വിയറ്റ്നാം മോഡൽ കുരുമുളക് കൃഷി: പുതിയൊരു അതിജീവന വഴി തേടി മലയോര കർഷകർ

കണ്ണൂർ: (KVARTHA) കനത്ത മഴയും വന്യമൃഗങ്ങളുടെ ശല്യമുൾപ്പെടെ നിരവധി പ്രതിസന്ധികൾ നേരിടുന്ന കണ്ണൂരിലെ മലയോര കർഷകർ അതിജീവനത്തിനായി പുത്തൻ വഴികൾ തേടുന്നു. കുരുമുളക് കൃഷിയിലെ വ്യത്യസ്തമായ രീതിയാണ് ഇവർ ഇപ്പോൾ പരീക്ഷിക്കുന്നത്. ശാസ്ത്രീയവും നൂതനവുമായ വിയറ്റ്നാം മോഡൽ കുരുമുളക് കൃഷിയാണ് കണ്ണൂരിലെ മലയോര മേഖലയിൽ പുതിയ ട്രെൻഡായി മാറുന്നത്.

ചെറുപുഴ-കടുമേനി റോഡരികിൽ വെണ്യക്കരയിൽ തോമസ് പാറശ്ശേരിൽ ആണ് ഈ കൃഷി രീതിക്ക് തുടക്കമിട്ടത്. കുറഞ്ഞ സ്ഥലത്ത് കൂടുതൽ കൃഷി എന്ന 'ഹൈ ഡെൻസിറ്റി ഫാമിങ്' രീതിയാണ് ഇവിടെ പ്രാവർത്തികമാക്കുന്നത്. 

നാല് ഇഞ്ച് വണ്ണവും രണ്ടര മീറ്റർ ഉയരവുമുള്ള പിവിസി പൈപ്പിലാണ് കുരുമുളക് തൈകൾ നട്ടിരിക്കുന്നത്. ഈ പൈപ്പുകൾക്ക് വീണ്ടും രണ്ടര മീറ്റർ കൂടി ഉയരം കൂട്ടാൻ സാധിക്കും. ഏഴരയടി സമചതുരത്തിലാണ് പിവിസി പൈപ്പുകൾ സ്ഥാപിച്ചിരിക്കുന്നത്.

കൂമ്പുങ്കൻ, വിജ, പന്നിയൂർ വൺ എന്നീ മൂന്നിനങ്ങളാണ് ഇവിടെ നട്ടിട്ടുള്ളത്. തോട്ടത്തിൽ കളകൾ വളരാതിരിക്കാൻ വീഡ് മാറ്റുകൾ വിരിച്ചിട്ടുണ്ട്. ഇത് മണ്ണിന് ഈർപ്പം നിലനിർത്താനും സഹായിക്കും. അടിസ്ഥാന വളമായി ബംഗളൂരു ഐസിഎആറിൻ്റെ ശുപാർശയോടെ തയ്യാറാക്കിയ ചകിരി കമ്പോസ്റ്റും ചാണകവുമാണ് ഉപയോഗിച്ചിരിക്കുന്നത്. 

ഇനി ചെടിയുടെ ചുവട് ഇളക്കി വളമിടേണ്ട ആവശ്യമില്ല. ഫോളിയാർ രൂപത്തിൽ സസ്യങ്ങൾക്കാവശ്യമായ മൂലകങ്ങൾ സ്പ്രേ ചെയ്തു നൽകും. കീടങ്ങളിൽ നിന്ന് സംരക്ഷണം നൽകുന്നതിനായി തോട്ടത്തിന് ചുറ്റും ചെണ്ടുമല്ലിയും നട്ടിട്ടുണ്ട്.

തന്റെ 17 സെൻ്റിൽ 145 കുരുമുളകുകളാണ് തോമസ് വിയറ്റ്നാം മോഡലിൽ കൃഷി ചെയ്തിരിക്കുന്നത്. കടുമേനി ഫാർമേഴ്‌സ് ഗ്രൂപ്പിലെ അംഗമായ തോമസിനെ കൂടാതെ മറ്റ് 10 ഗ്രൂപ്പംഗങ്ങളും ഇതേ രീതിയിൽ കൃഷി ആരംഭിച്ചിട്ടുണ്ട്. 

കുരുമുളക് ചെടികൾക്കിടയിൽ പച്ചക്കറികളും നടുമെന്ന് ഇവർ പറയുന്നു. രണ്ട് മാസമേ ആയിട്ടുള്ളൂ തൈകൾ നട്ടിട്ട്. ആറു മാസമാകുമ്പോഴേക്കും തിരിയിടും. നാലുവർഷം കൊണ്ട് മുടക്കുമുതൽ തിരികെ ലഭിക്കുമെന്നാണ് കർഷകർ പ്രതീക്ഷിക്കുന്നത്.

റോഡരികിൽ തോമസിന്റെ കുരുമുളക് തോട്ടം ഒരു മനോഹരമായ കാഴ്ചയാണ്. ഈ നൂതന കൃഷിരീതി കണ്ടതോടെ പലരും അദ്ദേഹത്തെ സമീപിക്കുകയും ഈ രീതിയിലേക്ക് മാറാൻ ശ്രമിക്കുകയും ചെയ്യുന്നുണ്ട്. സ്ഥലം വിട്ടുനൽകിയാൽ നിശ്ചിത തുക നിശ്ചയിച്ച് ഇത്തരം കൃഷിരീതികൾ ചെയ്ത് നൽകുന്നവരുമുണ്ട്.

പുതിയ കാർഷികരീതികൾ സ്വീകരിക്കുന്നതിനെക്കുറിച്ച് നിങ്ങളുടെ കാഴ്ചപ്പാട് എന്താണ്? ഈ വാർത്ത പങ്കുവെച്ച് അഭിപ്രായം അറിയിക്കൂ.

Article Summary: Hillside farmers in Kannur are adopting the Vietnam model for pepper cultivation.

#KeralaAgriculture #PepperCultivation #VietnamModel #Kannur #Farming #Farmers