സേവന മേഖലയിൽ ദേശീയ ശരാശരിയേക്കാൾ മുന്നിൽ കേരളം; നിതി ആയോഗ് കണക്കുകൾക്ക് പിന്നിലെ വസ്തുതകൾ

തിരുവനന്തപുരം: (KVARTHA) സാങ്കേതികവിദ്യയുടെയും നിർമിത ബുദ്ധിയുടെയും വളർച്ച തൊഴിൽ മേഖലയിൽ മാറ്റങ്ങൾ വരുത്തുന്ന സാഹചര്യത്തിൽ, യുവജനങ്ങൾക്ക് നാട്ടിൽ തന്നെ തൊഴിൽ ഉറപ്പാക്കുന്നതിനുള്ള പദ്ധതികൾക്ക് പ്രിയമേറുന്നു. നൈപുണ്യ പരിശീലന പരിപാടികളിലൂടെയും വ്യവസായ പാർക്കുകളിലൂടെയും കൂടുതൽ അവസരങ്ങൾ സൃഷ്ടിക്കാൻ കേരളം ലക്ഷ്യമിടുന്ന സാഹചര്യത്തിലാണിത്.

വർധിക്കുന്ന പ്രൊഫഷണൽ തൊഴിൽ ശക്തി

ലിങ്ക്ഡ്ഇൻ ടാലന്റ് ഇൻസൈറ്റ്സ് റിപ്പോർട്ട് പ്രകാരം കഴിഞ്ഞ അഞ്ച് വർഷത്തിനിടെ കേരളത്തിലെ പ്രൊഫഷണൽ തൊഴിൽ ശക്തിയിൽ 172 ശതമാനം വളർച്ചയുണ്ടായി. സോഫ്റ്റ്‌വെയർ എഞ്ചിനീയർമാർ, അക്കൗണ്ടന്റുമാർ, അധ്യാപകർ എന്നിവരാണ് ഈ മേഖലയിൽ പ്രധാനമായും മുന്നേറ്റം നടത്തുന്നത്. ഗ്രാമീണ മേഖലകളിലേക്ക് വൻകിട കമ്പനികൾ എത്തുന്നതിന്റെ ഭാഗമായി സോഹോ കോർപ്പറേഷൻ കൊട്ടാരക്കരയിൽ കേന്ദ്രം ആരംഭിച്ചിരുന്നു. കേന്ദ്രസർക്കാർ സ്ഥാപനങ്ങളിലും മന്ത്രിമാർ ഉൾപ്പെടെയുള്ളവരും ഇമെയിൽ ഉൾപ്പെടെയുള്ള സേവനങ്ങൾക്ക് സോഹോ കമ്പനിയെയാണ് ഈയടുത്ത കാലം മുതൽ ആശ്രയിക്കുന്നത്.   

വ്യവസായ പാർക്കുകളും നിക്ഷേപവും

പെരുമ്പാവൂരിലെ കിൻഫ്ര പാർക്കിൽ കെയ്ൻസ് ടെക്നോളജി ഉത്പാദന യൂണിറ്റ് സ്ഥാപിക്കുന്നുണ്ട്. ഇതിന്റെ ആദ്യ ഘട്ടത്തിൽ അമേരിക്കയിൽ നിന്ന് മടങ്ങിയെത്തിയ നാല് പ്രൊഫഷണലുകൾ ഉൾപ്പെടെ നൂറോളം പേർക്ക് തൊഴിൽ ലഭിച്ചു. പദ്ധതി പൂർത്തിയാകുമ്പോൾ 1500 പേർക്ക് ഇവിടെ തൊഴിൽ ലഭിക്കുമെന്നാണ് പ്രതീക്ഷിക്കുന്നത്. കൂടാതെ കാക്കനാട് വി-ഗാർഡ് സ്ഥാപിച്ച ഗവേഷണ കേന്ദ്രം 400 പേർക്ക് അവസരമൊരുക്കുന്നു. കഴിഞ്ഞ മൂന്ന് വർഷത്തിനിടെ കിൻഫ്ര വഴി 27,335 തൊഴിലവസരങ്ങൾ സൃഷ്ടിക്കപ്പെട്ടതായും കണക്കുകൾ വ്യക്തമാക്കുന്നു.

സേവന മേഖലയിലെ മുന്നേറ്റം

നിതി ആയോഗ് റിപ്പോർട്ട് പ്രകാരം കേരളം സേവന മേഖലയിൽ മികച്ച നിലവാരം പുലർത്തുന്നുണ്ട്. പീരിയോഡിക് ലേബർ ഫോഴ്സ് സർവ്വേ (PLFS) അനുസരിച്ച് സംസ്ഥാനത്തെ സേവനമേഖലയിലെ തൊഴിൽ ശക്തി 48.5 ശതമാനമായി ഉയർന്നു. ദേശീയ ശരാശരിയായ 29.7 ശതമാനത്തേക്കാൾ മുകളിലാണിത്. വിദ്യാഭ്യാസം, ആരോഗ്യപരിരക്ഷ, വിനോദസഞ്ചാരം എന്നിവയാണ് പ്രധാന മേഖലകൾ.

നൈപുണ്യ വികസനവും സ്റ്റാർട്ടപ്പുകളും

അക്കൗണ്ടിംഗ്, ഓഡിറ്റിംഗ് മേഖലകളിൽ അന്താരാഷ്ട്ര തൊഴിൽ സാധ്യതകൾ പ്രയോജനപ്പെടുത്താൻ അസാപും സ്റ്റാർട്ടപ്പ് മിഷനും ചേർന്ന് ലീപ് സെന്ററുകൾ ആരംഭിച്ചിട്ടുണ്ട്. അമേരിക്കയിലെ എൻറോൾഡ് ഏജന്റ് ആകാനുള്ള പരിശീലനവും ഇതിൽ ഉൾപ്പെടുന്നു. നിലവിൽ അയ്യായിരത്തിലധികം സ്റ്റാർട്ടപ്പുകൾ കേരളത്തിൽ രജിസ്റ്റർ ചെയ്തിട്ടുണ്ട്. കോളേജുകളിലെ ഇന്നൊവേഷൻ സെന്ററുകൾ (IEDCs), ഐഡിയ ഫെസ്റ്റ്, സീഡ് ലോണുകൾ എന്നിവയിലൂടെ യുവ സംരംഭകർക്ക് സാമ്പത്തിക പിന്തുണയും കേരള സർക്കാർ ഉറപ്പാക്കുന്നതിനാൽ കൂടുതൽ പ്രതീക്ഷളാണ് ഈ മേഖയിലുള്ളത്.

കേരളത്തിന്റെ തൊഴിൽ വിപണിയിലെ ഈ വലിയ മാറ്റത്തെക്കുറിച്ച് നിങ്ങളുടെ അഭിപ്രായം ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താനും മറക്കരുത്. ഐടി - സേവന മേഖലകളിൽ ജോലി ആഗ്രഹിക്കുന്ന നിങ്ങളുടെ സുഹൃത്തുക്കൾക്കായി ഈ വിവരം ഷെയർ ചെയ്യൂ. 📢 കേരളത്തിലെ തൊഴിൽ - വ്യവസായ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക.

Article Summary: Kerala leads India in service sector jobs with 48.5% workforce, as per NITI Aayog.

#KeralaJobs #ServiceSector #NITIAayog #StartupsKerala #KINFRA #BreakingNews #Kvartha