കൊച്ചി: (KVARTHA) സംസ്ഥാനത്തെ സ്വർണ വിപണിയിൽ തുടർച്ചയായ ഇടിവ് രേഖപ്പെടുത്തി. ശനിയാഴ്ച (14.12.2024) 22 കാരറ്റ് സ്വർണത്തിന് ഗ്രാമിന് 90 രൂപയുടെയും പവന് 720 രൂപയുടെയും ഇടിവാണ് ഉണ്ടായത്. ഇതോടെ 22 കാരറ്റ് സ്വർണം ഗ്രാമിന് 7140 രൂപയിലും പവന് 57,120 രൂപയിലുമെത്തി. 18 കാരറ്റ് സ്വർണത്തിന് ഗ്രാമിന് 75 രൂപ ഇടിഞ്ഞ് 5895 രൂപയായി, പവന് 600 രൂപ കുറഞ്ഞ് 47,160 രൂപയുമായി. വെള്ളി നിരക്കിലും ഇടിവ് രേഖപ്പെടുത്തി. ഒരു ഗ്രാം സാധാരണ വെള്ളിക്ക് ഒരു രൂപ കുറഞ്ഞ് 97 രൂപയായി.

വെള്ളിയാഴ്ച (13.12.2024) 22 കാരറ്റ് സ്വർണത്തിന് ഗ്രാമിന് 55 രൂപയും പവന് 440 രൂപയുമാണ് ഇടിഞ്ഞത്. 22 കാരറ്റ് സ്വർണം ഗ്രാമിന് 7230 രൂപയിലും പവന് 57,840 രൂപയിലുമാണ് വ്യാപാരം നടന്നത്. 18 കാരറ്റ് സ്വർണത്തിന് ഗ്രാമിന് 45 രൂപ ഇടിഞ്ഞ് 5970 രൂപയായി. പവന് 360 രൂപ കുറഞ്ഞ് 47,760 രൂപയായി. വെള്ളിയാഴ്ച വെള്ളി നിരക്കിലും ഇടിവുണ്ടായിരുന്നു. ഒരു ഗ്രാം സാധാരണ വെള്ളിക്ക് മൂന്ന് രൂപ കുറഞ്ഞ് 98 രൂപയായി.

ഡിസംബർ മാസത്തിലെ രണ്ടാഴ്ചത്തെ സ്വർണവിലയിൽ ചെറിയ ഉയർച്ച താഴ്ചകൾ ഉണ്ടായിട്ടുണ്ട്. ഡിസംബർ ഒന്നിന് 57,200 രൂപയായിരുന്ന വില ഡിസംബർ രണ്ടിന് 56,720 രൂപയിലേക്ക് കുറഞ്ഞു. പിന്നീട് ഡിസംബർ 11 വരെ വില ക്രമേണ ഉയർന്നു, ഡിസംബർ 11ന് 58,280 രൂപ എന്ന ഉയർന്ന നിലയിലെത്തി. അതിനുശേഷം വില വീണ്ടും കുറയാൻ തുടങ്ങി, ഇപ്പോൾ ഡിസംബർ 14ന് 57,120 രൂപയിലെത്തി.

രാജ്യാന്തര സ്വർണ വിലയിൽ രണ്ടു ദിവസത്തിനുള്ളിൽ 2,720 ഡോളറിൽ നിന്ന് 2,646 ഡോളറിലേക്കുള്ള വൻ ഇടിവ് കേരളത്തിലെ സ്വർണ വിപണിയെയും പ്രതികൂലമായി ബാധിച്ചു. ഈ വിലയിടിവിന് പ്രധാന കാരണം ഗോൾഡ് ഇടിഎഫ് പോലുള്ള സ്വർണ നിക്ഷേപ പദ്ധതികളിൽ ലാഭമെടുപ്പ് തീവ്രമായതാണ്. 

അമേരിക്ക, ഈ മാസം അടിസ്ഥാന പലിശനിരക്ക് കുറയ്ക്കാൻ ഒരുങ്ങുകയാണെന്ന വാർത്തകൾ സ്വർണത്തിന്റെ വിലയിൽ പൊതുവെ ഉയർച്ചയ്ക്ക് കാരണമാകാറുണ്ട്. എന്നാൽ, ഡിസംബറിൽ പലിശ കുറഞ്ഞാലും 2025ൽ പലിശ കുറയാനിടയില്ലെന്ന വിലയിരുത്തൽ ഡോളറിനും യുഎസ് സർക്കാരിൻ്റെ കടപ്പത്ര ആദായനിരക്കിനും ഉണർവ് പകരുന്നതാണ് സ്വർണവിലയെ ബാധിച്ചത്.

#GoldPrice, #KeralaEconomy, #SilverRates, #MarketTrends, #GoldUpdate