അക്ഷയ സെന്ററുകൾ സേവനത്തിന് വേണ്ടിയാകണം, സാധാരണക്കാരെ വട്ടംകറക്കാനല്ല; പരാതികൾ പെരുകുന്നു

എ പി അബ്ദുല്ല ആരിഫ് ഹാശിമി കളത്തൂർ

(KVARTHA) സാധാരണക്കാരൻ്റെ ദൈനംദിന ജീവിതത്തിൽ സർക്കാരിൻ്റെ മുഖമായി ഇന്ന് പ്രവർത്തിക്കുന്നത് അക്ഷയ സെന്ററുകളാണ്. വിവിധ സർക്കാർ സേവനങ്ങൾ ഒരേ കുടക്കീഴിൽ ലഭ്യമാക്കുക എന്ന ലക്ഷ്യത്തോടെ ആരംഭിച്ച ഈ സ്ഥാപനങ്ങൾ പലപ്പോഴും ജനങ്ങളുടെ അവസാന ആശ്രയ കേന്ദ്രവുമാണ്. റേഷൻ കാർഡ്, ആധാർ, പെൻഷൻ മുതൽ വിദ്യാഭ്യാസ സർട്ടിഫിക്കറ്റുകൾ വരെയുള്ള ആവശ്യങ്ങൾക്കായി പതിനായിരങ്ങളാണ് ഓരോ ദിവസവും അക്ഷയ സെന്ററുകളിൽ എത്തുന്നത്. പൂർണതോതിലല്ലെങ്കിലും മറ്റുചില ‘അക്ഷയ’ സമാന സേവനകേന്ദ്രങ്ങളും നാട്ടിൽ പ്രവർത്തിക്കുന്നുണ്ട്.  എന്നാൽ, ഈ സേവന കേന്ദ്രങ്ങളിൽ പലയിടത്തും ജനങ്ങളെ വട്ടംകറക്കുന്ന രീതിയിലുള്ള പ്രവണതകൾ വർദ്ധിച്ചുവരുന്നത് വലിയ പ്രതിഷേധത്തിന് ഇടയാക്കുന്നു.

പല അക്ഷയ സെന്ററുകളിലും മറ്റും ജീവനക്കാർ അതീവ ഉത്തരവാദിത്തത്തോടെയാണ് ജോലി ചെയ്യുന്നത്. തിരക്കേറിയ സമയത്തും ക്ഷമയോടെ സേവനം നൽകുന്ന ഇവർ അഭിനന്ദനാർഹമായ പ്രവർത്തനമാണ് കാഴ്ചവെക്കുന്നത്. ഇത്തരക്കാരുടെ സേവന മനോഭാവമാണ് അക്ഷയ സെന്ററുകളെയും മറ്റു ജനസേവന കേന്ദ്രങ്ങളെയും ജനങ്ങൾക്ക് വിശ്വാസയോഗ്യമായ സ്ഥാപനങ്ങളാക്കി മാറ്റുന്നത്. എന്നാൽ ഇതിന് വിപരീതമായി പ്രവർത്തിക്കുന്ന ചില കേന്ദ്രങ്ങൾ സാധാരണക്കാരെ കടുത്ത മാനസിക സമ്മർദ്ദത്തിലാക്കുകയാണെന്ന് പരാതി ഉയരുന്നു.

ആവശ്യമായ രേഖകൾ ഒരുമിച്ച് ആവശ്യപ്പെടുന്നതിന് പകരം പല തവണകളായി കൊണ്ടുവരാൻ ആവശ്യപ്പെടുന്നതാണ് പ്രധാനമായും ഉന്നയിക്കപ്പെടുന്ന പരാതി. അപേക്ഷകളിലെ നിസ്സാരമായ സാങ്കേതിക പിഴവുകൾ പോലും വലിയ പ്രശ്നങ്ങളായി അവതരിപ്പിച്ച് അപേക്ഷകൾ നീട്ടിക്കൊണ്ടുപോകുന്ന സമീപനം പലയിടത്തും കാണുന്നു. ദൂരസ്ഥലങ്ങളിൽ നിന്നും ഗ്രാമപ്രദേശങ്ങളിൽ നിന്നും എത്തുന്ന സാധാരണക്കാർക്കും ദിവസവേതന തൊഴിലാളികൾക്കും ഇത് വലിയ സാമ്പത്തിക ബാധ്യതയും സമയനഷ്ടവുമാണ് ഉണ്ടാക്കുന്നത്. ഒരു ദിവസത്തെ വേതനം നഷ്ടപ്പെടുത്തി എത്തുന്നവർക്ക് 'ഇതും കൂടി വേണം, ഇത് മാറ്റി കൊണ്ടുവരണം' എന്ന മറുപടികൾ നിരാശയാണ് നൽകുന്നത്.

അക്ഷയ സെന്ററുകൾ രൂപീകരിച്ചത് ജനങ്ങളെ സഹായിക്കാനാണ്, അവരെ ബുദ്ധിമുട്ടിക്കാനല്ല എന്ന അടിസ്ഥാന തത്വം പലപ്പോഴും വിസ്മരിക്കുകയാണ്. രേഖകളിൽ ആവശ്യമായ കാര്യങ്ങൾ ഒരിക്കൽ തന്നെ അപേക്ഷകരോട് വ്യക്തമായി വിശദീകരിച്ച് നൽകുകയും, സേവനം വേഗത്തിൽ പൂർത്തിയാക്കുകയും ചെയ്യേണ്ടത് ഓരോ സെന്ററിൻ്റെയും ഉത്തരവാദിത്തമാണ്. നിയമങ്ങളും ചട്ടങ്ങളും പാലിക്കപ്പെടുമ്പോഴും അപേക്ഷകൻ്റെ സാഹചര്യം കൂടി പരിഗണിക്കുന്ന സഹായമനോഭാവമാണ് ഇത്തരം പൊതുസേവന കേന്ദ്രങ്ങളുടെ ശക്തിയെന്ന് ചൂണ്ടിക്കാണിക്കുന്നു.

ഈ വിഷയത്തിൽ സർക്കാർ മേൽനോട്ട സംവിധാനങ്ങൾ കൂടുതൽ കർക്കശമാകേണ്ടതുണ്ട്. ജനങ്ങളുടെ പരാതികൾ കൃത്യമായി കേൾക്കാനും തെറ്റായ പ്രവണതകൾ തിരുത്താനും ഫലപ്രദമായ നടപടികൾ ഉണ്ടാകണം. മികച്ച സേവനം നൽകുന്ന അക്ഷയ സെന്ററുകൾക്ക് പ്രോത്സാഹനം നൽകുന്നതിനൊപ്പം, ജനങ്ങളെ അനാവശ്യമായി ബുദ്ധിമുട്ടിക്കുന്ന സെന്ററുകൾക്കെതിരെ കർശന നടപടി സ്വീകരിക്കണമെന്നും ആവശ്യം ഉയരുന്നു. അക്ഷയ സെന്ററുകൾ യഥാർത്ഥത്തിൽ 'ജനസേവന കേന്ദ്രങ്ങൾ' ആയി മാറണമെങ്കിൽ കരുണയും ഉത്തരവാദിത്തവുമുള്ള ഒരു സേവന സംസ്കാരം അവിടെ രൂപപ്പെടേണ്ടത് അനിവാര്യമാണ്.

സാധാരണക്കാരുടെ പ്രശ്നങ്ങൾ അധികാരികളുടെ ശ്രദ്ധയിൽപ്പെടുത്താൻ ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായം പങ്കുവെക്കൂ.

Article Summary: Public outrage grows over poor service and delays at Akshaya Centers across Kerala.

#AkshayaCenter #KeralaNews #PublicService #CommonManIssues #Governance #SocialIssues