ഹോർമുസിൽ ഒമാൻ ഇടനാഴി വഴി സഞ്ചരിക്കാൻ ശ്രമിച്ച ഇന്ത്യൻ എണ്ണക്കപ്പൽ ഇറാൻ തിരിച്ചയച്ചു 

തെഹ്റാൻ: (KVARTHA) ഹോർമുസ് കടലിടുക്കിലെ ഒമാനി ഇടനാഴി ഉപയോഗിച്ച ഇന്ത്യൻ എണ്ണക്കപ്പൽ ഇറാൻ തിരിച്ചയച്ചു. ഒമാൻ തീരത്തുകൂടിയുള്ള താൽക്കാലിക സമുദ്ര ഇടനാഴിയിലൂടെ സഞ്ചരിക്കാൻ ശ്രമിച്ച ഇന്ത്യൻ ടാങ്കറിനെയാണ് ഇറാൻ തടഞ്ഞത്. ഇറാൻ വാർത്താ ഏജൻസിയായ ഫാർസാണ് ഇക്കാര്യം റിപ്പോർട്ട് ചെയ്തത്. ലോകത്തിലെ തന്നെ ഏറ്റവും പ്രധാനപ്പെട്ട എണ്ണ വ്യാപാര പാതകളിലൊന്നായ ഹോർമുസിൽ നടക്കുന്ന ഇത്തരം സംഭവങ്ങൾ ആഗോള വിപണിയെ സാരമായി ബാധിക്കാൻ സാധ്യതയുണ്ട്. ഇറാൻ നിർദേശിച്ച ഷിപ്പിങ് പാത തന്നെ ഉപയോഗിക്കാൻ കപ്പലിന് നിർദേശം നൽകുകയായിരുന്നുവെന്നാണ് ഇവരുടെ വാദം.

ഒമാനി ഇടനാഴി ഉപയോഗിക്കാൻ ഉദ്ദേശിക്കുന്ന കപ്പലുകൾക്ക് റേഡിയോ വഴി ഇറാൻ മുന്നറിയിപ്പ് നൽകുന്നുണ്ടെന്നും റിപ്പോർട്ടിൽ പറയുന്നു. അതേസമയം, ഇന്ത്യൻ അധികൃതരുടെ ഭാഗത്ത് നിന്ന് ഇത് സംബന്ധിച്ച് ഔദ്യോഗിക പ്രതികരണങ്ങളൊന്നും ഇതുവരെ വന്നിട്ടില്ല. സംഭവത്തെ തുടർന്ന് ഈ ഇന്ത്യൻ എണ്ണക്കപ്പൽ നിലവിൽ ഏത് ദിശയിലേക്കാണ് പോയതെന്ന കാര്യത്തിലും വ്യക്തത വന്നിട്ടില്ല.

സംഘർഷം മൂലം ഗൾഫിൽ കുടുങ്ങിക്കിടക്കുന്ന കപ്പലുകളെ സുരക്ഷിതമായി ഒഴിപ്പിക്കുന്നതിനായി ജൂൺ 24-നാണ് ഒമാനും ഐക്യരാഷ്ട്രസഭയുടെ ഇൻ്റർനാഷണൽ മാരിടൈം ഓർഗനൈസേഷനും ചേർന്ന് ഈ താൽക്കാലിക ഇടനാഴി പ്രഖ്യാപിച്ചത്. അമേരിക്കയുടെ പ്രത്യേക മേൽനോട്ടത്തിൽ ഈ പാത പ്രവർത്തിക്കുമെന്നായിരുന്നു നേരത്തെ അറിയിച്ചിരുന്നത്. എന്നാൽ കഴിഞ്ഞ ദിവസങ്ങളിൽ പശ്ചിമേഷ്യയിൽ സംഘർഷം വീണ്ടും ഉടലെടുത്ത സാഹചര്യത്തിൽ ബുധനാഴ്ച (ജൂലൈ എട്ട്) രാവിലെ ഹോർമുസ് കടലിടുക്കിലൂടെ കടന്നുപോയ എല്ലാ കപ്പലുകളും ഒമാനി ഇടനാഴിക്ക് പകരം ഇറാൻ നിശ്ചയിച്ച പാതയാണ് ഉപയോഗിച്ചതെന്ന് കപ്പൽ ട്രാക്കിങ് ഡാറ്റകൾ വ്യക്തമാക്കുന്നു. സുരക്ഷാ ഭീഷണികൾ നിലനിൽക്കുന്നതിനാലാണ് കപ്പലുകൾ സ്വമേധയാ താൽക്കാലിക ഇടനാഴി ഒഴിവാക്കുന്നതെന്നാണ് നാവിക വിദഗ്ധരുടെ വിലയിരുത്തൽ.

ഖത്തറിൻ്റെയും സൗദി അറേബ്യയുടെയും ഉൾപ്പെടെ മൂന്ന് വാണിജ്യ കപ്പലുകൾക്ക് നേരെ കഴിഞ്ഞ ദിവസങ്ങളിൽ വലിയ ആക്രമണമുണ്ടായിരുന്നു. ഇതിന് പിന്നാലെ ഇറാനിൽ അമേരിക്ക അതിശക്തമായ ആക്രമണമാണ് നടത്തിയത്. കൂടാതെ, അന്താരാഷ്ട്ര വിപണിയിൽ എണ്ണ വിൽക്കാൻ ഇറാന് നൽകിയിരുന്ന അനുമതി അമേരിക്ക പൂർണമായും റദ്ദാക്കുകയും ചെയ്തു. ഇറാനുമായുള്ള എല്ലാ ധാരണകളും റദ്ദാക്കിയതായും വെടിനിർത്തൽ അവസാനിപ്പിച്ചതായും അമേരിക്കൻ പ്രസിഡൻ്റ് ഡോണൾഡ് ട്രംപ് പ്രഖ്യാപിച്ചിട്ടുണ്ട്. പശ്ചിമേഷ്യയിൽ വീണ്ടും അതിരൂക്ഷമായ യുദ്ധസമാന സാഹചര്യമാണ് ഈ സംഭവവികാസങ്ങൾ ചൂണ്ടിക്കാട്ടുന്നത്.

അന്താരാഷ്ട്ര തലത്തിലെ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Iran sent back an Indian oil tanker attempting to use the temporary Omani corridor in the Strait of Hormuz. Iran directed the vessel to use its designated shipping route amidst escalating tensions and recent US sanctions in the Middle East.

#StraitOfHormuz #IranUSConflict #IndianOilTanker #MiddleEastTension #OmanCorridor #MalayalamNews #AnjanaNews