Angry Kids | നിങ്ങളുടെ കുട്ടി ദേഷ്യക്കാരനാണോ? ഈ വിറ്റാമിൻ്റെ കുറവ് ഉണ്ടാകാം! എന്താണ് ചെയ്യേണ്ടതെന്ന് അറിയാം

  

ദേഷ്യവും മാനസിക പ്രശ്‌നങ്ങളും

വിറ്റാമിൻ ഡി കുറവുള്ള കുട്ടികളിൽ ദേഷ്യവും ചില മാനസിക പ്രശ്നങ്ങളും ഉണ്ടാകാനുള്ള സാധ്യത കൂടുതലാണ്. വിറ്റാമിൻ ഡി മസ്തിഷ്കത്തിലെ സന്തോഷഹോർമോൺ എന്നറിയപ്പെടുന്ന ഡോപാമിന്റെ ഉത്പാദനത്തെ നിയന്ത്രിക്കുന്നു. വിറ്റാമിൻ ഡി കുറവുള്ള കുട്ടികളിൽ ഡോപാമിന്റെ അളവ് കുറവായിരിക്കും. ഇത് കുട്ടികളിൽ ആനന്ദം കുറയ്ക്കുകയും അസ്വസ്ഥത ഉണ്ടാക്കുകയും ചെയ്യുന്നു. ഇതിന്റെ ഫലമായി കുട്ടികൾ കൂടുതൽ കോപാകുലരാകാനുള്ള സാധ്യതയുണ്ട്.

വിറ്റാമിൻ ഡി സെറോടോണിൻ എന്ന മറ്റൊരു പ്രധാന ന്യൂറോട്രാൻസ്മിറ്ററിന്റെയും പ്രവർത്തനത്തെ ബാധിക്കുന്നു. സെറോടോണിൻ മൂഡ് നിയന്ത്രിക്കുന്നതിൽ പ്രധാന പങ്ക് വഹിക്കുന്നു. വിറ്റാമിൻ ഡി കുറവ് മൂലം സെറോടോണിന്റെ അളവ് ചിലപ്പോൾ ചാഞ്ചാടിയേക്കാം. ഇത് കുട്ടികളുടെ മൂഡ് സ്ഥിരതയില്ലാതാക്കുകയും കോപാകുലരാകാൻ കാരണമാകുകയും ചെയ്യാം. വിറ്റാമിൻ ഡി കുറവ് മൂലം ചില കുട്ടികളിൽ എല്ലുകളിലും മറ്റും വേദന അനുഭവപ്പെട്ടേക്കാം. ഈ വേദന കുട്ടികളെ അസ്വസ്ഥരാക്കുകയും കോപാകുലരാക്കുകയും ചെയ്യാമെന്നും ആരോഗ്യ വിദഗ്ധർ പറയുന്നു.

വിറ്റാമിൻ ഡി-യുടെ ഉറവിടങ്ങൾ:

കുട്ടികളുടെ ശരീരത്തിൽ വിറ്റാമിൻ ഡി എത്തുന്നത് പ്രധാനമായും മൂന്ന് മാർഗങ്ങളിലൂടെയാണ്:

1. സൂര്യപ്രകാശം: വിറ്റാമിൻ ഡി ശരീരം സൂര്യപ്രകാശത്തിൽ നിന്ന് ഉണ്ടാക്കിയെടുക്കുന്നതാണ്. കുട്ടികളെ ദിവസവും കുറച്ച് സമയം വെയിലത്ത് കളിപ്പിക്കുന്നത് വിറ്റാമിൻ ഡി ലഭിക്കാനുള്ള ഏറ്റവും നല്ല മാർഗമാണ്. പകൽ സമയങ്ങളിൽ, കഠിന ചൂട് ഇല്ലാത്ത സമയങ്ങളിൽ 10-15 മിനിറ്റ് വെയിലത്ത് കളിപ്പിക്കുന്നത് ഗുണം ചെയ്യും. എന്നാൽ, ചൂട് കടുത്ത സമയങ്ങളിൽ സൂര്യാതപം ഏൽക്കുന്നത് ഒഴിവാക്കണം കാരണം അത് ചർമ സംബന്ധമായ പ്രശ്നങ്ങൾ ഉണ്ടാക്കിയേക്കാം.

2. ആഹാരക്രമം: ചില ഭക്ഷണപദാർഥങ്ങളിൽ സ്വാഭാവികമായി വിറ്റാമിൻ ഡി അടങ്ങിയിട്ടുണ്ട്. ഇത്തരം ഭക്ഷണങ്ങൾ കുട്ടികളുടെ ആഹാരക്രമത്തിൽ ഉൾപ്പെടുത്തുന്നത് വിറ്റാമിൻ ഡി കുറവ് തടയാൻ സഹായിക്കും. ഉദാഹരണത്തിന് കൊഴുപ്പ് ചേർന്ന മീൻ (സാൽമൺ, അയല പോലുള്ള മീനുകൾ വിറ്റാമിൻ ഡി യുടെ നല്ല ഉറവിടങ്ങളാണ്). മുട്ടയുടെ മഞ്ഞക്കരുവിൽ വിറ്റാമിൻ ഡി അടങ്ങിയിട്ടുണ്ട്.

3. വിറ്റാമിൻ ഡി സപ്ലിമെന്റുകൾ: ചില കുട്ടികൾക്ക് സൂര്യപ്രകാശത്തിൽ നിന്നും ആഹാരക്രമത്തിൽ നിന്നും പര്യാപ്തമായ വിറ്റാമിൻ ഡി കിട്ടുന്നില്ല എങ്കിൽ, ഡോക്ടറുടെ നിർദേശപ്രകാരം വിറ്റാമിൻ ഡി സപ്ലിമെന്റുകൾ നൽകാവുന്നതാണ്. രക്തപരിശോധന വഴി വിറ്റാമിൻ ഡി എത്രത്തോളം ഉണ്ടെന്ന് നിർണ്ണയിച്ച ശേഷമാണ് സാധാരണയായി സപ്ലിമെന്റുകൾ നിർദേശിക്കുക.