വി എസ് അച്യുതാനന്ദന് ജന്മദിന സ്മരണ: കനലണഞ്ഞെങ്കിലും ജ്വലിക്കുന്നു പോരാട്ട ഓർമ്മകൾ

ഭാമനാവത്ത്

കണ്ണൂർ: (KVARTHA) രാഷ്ട്രീയ കേരളത്തിന്റെ സമരനായകൻ വി എസ് അച്യുതാനന്ദന്റെ ജന്മദിനമാണ് ഇന്ന് (ഒക്ടോബർ 20). ഈ ലോകം വിട്ടുപിരിഞ്ഞെങ്കിലും വി എസ് എന്ന രണ്ടക്ഷരം രാഷ്ട്രീയ കേരളത്തിന്റെ ആവേശമായി ഇന്നും ജ്വലിച്ചു നിൽക്കുന്നു. വേലിക്കകത്ത് ശങ്കരൻ അച്യുതാനന്ദൻ എന്ന വി എസ്, തന്റെ ത്യാഗപൂർണമായ ജീവിതത്തിലൂടെ കേരളത്തിലെ കമ്മ്യൂണിസ്റ്റ് പ്രസ്ഥാനത്തിന്റെ വളർച്ചയിൽ മുന്നിൽ നിന്ന് നയിച്ച നേതാവാണ്.

മുൻ മുഖ്യമന്ത്രി, പ്രതിപക്ഷ നേതാവ്, സി പി എം സംസ്ഥാന സെക്രട്ടറി, പോളിറ്റ് ബ്യൂറോ അംഗം, എൽ ഡി എഫ് കൺവീനർ തുടങ്ങി ഇടതുപക്ഷ രാഷ്ട്രീയത്തിന്റെ വിവിധ മേഖലകളിൽ വി എസ് തിളങ്ങി നിന്നു. 102-ാം വയസ്സിലാണ് അദ്ദേഹം വീരോചിതമായ സമര ജീവിതത്തോട് വിട പറഞ്ഞത്.

ദേശീയ സ്വാതന്ത്ര്യസമര കാലഘട്ടത്തിലും കേരള സംസ്ഥാന രൂപീകരണത്തിന് ശേഷമുള്ള തൊഴിലാളി സമരങ്ങളുടെ മുൻനിര പോരാളിയായിരുന്നു വി എസ്. വി എസ് തികഞ്ഞ രാഷ്ട്രീയ ധാരണയുള്ള ഒരു ജനനേതാവായി വളർന്നു വികസിച്ച് ജനങ്ങളെ തന്നോടൊപ്പവും അതുവഴി പാർട്ടിയോടൊപ്പവും ചേർത്താണ് നിർത്തിയത്.

1923 ഒക്ടോബർ 20-ാം തീയതി ശങ്കരന്റെയും അക്കമ്മയുടെയും മകനായാണ് അദ്ദേഹം ജനിച്ചത്. നാലാം വയസ്സിൽ അമ്മയും 11-ാം വയസ്സിൽ അച്ഛനും നഷ്ടപ്പെട്ടു. അതുകൊണ്ടുതന്നെ ഏഴാം ക്ലാസ്സിൽ പഠനം നിർത്തേണ്ടിവന്നു. തുടർന്ന് മൂത്ത സഹോദരനെ സഹായിക്കാൻ ഗ്രാമത്തിലെ തുന്നൽക്കടയിൽ ജോലിക്ക് നിന്നു. അതിനുശേഷം കയർ ഫാക്ടറിയിലും തൊഴിലാളിയായി പ്രവർത്തിച്ചു.

കുട്ടനാട്ടിൽ കർഷകത്തൊഴിലാളികളെ സംഘടിപ്പിച്ചുകൊണ്ടാണ് വി എസ് അച്യുതാനന്ദൻ രാഷ്ട്രീയ പ്രവർത്തനത്തിന്റെ ആദ്യഘട്ടം പിന്നിട്ടത്. പി കൃഷ്ണപിള്ളയുടെ ഉപദേശമനുസരിച്ചായിരുന്നു വി എസ് കുട്ടനാടൻ മേഖലയിൽ രാഷ്ട്രീയ പ്രവർത്തനം ആരംഭിക്കുന്നത്. തുടർന്ന് സ്വാതന്ത്ര്യപ്രസ്ഥാനത്തിലേക്കും അവിടെനിന്ന് കമ്യൂണിസ്റ്റ് പ്രസ്ഥാനത്തിലേക്കും എത്തിച്ചേരുകയായിരുന്നു.

‘അമേരിക്കൻ മോഡലി’നുവേണ്ടിയുള്ള സർ സി പി രാമസ്വാമി അയ്യരുടെ കാഴ്ചപ്പാടിനെതിരായി ആലപ്പുഴയിൽ നടന്ന പുന്നപ്ര-വയലാർ പ്രക്ഷോഭത്തിന്റെ സംഘാടനത്തിന്റെ മുൻനിരയിൽ വി എസ് ഉണ്ടായിരുന്നു. ഇതിനെത്തുടർന്ന് 1946 ഒക്ടോബർ 28-ാം തീയതി അദ്ദേഹം പോലീസ് പിടിയിലായി. 

പൂഞ്ഞാർ ലോക്കപ്പിൽ വെച്ച് ഭീകരമായ മർദ്ദനം ഏൽക്കേണ്ടിവന്നു. മർദ്ദനത്തിനിടെ തോക്കിന്റെ ബയണറ്റ് കാൽവെള്ളയിൽ ആഴ്ന്നിറങ്ങി. ഇത്തരം അനേകം കൊടിയ പീഡനങ്ങൾ വി എസിന് ഏറ്റുവാങ്ങേണ്ടിവന്നിട്ടുണ്ട്. അഞ്ചു വർഷവും ആറു മാസവും ജയിൽ ജീവിതവും നാലര വർഷം ഒളിവുജീവിതവും അദ്ദേഹം നയിച്ചിട്ടുണ്ട്.

1967-ലെ സർക്കാർ പാസ്സാക്കിയ ഭൂപരിഷ്കരണ നിയമം നടപ്പിലാക്കാൻ വമ്പിച്ച പ്രക്ഷോഭം ഉയർത്തേണ്ടിവന്നു. 1970-ൽ സുപ്രസിദ്ധമായ ആലപ്പുഴ പ്രഖ്യാപനത്തിലൂടെ ഈ നിയമം പാസ്സാക്കാനുള്ള പോരാട്ടം പ്രഖ്യാപിക്കപ്പെട്ടു. 

ആ സമരത്തിന്റെ നേതൃനിരയിൽ നിന്ന സഖാവായിരുന്നു വി എസ്. എണ്ണമറ്റ സമരങ്ങൾക്ക് ഈ കാലഘട്ടത്തിൽ അദ്ദേഹം നേതൃത്വം നൽകിയിട്ടുണ്ട്. പ്രതിപക്ഷ നേതാവ് എന്ന നിലയിൽ അദ്ദേഹം നടത്തിയ പ്രവർത്തനങ്ങൾ ഏറെ ജനശ്രദ്ധ ആകർഷിച്ചവയായിരുന്നു.

1938-ൽ തൊഴിലാളി യൂണിയൻ പ്രവർത്തനത്തിലൂടെ സ്റ്റേറ്റ് കോൺഗ്രസ്സിൽ അംഗമായി. 1940-ലാണ് വി എസ് കമ്യൂണിസ്റ്റ് പാർട്ടി അംഗമാകുന്നത്. 1957-ൽ അവിഭക്ത പാർട്ടിയുടെ സ്റ്റേറ്റ് സെക്രട്ടേറിയറ്റ് മെമ്പറായി. 

1964-ൽ നാഷണൽ കൗൺസിലിൽ നിന്ന് ഇറങ്ങിപ്പോന്ന 32 അംഗങ്ങളിൽ ഒരാളായിരുന്നു വി എസ്. 1980 മുതൽ 1992 വരെ സി പി എം കേരള സംസ്ഥാന സെക്രട്ടറിയായിരുന്നു. 1985-ൽ അദ്ദേഹം പൊളിറ്റ് ബ്യൂറോ അംഗമായി.

ദേശാഭിമാനി പത്രത്തിന്റെയും ചിന്ത വാരികയുടെയും ചീഫ് എഡിറ്ററായും അദ്ദേഹം പ്രവർത്തിച്ചിട്ടുണ്ട്. 1967, 1970, 1991, 2001, 2006 വർഷങ്ങളിൽ നിയമസഭയിലേക്ക് മത്സരിച്ച് വിജയിച്ചു. 1992 മുതൽ 1996 വരെയും 2001 മുതൽ 2006 വരെയും കേരള നിയമസഭയുടെ പ്രതിപക്ഷ നേതാവായും പ്രവർത്തിച്ചു. 

2006 മെയ് 18-ാം തീയതിയായിരുന്നു വി എസ് കേരളത്തിലെ മുഖ്യമന്ത്രിയായി സത്യപ്രതിജ്ഞ ചെയ്ത് അധികാരമേറ്റത്. വി എസിന്റെ വേർപാട് രാഷ്ട്രീയ കേരളത്തിന് ഇനിയും നികത്താനാവാത്ത ശൂന്യതയാണ് സൃഷ്ടിച്ചത്. ഏതൊരു കമ്യൂണിസ്റ്റുകാരനെയും പോലെ പിറന്നാൾ ആഘോഷത്തിന് വലിയ പ്രാധാന്യം വി എസ് നൽകിയിരുന്നില്ല. 

മുഖ്യമന്ത്രിയായിരുന്നപ്പോഴും കുടുംബാംഗങ്ങൾക്കൊപ്പമുള്ള പിറന്നാൾ സദ്യയിൽ ഒതുക്കിയിരുന്നു അദ്ദേഹത്തിന്റെ വിശേഷ ദിനം. സമരങ്ങളുടെ തീച്ചൂളയിൽ വെന്തുരുകി ജീവിതാനുഭവങ്ങളുടെ ഉലയിൽ രാകി മിനുക്കി കറകളഞ്ഞെടുത്ത വജ്രശോഭയായിരുന്നു അദ്ദേഹത്തിന്റെ ഇതിഹാസതുല്യമായ ജീവിതം.

ഈ ചരിത്രപരമായ ലേഖനം കൂട്ടുകാരുമായി പങ്കുവെക്കൂ. 

Article Summary: Remembering VS Achuthanandan, the veteran communist leader and former Kerala Chief Minister, on his birth anniversary.

#VSachuthanandan #KeralaPolitics #CommunistLeader #BirthAnniversary #PunnapraVayalar #KeralaCM