ന്യൂഡൽഹി: (KVARTHA) ഇന്ത്യയിൽ സ്വന്തമായ ഒരു പെട്രോൾ പമ്പ് സ്ഥാപിക്കുന്നത് സുസ്ഥിരമായ വരുമാനം നേടാനുള്ള ഒരു മികച്ച മാർഗമായി കണക്കാക്കപ്പെടുന്നു. പെട്രോൾ പമ്പുകൾ ദൈനംദിന ജീവിതത്തിന്റെ അവിഭാജ്യ ഘടകമായതിനാൽ, ഇത് ലാഭകരമായ ഒരു ബിസിനസ് അവസരമായി കണക്കാക്കപ്പെടുന്നു. എന്നാൽ, ഈ മേഖലയിൽ പ്രവേശിക്കുന്നതിന് നിരവധി നിയമപരവും ഭരണപരവുമായ നടപടിക്രമങ്ങൾ പൂർത്തിയാക്കേണ്ടതുണ്ട്. ലാഭം ഉറപ്പാക്കാൻ, മികച്ച സ്ഥലം തിരഞ്ഞെടുക്കൽ, ആവശ്യമായ എല്ലാ അനുമതികളും നേടൽ, കാര്യക്ഷമമായ പ്രവർത്തനം എന്നിവ ഉറപ്പാക്കേണ്ടത് പ്രധാനമാണ്. ഒരു പെട്രോൾ പമ്പ് എങ്ങനെ തുടങ്ങണമെന്നതിനെക്കുറിച്ചുള്ള വിശദമായ വിവരങ്ങൾ അറിയാം.

യോഗ്യതകൾ:

ഇന്ത്യൻ പൗരത്വം: അപേക്ഷകൻ ഇന്ത്യക്കാരനായിരിക്കണം. എൻആർഐ ആണെങ്കിൽ, അവർ കുറഞ്ഞത് 180 ദിവസമെങ്കിലും രാജ്യത്ത് താമസിച്ചിരിക്കണം.

 പ്രായം: 21 മുതൽ 55 വയസ്സിനിടയിലുള്ളവർക്ക് അപേക്ഷിക്കാം. സ്വാതന്ത്ര്യസമര സേനാനികൾക്ക് പ്രായനിബന്ധന ഇല്ല.

വിദ്യാഭ്യാസം:

   ഗ്രാമവാസികൾക്കും എസ്‌സി/എസ്‌ടി/ഒബിസി വിഭാഗക്കാർക്കും പത്താം ക്ലാസ് പാസായിരിക്കണം.
   പൊതു കാറ്റഗറിക്കാർക്ക് പ്ലസ്‌ടുവാണ് വിദ്യാഭ്യാസ യോഗ്യത.
   നഗരപ്രദേശങ്ങളിൽ പമ്പ് തുറക്കാൻ ആലോചിക്കുന്നവർ ബിരുദധാരിയായിരിക്കണം.

ലൈസൻസിംഗ്:

  ഭാരത് പെട്രോളിയം കോർപ്പറേഷൻ ലിമിറ്റഡ് (BPCL), ഹിന്ദുസ്ഥാൻ പെട്രോളിയം കോർപ്പറേഷൻ ലിമിറ്റഡ് (HPCL), ഇന്ത്യൻ ഓയിൽ കോർപ്പറേഷൻ ലിമിറ്റഡ് (IOCL): ഇവരാണ് രാജ്യത്തെ പ്രമുഖ ഡീസൽ പെട്രോൾ ഡീലർമാർ.

 പരസ്യങ്ങൾ ശ്രദ്ധിക്കുക: ഈ കമ്പനികൾ പതിവായി പെട്രോൾ പമ്പ് ഡീലർമാരെ ക്ഷണിക്കുന്ന പരസ്യങ്ങൾ പുറത്തിറക്കാറുണ്ട്. ഈ പരസ്യങ്ങൾ ശ്രദ്ധിക്കുന്നത് പ്രധാനമാണ്.

അപേക്ഷാഫീസ്:

  സാധാരണ റീട്ടെയിൽ ഔട്ട്‌ലെറ്റിന്: 15 ലക്ഷം രൂപ.
  ഗ്രാമപ്രദേശത്ത്: 12 ലക്ഷം രൂപ.
  എസ്‌സി/എസ്‌ടി വിഭാഗക്കാർക്ക്: 50 ശതമാനം ഇളവ്.

നടപടിക്രമങ്ങൾ:

  സ്ഥലം തെരഞ്ഞെടുക്കുക: സ്വന്തമായോ പാട്ടത്തിനോ ഭൂമി എടുക്കുക.
 അപേക്ഷ നൽകുക: ജില്ലാ കലക്ടർക്ക് അപേക്ഷ നൽകുക.
 എതിർപ്പില്ലാരേഖ തയ്യാറാക്കുക: ആറ് വകുപ്പുകളിൽ നിന്ന് റിപ്പോർട്ട് ശേഖരിക്കുക.
 നോ ഒബ്ജക്ഷൻ സർട്ടിഫിക്കറ്റ് (NOC): ചെന്നൈയിലെ കൺട്രോളർ ഓഫ് എക്സ്പ്ലോസീവ്സ് ലഭിക്കുക.

പെട്രോൾ പമ്പ് തുടങ്ങാൻ ആഗ്രഹിക്കുന്ന വ്യക്തികൾ ആദ്യം ജില്ലാ കലക്ടറുടെ ഓഫീസിൽ വിശദമായ ഒരു അപേക്ഷ സമർപ്പിക്കണം. ഈ അപേക്ഷയിൽ പമ്പ് നിർമ്മിക്കാനുദ്ദേശിക്കുന്ന സ്ഥലത്തിന്റെ സർവേ നമ്പർ, വില്ലേജ്, വിശദമായ പദ്ധതി എന്നിവ ഉൾപ്പെടുത്തണം. ഏത് കമ്പനിയാണ് ഈ ഡീലർഷിപ്പ് നൽകുന്നതെന്ന് ലെറ്റർ ഓഫ് ഇൻഡന്റ് എന്ന രേഖയിൽ വ്യക്തമാക്കണം.

കലക്ടറുടെ നിർദേശപ്രകാരം ജില്ലാ കളക്ടറുടെ ഓഫീസിലെ അഡീഷണൽ ജില്ലാ മജിസ്‌ട്രേറ്റ് (എഡിഎം) ഈ അപേക്ഷ കൈകാര്യം ചെയ്യും. എഡിഎം, ജില്ലാ പൊലീസ് മേധാവി, ജില്ലാ സപ്ലൈ ഓഫീസർ, ആർ.ഡി.ഒ./സബ് കളക്ടർ, തദ്ദേശസ്ഥാപനം, ആഗ്നിരക്ഷാസേന, പൊതുമരാമത്ത് (റോഡ്‌സ്) വകുപ്പ് എന്നിവടങ്ങളിൽ നിന്നും റിപ്പോർട്ടുകൾ ശേഖരിച്ച് എതിർപ്പില്ലാത്ത സർട്ടിഫിക്കറ്റ് (എൻഒസി) തയ്യാറാക്കും. 

ഈ വകുപ്പുകൾ മൂന്ന് മാസത്തിനുള്ളിൽ റിപ്പോർട്ടുകൾ സമർപ്പിക്കാൻ ബാധ്യസ്ഥരാണ്.
എല്ലാ വകുപ്പുകളിൽ നിന്നും അനുമതി ലഭിച്ച ശേഷം കലക്ടറോ എഡിഎമ്മോ നേരിട്ട് സ്ഥലം പരിശോധിക്കും. യാതൊരു തടസ്സവും ഇല്ലെങ്കിൽ എൻഒസി നൽകും. എൻഒസി നിരസിക്കുകയാണെങ്കിൽ, അതിനുള്ള കാരണങ്ങൾ വ്യക്തമാക്കി അപേക്ഷകനെ അറിയിക്കും.

എൻഒസി ഉൾപ്പെടെയുള്ള എല്ലാ രേഖകളും പരിശോധിച്ച ശേഷം ചെന്നൈയിലെ കൺട്രോളർ ഓഫ് എക്‌സ്പ്ലോസീവ്സ് ആണ് പെട്രോൾ പമ്പ് പ്രവർത്തിപ്പിക്കാനുള്ള അന്തിമ അനുമതി നൽകുന്നത്.

പെട്രോൾ പമ്പ് സ്ഥാപിക്കുന്നതിനെ എതിർക്കുന്നവരുണ്ടെങ്കിൽ മലിനീകരണ നിയന്ത്രണ ബോർഡ് ഇടപെടേണ്ടി വന്നേക്കാം. മൂന്ന് മാസത്തിനുള്ളിൽ എല്ലാ വകുപ്പുകളും റിപ്പോർട്ട് നൽകണമെന്നാണ് നിയമം. എന്നാൽ, ചില സന്ദർഭങ്ങളിൽ ഇത് കൂടുതൽ സമയം എടുത്തേക്കാം.

അനുമതികൾ:

 ലൊക്കേഷന്റെ സാക്ഷ്യപ്പെടുത്തിയ പകർപ്പ്.
 എൻഒസി.
 മുനിസിപ്പൽ കോർപ്പറേഷനിൽ നിന്നും ഫയർ സേഫ്റ്റി ഓഫീസിൽ നിന്നും അനുമതികൾ.
 ബന്ധപ്പെട്ട അധികാരികളിൽ നിന്നുള്ള സർട്ടിഫിക്കേഷനും എൻഒസിയും.

ചെലവുകൾ:

പെട്രോൾ പമ്പ് തുടങ്ങാൻ മിനിമം ഫണ്ട് ആവശ്യമാണ്. ഒരു സാധാരണ ചെറിയ പമ്പ് തുറക്കാൻ 25 ലക്ഷം വേണം.
ഗ്രാമപ്രദേശങ്ങളിൽ ആണെങ്കിൽ 12 ലക്ഷം രൂപ മതി.
നിങ്ങൾക്ക് സ്വന്തമായ ഒരു ഭൂമിയുണ്ടെങ്കിൽ ചെലവ് കുറയും.

#petrolpump #india #business #investment #dealership #license #startup #entrepreneur