പച്ചക്കറികൾക്ക് സ്വർണ്ണ വില; ഓണം ആഘോഷിക്കാൻ എന്തുചെയ്യും?

കോട്ടയം: (KVARTHA) ഇത്തവണത്തെ ഓണത്തിന് സാധാരണക്കാരുടെ കീശ ചോർത്താൻ പച്ചക്കറി വില മത്സരിക്കുന്നു. ഓണസദ്യയ്ക്ക് ഒഴിച്ചുകൂടാനാവാത്ത പച്ചക്കറികളുടെ വില കുത്തനെ ഉയർന്നതോടെ എന്തുചെയ്യണമെന്നറിയാതെ വിഷമിക്കുകയാണ് വീട്ടമ്മമാർ. 

കാലാവസ്ഥാ വ്യതിയാനം കാരണം നാടൻ പച്ചക്കറികൾക്ക് ക്ഷാമം നേരിട്ടതോടെ, വിപണി പൂർണമായും അന്യസംസ്ഥാനങ്ങളെ ആശ്രയിച്ചതാണ് വില വർധനവിന് പ്രധാന കാരണം.

ഓണം പ്രമാണിച്ച് ആവശ്യക്കാർ കൂടുമെന്ന് മനസ്സിലാക്കി വ്യാപാരികൾ മനപ്പൂർവ്വം വില വർദ്ധിപ്പിച്ചതാണെന്നും ആക്ഷേപമുണ്ട്. വെളിച്ചെണ്ണയ്ക്കും തേങ്ങയ്ക്കും വില കുറഞ്ഞത് മാത്രമാണ് ഏക ആശ്വാസം. 

പയർ, കൂർക്ക എന്നിവയുടെ വില രണ്ടാഴ്ചയായി കിലോയ്ക്ക് 120 രൂപയിലാണ്. സാധാരണ ഓണത്തിന് ചില പച്ചക്കറികൾക്ക് മാത്രമാണ് വില കൂടാറുള്ളത്. എന്നാൽ ഇത്തവണ മിക്ക പച്ചക്കറികൾക്കും 20 മുതൽ 30 രൂപ വരെ വർധനവുണ്ടായിട്ടുണ്ട്.

അന്യസംസ്ഥാനങ്ങളിലെ കച്ചവടക്കാരുടെ ചൂഷണം

നിലവിൽ തമിഴ്‌നാട്, കർണാടക, ആന്ധ്രാപ്രദേശ് എന്നിവിടങ്ങളിൽ നിന്നാണ് കേരളത്തിലേക്ക് പച്ചക്കറികൾ പ്രധാനമായും എത്തുന്നത്. അന്യസംസ്ഥാനങ്ങളെ പൂർണ്ണമായി ആശ്രയിക്കേണ്ടി വന്നതോടെ, അവിടങ്ങളിലെ മൊത്തക്കച്ചവടക്കാർ നിശ്ചയിക്കുന്ന വിലയ്ക്ക് പച്ചക്കറികൾ വാങ്ങാൻ കേരളത്തിലെ വ്യാപാരികൾ നിർബന്ധിതരാവുകയാണ്. 

ഇത് ഉപഭോക്താക്കൾക്ക് കൂടുതൽ വില നൽകേണ്ട അവസ്ഥ ഉണ്ടാക്കുന്നു. കഴിഞ്ഞ മൂന്ന് മാസമായി തുടർച്ചയായി പെയ്ത മഴ കാരണം കേരളത്തിലെ പ്രാദേശിക പച്ചക്കറി കൃഷി നശിച്ചതും തിരിച്ചടിയായി. വിപണിയിൽ ഏത്തക്കുല ഒഴികെ മറ്റ് നാടൻ വിഭവങ്ങൾ വളരെ കുറവാണ്.

ആശ്വാസമായി ഓണം വിപണന മേളകൾ

കുടുംബശ്രീ, സഹകരണ സംഘങ്ങൾ, ബാങ്കുകൾ എന്നിവ പ്രാദേശികമായി നടത്തുന്ന ഓണം വിപണന മേളകൾ സാധാരണക്കാർക്ക് ആശ്വാസം നൽകുന്നുണ്ട്. ചേന പോലുള്ള ചില നാടൻ വിഭവങ്ങൾ ഇവിടെനിന്ന് ന്യായവിലയ്ക്ക് ലഭിക്കുന്നുണ്ട്. 

പച്ചക്കറി വില വർധനവ് മുന്നിൽക്കണ്ട് പല കാറ്ററിംഗ് സ്ഥാപനങ്ങളും ഹോട്ടലുകളും തമിഴ്‌നാട്ടിൽ നിന്ന് നേരിട്ട് പച്ചക്കറികൾ വാങ്ങിയിരുന്നു. ഇതിനുപുറമെ, കടകളിൽ 100-150 രൂപയ്ക്ക് ലഭിക്കുന്ന പച്ചക്കറി കിറ്റുകളെ ആശ്രയിക്കുന്നവരും നിരവധിയാണ്.

പ്രധാന പച്ചക്കറി ഇനങ്ങളുടെ ഏകദേശ വില (കിലോയ്ക്ക്)

● കാരറ്റ്: ₹90
● വെണ്ട, ബീറ്റ്റൂട്ട്, തക്കാളി, കാബേജ്, വെള്ളരി, കോളിഫ്ലവർ: ₹60
● കറിവേപ്പില: ₹60
● ബീൻസ്, വഴുതന: ₹80
● പാവയ്ക്ക: ₹90
● കറിക്കായ, ഏത്തക്കായ: ₹40
● മുരിങ്ങക്ക: ₹90
● കത്രിക്ക: ₹65
● പടവലം: ₹90
● മത്തൻ, തടിയൻ: ₹50
● ചേന: ₹70
● നാടൻ ചേമ്പ്: ₹90

പച്ചക്കറി വിലക്കയറ്റത്തെക്കുറിച്ചുള്ള നിങ്ങളുടെ അഭിപ്രായം പങ്കുവെയ്ക്കൂ. 

Article Summary: High vegetable prices in Kerala for Onam.

#Onam #Kerala #VegetablePrice #PriceHike #OnamSadya #Inflation