മട്ടന്നൂർ കിൻഫ്ര പാർക്കിൽ 3.5 ലക്ഷം കോടിയുടെ നിക്ഷേപം; ഹൈദരാബാദ് ആസ്ഥാനമായ ഗോൾഡ്‌സിക്ക കമ്പനി അധികൃതർ സന്ദർശനം നടത്തി

മട്ടന്നൂർ: (KVARTHA) നഗരസഭയിലെ വെള്ളിയാംപറമ്പിലെ കിൻഫ്ര വ്യവസായ പാർക്കിൽ 3.5 ലക്ഷം കോടി രൂപയുടെ പദ്ധതി വാഗ്ദാനം ചെയ്തുകൊണ്ട് വൻകിട കമ്പനി രംഗത്തെത്തി. ഹൈദരാബാദ് ആസ്ഥാനമായ ഗോൾഡ്‌സിക്ക കമ്പനിയാണ് നിക്ഷേപം നടത്തുന്നത്. 

ആയിരം ഏക്കർ സ്ഥലത്ത് ഗോൾഡ് സിറ്റി സ്ഥാപിക്കുന്നതാണ് പദ്ധതി. കിൻഫ്ര വ്യവസായ പാർക്കിൽ കെ.കെ. ശൈലജ എംഎൽഎ ഗോൾഡ്‌സിക്ക അധികൃതരുമായി ചർച്ച നടത്തി. രണ്ടാഴ്ചയ്ക്കുള്ളിൽ കമ്പനിയുടെ ഓഫീസ് കിൻഫ്രയിൽ പ്രവർത്തനം ആരംഭിക്കും.

അഞ്ചു ഘട്ടങ്ങളിലായി ഗോൾഡ് സിറ്റി 

3.5 ലക്ഷം കോടി രൂപയുടെ നിക്ഷേപ വാഗ്ദാനമാണ് ഗോൾഡ്‌സിക്ക വെള്ളിയാംപറമ്പിലെ കിൻഫ്ര വ്യവസായ പാർക്കിന് നൽകിയിരിക്കുന്നത്. ആയിരം ഏക്കർ സ്ഥലമാണ് കമ്പനി ആവശ്യപ്പെട്ടത്. അഞ്ചു ഘട്ടങ്ങളിലായാണ് പദ്ധതി പൂർത്തിയാക്കുക. സ്ഥലവും വൈദ്യുതിയും വെള്ളവും ഉൾപ്പെടെയുള്ള സൗകര്യങ്ങളും ആദ്യഘട്ടത്തിൽ ഓഫീസ് തുടങ്ങാൻ ആവശ്യമായ കെട്ടിടവും സർക്കാർ ലഭ്യമാക്കും. 

ഓഫീസ് പ്രവർത്തിക്കാൻ ആവശ്യമായ സ്ഥലം ലഭിച്ചാൽ രണ്ടാഴ്ചയ്ക്കുള്ളിൽ ഗോൾഡ് സിറ്റിയുടെ നിർമ്മാണം ആരംഭിക്കും. ആഗോള സ്വർണ്ണ വ്യവസായ രംഗത്ത് ചുവടുറപ്പിച്ചിട്ടുള്ള ഗോൾഡ്‌സിക്ക പോലുള്ള കമ്പനികൾ വ്യവസായ പാർക്കിന്റെ സ്ഥലമേറ്റെടുപ്പ് പൂർത്തിയാകും മുൻപേ വൻ നിക്ഷേപ വാഗ്ദാനവുമായി രംഗത്തെത്തിയത് പാർക്കിന്റെ ഭാവി വികസനത്തിന് ഊർജ്ജമാകുമെന്ന് കെ.കെ. ശൈലജ എംഎൽഎ പറഞ്ഞു.

സൗകര്യങ്ങളും അനുമതികളും 

കിൻഫ്ര പാർക്കിലെ സ്റ്റാൻഡേർഡ് ഡിസൈൻ ഫാക്ടറിയിലാണ് ഓഫീസിനായി സ്ഥലം അനുവദിക്കാൻ തീരുമാനിച്ചിട്ടുള്ളത്. ഇത്തരമൊരു സംരംഭം ആരംഭിക്കാൻ വിവിധ അനുമതികൾ ആവശ്യമാണെന്നും അവ നേടിയെടുത്തു വരികയാണെന്നും ഗോൾഡ്‌സിക്ക എംഡി എസ്. തരൂജ് പറഞ്ഞു.

സമഗ്ര സ്വർണ്ണ ശുദ്ധീകരണ കേന്ദ്രം 

മറ്റ് രാജ്യങ്ങളിൽ നിന്ന് ഖനനം ചെയ്തെടുക്കുന്ന സ്വർണ്ണ അയിരിന്റെ ശുദ്ധീകരണം മുതൽ ഡിസൈനിംഗും ആഭരണ നിർമ്മാണവും വരെയുള്ള മുഴുവൻ കാര്യങ്ങളും ചെയ്യാനാകും വിധത്തിലാണ് ഗോൾഡ് സിറ്റി വിഭാവനം ചെയ്യുന്നത്. ധാരണാപത്രം ഒപ്പിട്ട് കൈമാറി ആഴ്ചകൾ പിന്നിടും മുൻപേയാണ് കമ്പനി പ്രതിനിധികൾ ചർച്ചകൾക്കായി മട്ടന്നൂരിലെത്തിയത്.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Goldsikka company proposes a ₹3.5 lakh crore 'Global Gold City' project in Mattannur Kinfra Park.

#Mattannur #KinfraPark #Goldsikka #GoldCity #InvestmentNews #KannurNews #KeralaIndustry #KVARTHA