപാടിൽ, പേ ടിഎമ്മിന്റെ വിനോദ ടിക്കറ്റ് ബിസിനസ് നടത്തുന്ന രണ്ട് പൂർണ ഉടമസ്ഥതയിലുള്ള  ഉപസ്ഥാപനങ്ങളായ വേസ്റ്റ്‌ലാൻഡ് എന്റർടെയിൻമെന്റ് പ്രൈവറ്റ് ലിമിറ്റഡ് (WEPL), ഓർബ്ജെൻ ടെക്‌നോളജീസ് പ്രൈവറ്റ് ലിമിറ്റഡ് (OTPL) എന്നിവ 2,048 കോടി രൂപയ്ക്ക് സൊമാറ്റോ  ഏറ്റെടുക്കും. കൂടാതെ  ഏകദേശം 280 ജീവനക്കാരും സൊമാറ്റോയിലേക്ക് മാറും. ഈ ഏറ്റെടുക്കൽ 90 ദിവസത്തിനുള്ളിൽ പൂർത്തിയാകും. ആദ്യ 12 മാസക്കാലം സിനിമകൾ, കായിക ഇവന്റുകൾ എന്നിവയുടെ ടിക്കറ്റ് പേ ടിഎം ആപ്പിൽ ലഭ്യമായിരിക്കും.

#Paytm #Zomato #acquisition #India #tech #business #fooddelivery