ന്യൂഡൽഹി: (KVARTHA) ആധാർ കാർഡിലെ പേര് മാറ്റുന്നത് ഇപ്പോൾ കുറച്ചുകൂടി ബുദ്ധിമുട്ടായിരിക്കുന്നു. യൂണീക്ക് ഐഡൻ്റിഫിക്കേഷൻ അതോറിറ്റി ഓഫ് ഇന്ത്യ (UIDAI) ആധാർ വിവരങ്ങൾ മാറ്റുന്നതിനുള്ള നിയമങ്ങൾ കർശനമാക്കിയതിനാലാണിത്. തട്ടിപ്പുകൾ തടയുകയും ആധാർ രേഖകൾ കൂടുതൽ കൃത്യമായി സൂക്ഷിക്കുകയും ചെയ്യുക എന്നതാണ് ഈ മാറ്റത്തിന്റെ ലക്ഷ്യം. പുതിയ നിയമപ്രകാരം, ആധാർ കാർഡിലെ പേര് മാറ്റണമെങ്കിൽ ഗസറ്റ് വിജ്ഞാപനം ആവശ്യമായി വരും.

പുതിയ മാറ്റങ്ങൾ 

ആധാർ കാർഡിലെ പേര് മാറ്റുന്നത് ഇനി മുതൽ കൂടുതൽ ശ്രദ്ധയോടെ ചെയ്യേണ്ടി വരും. പേരിന്റെ ഒരു അക്ഷരം പോലും മാറ്റണമെങ്കിൽ പഴയപേരിന്റെ തിരിച്ചറിയല്‍ രേഖയും നല്‍കണം. പാൻ കാർഡ്, വോട്ടർ ഐഡി, ഡ്രൈവിംഗ് ലൈസൻസ്, പാസ്‌പോർട്ട് തുടങ്ങിയവ ഇതിൽ ഉൾപ്പെടും. പേര് മാറ്റാൻ രണ്ട് അവസരം മാത്രമേ ഉള്ളൂ എന്നാണ് യുഐഡിഎഐ പറയുന്നത്. അതായത്, രണ്ട് തവണയ്ക്ക് മേൽ പേര് മാറ്റാൻ കഴിയില്ല.

വിലാസം എളുപ്പത്തിൽ മാറ്റാം 

അതേസമയം വിലാസം മാറ്റണമെങ്കിലോ പുതിയതായി രജിസ്റ്റർ ചെയ്യണമെങ്കിലോ ഇപ്പോൾ കാര്യങ്ങൾ എളുപ്പമായിരിക്കുന്നു. ഏത് പൊതുമേഖലാ ബാങ്കിലെ പാസ്ബുക്കും ഇതിന് മതിയാകും. എന്നാൽ ഇതിനായി, ബാങ്കിൽ പോയി സാക്ഷ്യപത്രം വാങ്ങണം. ഇതിൽ പേര്, പുതിയ വിലാസം, ബാങ്കിൽ ഉപഭോക്താവാണെന്ന് തെളിയിക്കുന്ന വിവരങ്ങൾ എന്നിവ ഉണ്ടായിരിക്കും. കൂടാതെ, ഇ-കെവൈസി നടപടിക്രമങ്ങൾ പൂർത്തിയാക്കിയിട്ടുണ്ടെന്നും ശാഖാമാനേജര്‍ സാക്ഷ്യപത്രത്തിൽ വ്യക്തമാക്കണം.

ജനനത്തീയതിയിൽ മാറ്റം വരുത്തുന്നവർ ശ്രദ്ധിക്കുക

ജനനത്തീയതിയിൽ മാറ്റം വരുത്തുന്നത് ഇനി മുൻപത്തെ പോലെ എളുപ്പമല്ല. പുതിയ നിയമപ്രകാരം, 18 വയസ്സിന് താഴെയുള്ളവർക്ക് ജനനത്തീയതി തെളിയിക്കാൻ അംഗീകൃത സംസ്ഥാന അധികാരികൾ നൽകുന്ന ജനന സർട്ടിഫിക്കറ്റ് മാത്രമേ മതിയാകൂ. പാസ്പോർട്ട്, എസ്എസ്എൽസി ബുക്ക് തുടങ്ങിയ മറ്റ് രേഖകൾ ഇനി ഇതിന് സാധുവാകില്ല. അതുകൊണ്ട്, ആധാർ കാർഡിലെ ജനനത്തീയതിയിൽ മാറ്റം വരുത്താൻ ആഗ്രഹിക്കുന്നുവെങ്കിൽ, ഈ പുതിയ നിയമം കർശനമായി പാലിക്കേണ്ടത് അത്യാവശ്യമാണ്. അല്ലെങ്കിൽ അപേക്ഷ തള്ളപ്പെടാനും, അനാവശ്യ പ്രശ്‌നങ്ങൾ ഉണ്ടാകാനും ഇടയുണ്ട്.

#AadhaarUpdate #UIDAI #NameChange #LegalChanges #AddressChange #IndiaNews