കേരള ബാങ്കിനെ പിടിച്ചുകുലുക്കി 'സാരി വിവാദം'; സുവർണ വിജയം ആഘോഷിച്ചപ്പോൾ ജീവനക്കാർ കലിപ്പിൽ

തിരുവനന്തപുരം: (KVARTHA) കേരള ബാങ്കിൽ സ്വർണ വായ്പ 'ഗോൾഡൻ ഡേയ്‌സ്' ക്യാമ്പയിൻ (gold loan campaign) വൻ വിജയമായി. കൃത്യം 48 ദിവസം കൊണ്ട് 1021 കോടി രൂപ പിരിച്ചെടുത്ത് ബാങ്ക് ചരിത്രം കുറിച്ചു. പക്ഷേ, ഈ വിജയത്തിന്റെ പടികടന്നെത്തിയ സന്തോഷം ഒരു സാരിയിൽ ഉടക്കി കരിഞ്ഞ മുഖങ്ങളായി മാറിയെന്നാണ് ജീവനക്കാരുടെ പക്ഷം. ഹെഡ് ഓഫീസിൽ നടന്ന വിജയാഘോഷ ചടങ്ങ് അൻപത് വനിതാ ജീവനക്കാർക്ക് സൗജന്യ സാരി നൽകിയത് വിവാദമായി മാറിയിരിക്കുകയാണ്.

ബാങ്കിന്റെ നേട്ടങ്ങൾ ആഘോഷിക്കാൻ സഹകരണ വകുപ്പ് മന്ത്രി വി.എൻ. വാസവൻ തന്നെ നേരിട്ടെത്തി. കേക്ക് മുറിച്ചും ഗ്രൂപ്പ് ഫോട്ടോയെടുത്തും ആഘോഷം വർണ്ണാഭമാക്കാനായിരുന്നു മാനേജ്‌മന്റ് ലക്ഷ്യമിട്ടത്. എന്നാൽ, ഈ ഫോട്ടോയിലെ 'അൻപത് മുഖങ്ങൾ' ബാങ്കിന്റെ 5000-ത്തോളം വരുന്ന ജീവനക്കാരുടെ നെഞ്ചിൽ ഒരു കല്ല് പോലെയായി മാറിയെന്ന് പറഞ്ഞാൽ അതിശയോക്തിയാവില്ല. കാരണം, ഈ അൻപത് പേരും തിരുവനന്തപുരം ജില്ലയിൽ നിന്നും, കൂടുതലും ഹെഡ് ഓഫീസിൽ നിന്നും മാത്രമുള്ളവരായിരുന്നു. ഇവർക്ക് മാത്രമായി ബാങ്കിന്റെ ചിലവിൽ സാരി വാങ്ങി നൽകിയതാണ് വിവാദങ്ങളുടെ തുടക്കം.

സ്‌പെഷ്യൽ ഫോട്ടോഷൂട്ടിനായി പ്രത്യേകം തിരഞ്ഞെടുക്കപ്പെട്ട 50 വനിതകൾ (ഹെഡ് ഓഫീസിൽ നിന്ന് മുപ്പതും, തിരുവനന്തപുരം ജില്ലാ ഓഫീസിൽ നിന്ന് ഇരുപതും) സാരിയുടുത്ത് സന്തോഷത്തോടെ ഫോട്ടോയ്ക്ക് പോസ് ചെയ്തപ്പോൾ, സംസ്ഥാനത്തെ മറ്റ് പതിമൂന്ന് ജില്ലകളിലെ ശാഖകളിൽ കഷ്ടപ്പെട്ട് സ്വർണ്ണ പണയ വായ്‌പാ ടാർഗെറ്റ് നേടിയ ജീവനക്കാർക്ക് നിരാശ മാത്രമാണ് ബാക്കിയായത്.

'വെയിലത്ത് ടാർഗറ്റ് നേടിയവരെ നോക്കാതെ, ഫോട്ടോ ഷൂട്ടിന് വേണ്ടി സൗജന്യ സാരി ഉടുത്തവരെ ആദരിച്ചത് അനീതിയാണ്' എന്ന് ജീവനക്കാരുടെ സംഘടനകൾ മാനേജ്‌മെന്റിന് നൽകിയ പ്രതിഷേധ കത്തിൽ പറയുന്നു. പ്രതിഷേധക്കാർക്കിടയിൽ ഒരു തമാശയുണ്ട്. 'സാരി കിട്ടിയവരിൽ ഭൂരിഭാഗം പേരും വ്യക്തിപരമായി അവർക്ക് നൽകിയ ടാർഗെറ്റിന്റെ പകുതി പോലും പൂർത്തിയാക്കിയിട്ടില്ലെന്നാണ് ആക്ഷേപം.

സംഘടനകൾ ഇപ്പോൾ ഒരു മനസ്സോടെയാണ് നീങ്ങുന്നത്. കേരള ബാങ്ക് എംപ്ലോയീസ് ഫെഡറേഷനും എംപ്ലോയീസ് കോൺഗ്രസ്സും ഒരുപോലെ പ്രതിഷേധം അറിയിച്ചിട്ടുണ്ട്. കേരള ബാങ്കിലെ മുഴുവൻ ജീവനക്കാർക്കും വസ്ത്രം നൽകണമെന്ന് ഫെഡറേഷൻ കത്ത് നൽകാൻ തീരുമാനിച്ചിട്ടുണ്ട്. 'ഒരു മനസ്സോടെ ഒന്നിച്ചപ്പോൾ കിട്ടിയ നേട്ടത്തിന് ജീവനക്കാർക്കിടയിൽ വിള്ളലും വിഭാഗീയതയും ഉണ്ടാക്കിയ ഇത്തരം തീരുമാനങ്ങൾ ബാങ്ക് ഹെഡ് ഓഫീസിലെ ഉപജാപക സംഘത്തിന്റെ അപക്വമായ പ്രവർത്തനമാണ്' എന്നാണ് ബാങ്ക് ജീവനക്കാർക്കിടയിൽ പൊതുവെയുള്ള അഭിപ്രായം.

അതിനിടെ, ബാങ്കിന്റെ ദൈനംദിന കാര്യങ്ങളിൽ ഇടപെടുന്ന ഒരു 'പ്രത്യേക താൽപ്പര്യക്കാരൻ' എന്ന നിലയിൽ മുൻ ഡി.ജി.എം. അനിൽ വർമ്മയുടെ ഇടപെടലും വിവാദമായിരിക്കുകയാണ്. സർവീസ് പൂർത്തിയാക്കി വിരമിച്ച അദ്ദേഹത്തെ 'അഡ്മിനിസ്ട്രേറ്റീവ് ട്രെയിനിംഗ് ഓഫീസർ' തസ്തികയിൽ നിയമിക്കാനുള്ള ബാങ്കിന്റെ നീക്കം സഹകരണ സംഘം രജിസ്‌ട്രാർ തള്ളിയിരുന്നു.

എന്നിട്ടും, കഴിഞ്ഞ രണ്ട് വർഷമായി ദിവസക്കൂലി അടിസ്ഥാനത്തിൽ (രണ്ടായിരത്തി അഞ്ഞൂറ് രൂപ) ഇദ്ദേഹം ഹെഡ് ഓഫീസിൽ തുടരുന്നത് ജീവനക്കാർക്കിടയിൽ ശക്തമായ പ്രതിഷേധത്തിന് കാരണമായിട്ടുണ്ട്. ഈ വിഷയം പാർട്ടി നേതൃത്വങ്ങളെ അറിയിച്ചിട്ടും അവഗണിക്കുകയാണ് ചെയ്തത്.

സാരി വിവാദം ബാങ്കിന്റെ സുവർണ്ണ നേട്ടങ്ങൾക്ക് മങ്ങലേൽപ്പിച്ചപ്പോൾ, ഈ വിവാദത്തിൽ നിന്ന് രക്ഷപ്പെടാൻ ടാർഗറ്റ് നേടിയവർക്ക് സമ്മാനം നൽകി തലയൂരാനാണ് ബാങ്കധികൃതർ ഇപ്പോൾ ആലോചിക്കുന്നത്.

ഈ വാർത്തയെക്കുറിച്ചുള്ള നിങ്ങളുടെ കാഴ്ചപ്പാട് എന്താണ്? ഈ വിഷയം ചർച്ച ചെയ്യാൻ സുഹൃത്തുക്കളുമായി ഷെയർ ചെയ്യൂ.

Article Summary: Kerala Bank's gold loan success shadowed by a 'saree controversy.'

#KeralaBank #SareeControversy #GoldLoan #BankEmployees #KeralaNews #Thiruvananthapuram