ഇടുക്കി യുഡിഎഫിൽ പടലപ്പിണക്കം; 'തൊടുപുഴ ലോബി'ക്കെതിരെ ഹൈറേഞ്ചിൽ അമർഷം പുകയുന്നു; ജോയി വെട്ടിക്കുഴിയെ വെട്ടിനിരത്തിയെന്ന് ആക്ഷേപം

ശ്രീലാൽ വാസുദേവൻ

ചെറുതോണി: (KVARTHA) ഇടുക്കിയിലെ യുഡിഎഫ് രാഷ്ട്രീയത്തിൽ വൻ പൊട്ടിത്തെറിക്ക് വഴിയൊരുക്കി 'തൊടുപുഴ ലോബി'യുടെ നീക്കങ്ങൾ സജീവമാകുന്നു. യുഡിഎഫ് ജില്ലാ ചെയർമാനും മുതിർന്ന കോൺഗ്രസ് നേതാവുമായ ജോയി വെട്ടിക്കുഴിയെ തഴഞ്ഞുകൊണ്ടുള്ള നീക്കങ്ങളാണ് മുന്നണിക്കുള്ളിൽ പുതിയ വിവാദങ്ങൾക്ക് തിരി കൊളുത്തിയിരിക്കുന്നത്. കേരള കോൺഗ്രസ് ജോസഫ് ഗ്രൂപ്പിൽ നിന്ന് ഇടുക്കി സീറ്റ് കോൺഗ്രസ് ഏറ്റെടുക്കണമെന്ന ആവശ്യത്തിന് മുൻനിരയിൽ നിന്ന ജോയി വെട്ടിക്കുഴിയെത്തന്നെ ഒടുവിൽ വെട്ടിനിരത്തിയെന്നാണ് പ്രവർത്തകർക്കിടയിലെ പ്രധാന ആക്ഷേപം.

ഹൈറേഞ്ച് വികാരം അവഗണിക്കപ്പെട്ടു

ഇടുക്കി മണ്ഡലത്തിൽ ഹൈറേഞ്ചിൽ നിന്നുള്ള സ്ഥാനാർത്ഥി വേണമെന്ന ആവശ്യം ശക്തമായതോടെ ജോയി വെട്ടിക്കുഴി സജീവമായി രംഗത്തെത്തിയിരുന്നു. എന്നാൽ തൊടുപുഴ കേന്ദ്രീകരിച്ചുള്ള ഒരു പറ്റം നേതാക്കൾ ഈ നീക്കം മുളയിലേ നുള്ളുകയായിരുന്നുവെന്നാണ് റിപ്പോർട്ടുകൾ. 

റോയി കെ. പൗലോസ് സ്ഥാനാർത്ഥിയായി എത്തിയതോടെ കട്ടപ്പന മേഖലയിലെ പ്രവർത്തകരെ പ്രചാരണ പരിപാടികളിൽ നിന്ന് ബോധപൂർവ്വം മാറ്റിനിർത്തുന്നതായി പരാതിയുണ്ട്. തൊടുപുഴയിൽ നിന്നുള്ള ചില പ്രാദേശിക നേതാക്കൾ മാത്രം പ്രചാരണം ഏകോപിപ്പിക്കുന്നത് ഹൈറേഞ്ചിലെ പ്രവർത്തകർക്കിടയിൽ വലിയ പ്രതിഷേധത്തിന് കാരണമായിട്ടുണ്ട്.

പഴയ പ്രസംഗം യുഡിഎഫിന് കുരുക്കാകുന്നു

അതിനിടെ, ഹൈറേഞ്ച് ജനതയെ അവഹേളിക്കുന്ന തരത്തിൽ റോയി കെ. പൗലോസ് മുൻപ് നടത്തിയ പ്രസംഗത്തിന്റെ വീഡിയോ ദൃശ്യങ്ങൾ വീണ്ടും പ്രചരിക്കുന്നത് യുഡിഎഫിനെ പ്രതിരോധത്തിലാക്കി. ഇടുക്കി ജില്ലയിലെ 80 ശതമാനം സ്ഥലങ്ങളും താമസയോഗ്യമല്ലെന്നും ദേവികുളം, ഉടുമ്പൻചോല, ഇടുക്കി നിയോജക മണ്ഡലങ്ങൾ സുരക്ഷിതമല്ലെന്നും പട്ടയങ്ങൾ കൈക്കൂലി കൊടുത്തു വാങ്ങിയതാണെന്നുമുള്ള റോയിയുടെ പഴയ പത്രസമ്മേളനമാണ് രാഷ്ട്രീയ എതിരാളികൾ ആയുധമാക്കുന്നത്. ഹൈറേഞ്ചിന്റെ അധ്വാനവും വോട്ടും ഉപയോഗിച്ച് തൊടുപുഴയെ മാത്രം സ്വർഗ്ഗമാക്കുന്ന രാഷ്ട്രീയമാണ് കോൺഗ്രസും കൂട്ടാളികളും കാലങ്ങളായി പയറ്റുന്നതെന്ന വിമർശനം ഇതോടെ ശക്തമായി.

പട്ടയ പ്രശ്നവും ജോസഫ് ഗ്രൂപ്പിന്റെ ഭാവിയും

ഹൈറേഞ്ചിൽ എത്തേണ്ടിയിരുന്ന പല പദ്ധതികളും രാഷ്ട്രീയ സ്വാധീനം ഉപയോഗിച്ച് വഴിതിരിച്ചുവിട്ടത് തൊടുപുഴ ലോബിയാണെന്ന ആരോപണവും നിലനിൽക്കുന്നുണ്ട്. ഡീൻ കുര്യാക്കോസ്, റോയി കെ. പൗലോസ്, ബിജോ മാണി എന്നിവരടങ്ങിയ കൂട്ടായ്മയും ചില പരിസ്ഥിതി പ്രവർത്തകരും ചേർന്ന് നടത്തിയ ഗൂഢനീക്കങ്ങളാണ് കട്ടപ്പനക്കാർക്ക് പട്ടയം ലഭിക്കുന്നത് വർഷങ്ങളോളം വൈകാൻ കാരണമായതെന്ന് ഒരുവിഭാഗം ജനങ്ങൾ വിശ്വസിക്കുന്നു. ഭൂമിയുടെ ഉടമസ്ഥാവകാശം പോലും രാഷ്ട്രീയ കരുക്കളാക്കി മാറ്റിയ ഈ തിരഞ്ഞെടുപ്പോടെ, കേരള കോൺഗ്രസ് ജോസഫ് വിഭാഗം ഹൈറേഞ്ചിന്റെ രാഷ്ട്രീയ ഭൂപടത്തിൽ നിന്നും അപ്രത്യക്ഷമാകുമെന്നും ഇവർ വിലയിരുത്തുന്നു.

ഇടുക്കി യുഡിഎഫിലെ ഈ ആഭ്യന്തര തർക്കങ്ങളെക്കുറിച്ചും 'തൊടുപുഴ-ഹൈറേഞ്ച്' രാഷ്ട്രീയ പോരിനെക്കുറിച്ചുമുള്ള നിങ്ങളുടെ അഭിപ്രായങ്ങൾ ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താൻ മറക്കരുത്.  ഈ വാർത്ത നിങ്ങളുടെ സുഹൃത്തുക്കൾക്കും ഇടുക്കിയിലെ വോട്ടർമാർക്കും വാട്സ്ആപ്പിൽ ഷെയർ ചെയ്യൂ. കേരള നിയമസഭാ തിരഞ്ഞെടുപ്പിലെ പുതിയ വിശേഷങ്ങൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യാൻ മറക്കരുത്.

Article Summary: Internal conflicts arise in Idukki UDF as High Range workers protest against the 'Thodupuzha Lobby' and the sidelining of Joy Vettikkuzhi.

#IdukkiPolitics #UDF #KeralaElection2026 #HighRange #ThodupuzhaLobby #RoyKPaulose #JoyVettikkuzhi #BreakingNews #Congress