ജിഎസ്‌ടി നിരക്കുകൾ പുനഃക്രമീകരിക്കാൻ മന്ത്രിതല സമിതി ശുപാർശ; 12, 28% സ്ലാബുകൾ ഒഴിവാക്കും

ഡൽഹി: (KVARTHA) ചരക്കു-സേവന നികുതിയിൽ (ജിഎസ്ട‌ി) നിന്ന് 12%, 28% സ്ലാബുകൾ ഒഴിവാക്കാനുള്ള കേന്ദ്രസർക്കാരിൻ്റെ നീക്കത്തിന് ആറംഗ മന്ത്രിതല സമിതിയുടെ പച്ചക്കൊടി. ജിഎസ്‌ടി നിരക്കുകളുടെ പുനഃക്രമീകരണം സംബന്ധിച്ച് മാർഗനിർദേശങ്ങൾ സമർപ്പിക്കാൻ ചുമതലപ്പെടുത്തിയ മന്ത്രിതല സമിതിയാണ് കേന്ദ്രത്തിൻ്റെ ശുപാർശ അംഗീകരിച്ചത്. സംസ്‌ഥാന ധനമന്ത്രിമാരും കേന്ദ്ര ധനമന്ത്രി നിർമല സീതാരാമനും ഉൾപ്പെടുന്ന ജിഎസ്ടി കൗൺസിലിൻ്റെ നിർദേശപ്രകാരമാണ് ഈ ഉപസമിതി രൂപീകരിച്ചത്. ഈ തീരുമാനത്തിലൂടെ നിത്യോപയോഗ സാധനങ്ങൾ ഉൾപ്പെടെ നിരവധി ഉൽപന്നങ്ങൾക്ക് വില കുറയും.

ബിഹാർ ഉപ മുഖ്യമന്ത്രി സാമ്രാട്ട് ചൗധരി അധ്യക്ഷനായ ഈ മന്ത്രിതല സമിതിയിൽ ഉത്തർപ്രദേശ് ധനമന്ത്രി സുരേഷ് കുമാർ ഖന്ന, രാജസ്‌ഥാൻ ആരോഗ്യമന്ത്രി ഗജേന്ദ്ര സിങ്, കർണാടക റവന്യൂ മന്ത്രി കൃഷ്ണ ബൈരേ ഗൗഡ, പശ്ചിമ ബംഗാൾ ധനമന്ത്രി ചന്ദ്രിമ ഭട്ടാചാര്യ, കേരളത്തിൻ്റെ ധനമന്ത്രി കെ.എൻ. ബാലഗോപാൽ എന്നിവരാണ് അംഗങ്ങൾ. ധനകാര്യ മന്ത്രാലയത്തിൻ്റെ വിശദമായ നിർദ്ദേശങ്ങൾ പരിശോധിച്ച ശേഷമാണ് മന്ത്രിമാർ ഒരു വിശാലമായ ധാരണയിലെത്തിയത്.

പരിഷ്കരണം സാധാരണക്കാർക്ക് ആശ്വാസം

ദീപാവലിക്ക് വൻ സർപ്രൈസ് ആയി ജിഎസ്‌ടി ഘടന പരിഷ്കരിക്കുമെന്നും ജനങ്ങൾ നിത്യേന വാങ്ങുന്ന ഉൽപന്നങ്ങളുടെ നികുതി കുറയ്ക്കുമെന്നും സ്വാതന്ത്ര്യദിനാഘോഷ പ്രസംഗത്തിൽ പ്രധാനമന്ത്രി നരേന്ദ്ര മോദി പറഞ്ഞിരുന്നു. പുതിയ പരിഷ്‌കരണം സാധാരണക്കാർക്കും കർഷകർക്കും ഇടത്തരം കുടുംബങ്ങൾക്കും എംഎസ്എംഇ സംരംഭകർക്കും ആശ്വാസമാകുമെന്ന് കേന്ദ്ര ധനമന്ത്രി നിർമല സീതാരാമൻ പറഞ്ഞു. നിലവിൽ 5%, 12%, 18%, 28% എന്നിങ്ങനെ സ്ലാബുകളാണ് ജിഎസ്ട‌ിയിലുള്ളത്. ഇതിൽനിന്ന് 12%, 28% സ്ലാബുകൾ ഒഴിവാക്കും.

പദ്ധതി പ്രകാരം, മുമ്പ് 12% നികുതി ഉണ്ടായിരുന്ന 99% ഇനങ്ങളും ഇനി 5% സ്ലാബിലേക്ക് മാറും. അതുപോലെ, 28% സ്ലാബിന് കീഴിലുള്ള ഏകദേശം 90% ഇനങ്ങളും 18% ആയി കുറയും. ആരോഗ്യ, ലൈഫ് ഇൻഷുറൻസ് പ്രീമിയത്തിന് ജിഎസ്ട‌ി ഒഴിവാക്കണമെന്ന നിർദേശത്തിനും അനുമതി ലഭിച്ചിട്ടുണ്ട്. ഈ ഇളവ് വഴി 9,700 കോടി രൂപയുടെ നികുതിവരുമാന നഷ്ടമുണ്ടാകുമെങ്കിലും, പരിഷ്‌കാരവുമായി മുന്നോട്ട് പോകാനാണ് കേന്ദ്രത്തിൻ്റെ നീക്കം. നിലവിൽ 18 ശതമാനമാണ് ഇൻഷുറൻസ് പ്രീമിയത്തിന് നികുതി. 2023-24ൽ ഹെൽത്ത് ഇൻഷുറൻസ് പ്രീമിയത്തിൽ നിന്ന് 8,263 കോടി രൂപയും ലൈഫ് ഇൻഷുറൻസ് പ്രീമിയത്തിൽ നിന്ന് 1,484 കോടി രൂപയും നികുതിവരുമാനമാണ് ലഭിച്ചത്.

അതേസമയം, നിലവിൽ 28% സ്ലാബിലുള്ള ആഡംബര വസ്തു‌ക്കൾ/സേവനങ്ങൾ, സിഗററ്റ്, ആഡംബര കാറുകൾ തുടങ്ങിയവ ഉൾപ്പെടെ ഉപയോഗം നിരുത്സാഹപ്പെടുത്തേണ്ട ഉൽപന്നങ്ങൾക്കായി 40% എന്ന പ്രത്യേക സ്ലാബ് രൂപീകരിക്കാനും മന്ത്രിതല സമിതി അംഗീകാരം നൽകി. ഇത്തരം ഉൽപന്നങ്ങളുടെയും സേവനങ്ങളുടെയും വില വർദ്ധിക്കാൻ സാധ്യതയുണ്ട്. മന്ത്രിതല സമിതിയിൽനിന്ന് പച്ചക്കൊടി കിട്ടിയതോടെ, വൈകാതെ ചേരുന്ന ജിഎസ്‌ടി കൗൺസിൽ യോഗം കേന്ദ്രത്തിൻ്റെ ശുപാർശ അംഗീകരിക്കാനുള്ള സാധ്യതയേറി. ജിഎസ്‌ടി കൗൺസിലാണ് ശുപാർശകളിന്മേൽ അന്തിമ തീരുമാനം പ്രഖ്യാപിക്കേണ്ടത്.

പുതിയ ജിഎസ്‌ടി മാറ്റങ്ങളെക്കുറിച്ച് നിങ്ങൾക്ക് എന്താണ് പറയാനുള്ളത്? നിങ്ങളുടെ അഭിപ്രായം താഴെ കമന്റ് ചെയ്യുക.

Article Summary: GST panel recommends new tax structure, removes two slabs.

#GST #India #TaxReform #GSTCouncil #Finance #Economy